គម្រោងSmart Jamp មានគោលបំណងកែលម្អហេដ្ឋារចនាសម្ព័ន្ធនៅក្នុងក្រុងបាត់ដំបង ឲ្យកាន់តែល្អប្រសើរ

ភ្នំពេញ៖ នៅរសៀលថ្ងៃទី១៧ ខែតុលា ឆ្នាំ២០២៣ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានអញ្ជើញដឹកនាំកិច្ចប្រជុំជាមួយនឹងអ្នកជំនាញ របស់គម្រោងSmart Jamp នៅសាលប្រជុំB2 នៃសាលាខេត្តបាត់ដំបង ។

ចំពោះគម្រោងSmart Jamp មានគោលបំណងកែលម្អទៅលើហេដ្ឋារចនាសម្ព័ន្ធទីក្រុង ការរៀបចំហេដ្ឋារចនាសម្ព័ន្ធនៅក្នុងក្រុងបាត់ដំបងឲ្យកាន់តែល្អប្រសើរប្រកបដោយសោភ័ណភាព ដោយមានការរៀបចំ និងប្រើប្រាស់នូវស្ថានីយ៍រថភ្លើងឡើងវិញ ការកែលម្អផ្លូវថ្មើជើង និងប្រព័ន្ធបង្ហូរទឹក ព្រមទាំងបំពាក់នូវអំពូលឆ្លាតវៃដែលអាចភ្ជាប់នូវប្រព័ន្ធគ្រប់គ្រងសុវត្តិភាពផ្សេងៗដែលមានប្រយោជន៍ផងដែរក្នុងការធ្វើចរាចរណ៍លើដងវិថី។

បន្ថែមលើសពីនោះទៅទៀត គម្រោងនេះក៏មានការរៀបចំនូវគំនូស ស្លាកសញ្ញា និងភ្លើងចរាចរណ៍ ព្រមទាំងបែងចែកផ្លូវសម្រាប់ថ្មើជើង និងផ្លូវសម្រាប់ធ្វើចរាចរណ៍ផងដែរ ដើម្បីជួយសម្រួលក្នុងការធ្វើដំណើររបស់ប្រជាពលរដ្ឋនៅក្នុងមូលដ្ឋានឲ្យមានភាពងាយស្រួល កាត់បន្ថយការកកស្ទះ និងកាត់បន្ថយការគ្រោះថ្នាក់ចរាចរណ៍ផងដែរ។

ឯកឧត្តមសុខ លូ អភិបាល នៃគណៈអភិបាលខេត្តបាត់ដំបងមានប្រសាសន៍ថា គម្រោងនេះពិតជាមានគុណប្រយោជន៍ល្អណាស់ និងលើកទឹកចិត្តឲ្យមានគម្រោងបន្ថែមនៅផ្លូវដែលមានចរាចរណ៍ធ្វើដំណើរច្រើន ជាពិសេសតាមបណ្ដោយផ្លូវដែលផ្សារភ្ជាប់ពីផ្សារណាត់ទៅកាន់ផ្លូវមួយចំនួនដូចជា ផ្លូវលេខ១ ផ្លូវលេខ១កន្លះ ផ្លូវលេខ២ ព្រោះថាផ្លូវនេះមានចររាចរណ៍សកម្មច្រើនជាងគេ ហើយមានផ្ទះ និងអគារបុរាណអភិរក្សជាច្រើនដែលសេសសល់ពីសម័យអាណានិគមនិយមបារាំង ដែលអាចទាក់ទាញភ្ញៀវទេសចរណ៍ឲ្យមកកំសាន្តនៅក្នុងខេត្តបាត់ដំបងកាន់តែច្រើនមួយកម្រិតបន្ថែមទៀត ៕