សម្តេច ស ខេង អនុញ្ញាតឱ្យ អនុរដ្ឋមន្ត្រីក្រសួងនគរបាលវៀតណាម ចូលជួបសម្ដែងការគួរសម នៅវិមានរដ្ឋសភា

ភ្នំពេញ៖ សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ នៃព្រះរាជណាចក្រកម្ពុជា នារសៀលថ្ងៃសុក្រ ១៤រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៣ ខែតុលា ឆ្នាំ២០២៣ បានអនុញ្ញាតឱ្យ ឯកឧត្ដម ឧត្ដមសេនីយ៍ឯកបម្រុង លឿង តាមក្វាង អនុរដ្ឋមន្ត្រីក្រសួងនគរបាលវៀតណាម ដឹកនាំគណៈប្រតិភូចូលជួបសម្ដែងការគួរសម នៅវិមានរដ្ឋសភា ក្នុងឱកាសឯកឧត្ដម អញ្ជើញបំពេញទស្សនកិច្ចនៅព្រះរាជាណាចក្រកម្ពុជា។ សម្តេចក្រឡាហោម ស ខេង បានសម្ដែងនូវការស្វាគមន៍ចំពោះ ឯកឧត្ដមអនុរដ្ឋមន្ត្រីក្រសួងនគរបាលវៀតណាម ព្រមទាំងគណៈប្រតិភូ ដែលបានអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា និងបានផ្ដាំផ្ញើការសាកសួរសុខទុក្ខជូនចំពោះ ឯកឧត្ដម ឧត្ដមសេនីយ៍ឯក តូ ឡឹម រដ្ឋមន្ត្រីក្រសួងនគរបាលវៀតណាម។ សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងឯកឧត្តម ឧត្តមសេនីយ៍ឯកបម្រុង លឿង តាមក្វាង អនុរដ្ឋមន្រ្តីក្រសួងនគរបាលវៀតណាម បានឯកភាព និងវាយតម្លៃខ្ពស់ចំពោះទំនាក់ទំនងកិច្ចសហប្រតិប្តត្តិការល្អរវាងក្រសួងមហាផ្ទៃកម្ពុជា និងក្រសួងនគរបាលវៀតណាម អស់រយៈពេលជាច្រើនឆ្នាំកន្លងមក។ សម្តេចក្រឡាហោម និង ឯកឧត្តម អនុរដ្ឋមន្រ្តីក៏សង្ឃឹម និងជឿជាក់ថា ក្រសួងទាំងពីរនឹងបន្តពង្រឹងទំនាក់ទំនងបន្ថែមទៀត ដើម្បីរួមចំណែកដល់ការរីកចម្រើន និងការអភិវឌ្ឍសេដ្ឋកិច្ច សង្គម នៃប្រទេសទាំងពីរ។ សូមបញ្ជាក់ផងដែរថា ដំណើរទស្សនកិច្ចរបស់ ឯកឧត្តម ឧត្តមសេនីយ៍ឯកបម្រុង លឿង តាមក្វាង អនុរដ្ឋមន្រ្តីក្រសួងនគរបាលវៀតណាម និងគណៈប្រតិភូ មានរយៈពេល ២ថ្ងៃ ចាប់ពីថ្ងៃទី១២ ដល់ថ្ងៃទី១៣ ខែតុលា ឆ្នាំ២០២៣ ដោយក្នុងដំណើរទស្សនកិច្ចនេះ ឯកឧត្តម បានចូលជួបសម្តែងការគួរសម និងអបអរសាទរចំពោះថ្នាក់ដឹកនាំក្រសួងមហាផ្ទៃ ក្នុងរាជរដ្ឋាភិបាលថ្មីអាណត្តិទី៧ ៕