ឯកឧត្ដមទេសរដ្ឋមន្ត្រី សក់ សេដ្ឋា អញ្ជើញកាន់បិណ្ឌវេនទី៨ នៅវត្តបវេល ក្នុងឃុំបួវិល ស្រុកបវេល ខេត្តបាត់ដំបង
ភ្នំពេញ៖ ឯកឧត្ដមទេសរដ្ឋមន្ត្រី សក់ សេដ្ឋា ប្រធានក្រុមការងាររាជរដ្ឋាភិបាល ចុះជួយមូលដ្ឋានស្រុកបវេល នៅព្រឹកថ្ងៃទី៧ ខែតុលា ឆ្នាំ២០២៣នេះ បានអញ្ជើញកាន់បិណ្ឌវេនទី៨ នៅវត្តបវេល ក្នុងឃុំបួវិល ស្រុកបវេល ខេត្តបាត់ដំបង ។
ក្នុងឱកាសនោះដែរឯកឧត្ដមទេសរដ្ឋមន្ត្រី សក់ សេដ្ឋា បានរំលឹកពីពិធីបុណ្យភ្ជុំបិណ្ឌ ដែជាពិធីបុណ្យព្រះពុទ្ធសាសនាដ៏ធំប្រចាំឆ្នាំ របស់ខ្មែរ មានរយៈពេល១៥ថ្ងៃ ចាប់ពីថ្ងៃ ១រោច ដល់ថ្ងៃ ១៥រោច ខែភទ្របទ។ ឯកឧត្ដមថា ពិធីបុណ្យភ្ជុំបិណ្ឌនេះជាពេលវេលាមួយ ដែលបងប្អូនប្រជាពលរដ្ឋពុទ្ធបរិស័ទ មានឱកាសក្នុងការធ្វើបុណ្យទាន សន្សំកុសល និងជួបជុំសាច់ញាតិបងប្អូន នៅតាមទីកន្លែងជិតឆ្ងាយ ជាពិសេសតាមទីវត្តអារាម ដើម្បីឧទ្ទិសកុសលផលបុណ្យ ជូនដល់បុព្វការីជន ញាតិសន្តាន ដែលបានចែកឋានរំលាយក្ខន្ធហើយ បានទៅកាន់សុគតិភពកុំបីឃ្លៀងឃ្លាតឡើយ។
ឯកឧត្ដមទេសរដ្ឋមន្ត្រី បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចតេជោ ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវ ព្រមទាំងថ្នាក់ដឹកនាំរាជរដ្ឋាភិបាល ជូនចំពោះប្រជាពលរដ្ឋក្នុងស្រុកបវេល ក៏ដូចជាពុទ្ធបរិស័ទដែលបានអញ្ជើញមកចូលរួមពិធីកាន់វេនទី៧ ក្នុងវត្តបវេលនាពេលនេះផងដែរ ។
ឆ្លៀតក្នុងឱកាសនោះឯកឧត្ដមទេសរដ្ឋមន្ត្រី សក់ សេដ្ឋា បានអំពាវនាវឲ្យបងប្អូនប្រជាពលរដ្ឋ បង្កើនការប្រុងប្រយ័ត្នគ្រោះធម្មជាតិផ្សេងៗ ជាពិសេសគ្រោះទឹកជំនន់ ជាមួយគ្នានោះក៏ត្រូវយកចិត្តទុកដាក់ចំពោះសុខភាពផងដែរ ។ បន្ថែមលើសពីនេះឯកឧត្ដមទេសរដ្ឋមន្ត្រី ក៏បានណែនាំឲ្យអាជ្ញាធរ មានសមត្ថកិច្ច យកចិត្តដាក់ ពិសេសត្រូវត្រៀមខ្លួនឲ្យជាប់ជាប្រចាំ ដើម្បីចេញជួយសង្គ្រោះប្រជាពលរដ្ឋ បានទាន់ពេលវេលា នៅពេលជួបគ្រោះមហន្តរាយធម្មជាតិ កើតឡើងជាយថាហេតុ ។
ឯកឧត្ដមទេសរដ្ឋមន្ត្រី បានថ្លែងអំណរគុណដល់បងប្អូនប្រជាពលរដ្ឋ ដែលបានបោះឆ្នោតគាំទ្រគណបក្សប្រជាជនកម្ពុជា រហូតទទួលបានជ័យជម្នះ ឈានទៅដល់បង្កើតគណរដ្ឋមន្ត្រីថ្មី អាណាត់ទី៧ ដែលដឹកនាំដោយបុត្រច្បងរបស់សម្ដេតេជោ ហ៊ុន សែន គឺសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ។
ឯកឧត្តមទេសរដ្ឋមន្ត្រី បានថ្លែងបញ្ជាក់ថា ដូចប្រទេសដទៃទៀតនៅក្នុងតំបន់ ជំងឺកូវីដ-១៩ បានបង្កផលប៉ះពាល់មកលើវិស័យសំខាន់ៗ នៃសេដ្ឋកិច្ចកម្ពុជា ដែលក្នុងនោះមានវិស័យទេសចរណ៍ វិស័យកាត់ដេរ ដែលក្នុងនេះមានកម្មករ-និយោជិត ភាគច្រើនជាស្រ្តី និងប៉ះពាល់ដល់វិស័យសំខាន់ៗមួយចំនួនទៀត ។
ឯកឧត្ដមទេសរដ្ឋមន្ត្រី សក់ សេដ្ឋា បានលើកឡើងថា រាជរដ្ឋាភិបាលកម្ពុជា តាមរយៈក្រសួងសុខាភិបាល បាននិងកំពុងតែរៀបចំចាប់ផ្ដើមចាក់វ៉ាក់សាំង ការពារជំងឺមហារីកស្បូន ដល់ក្មេងស្រីចាប់ពីអាយុ ៩ឆ្នាំឡើងទៅ ។
ជាមួយគ្នានោះឯកឧត្ដមទេសរដ្ឋមន្ត្រី បានបន្ថែមថា ក្រសួងការងារ និងបណ្ដុះបណ្ដាលវិជ្ជាជីវៈ ក៏កំពុងតែរៀបចំកម្មវិធីយុវជនក្រីក្រ ដែលផ្ដល់ឱកាសដល់យុវជនប្រមាណ ១លាននាក់ ។
ឯកឧត្ដមទេសរដ្ឋមន្ត្រី ថ្លែងថា បច្ចុប្បន្នយើងក៏បានពង្រាយមន្ត្រីកម្មសិកម្ម ទៅតាមមូលដ្ឋាន ដើម្បីជួយបង្ហាត់បង្រៀនដល់ប្រជាពលរដ្ឋ ឲ្យយល់ដឹងកាន់តែច្បាស់ថែមទៀត ពីជំនាញ ក៏ដូចជាបច្ចេកទេសក្នុងការធ្វើកសិកម្ម ។ ឯកឧត្ដមថា បច្ចុប្បន្នតាមឃុំយើងរើសបាន ២០០នាក់ហើយ ដើម្បីបញ្ជូនទៅរៀននៅអីស្រាអែល ។
ថ្លែងក្នុងឱកាសនោះដែរឯកឧត្ដមទេសរដ្ឋមន្ត្រី បានថ្លែងបញ្ជាក់ថា រាជរដ្ឋាភិបាលដែលមានសម្ដេចធិបតីនាយករដ្ឋមន្ត្រី បានគិតគូរដល់ប្រជាពលរដ្ឋដែលជាអ្នកប្រកបការងារ និងមុខរបរផ្នែកសេដ្ឋកិច្ចក្រៅប្រព័ន្ធ ដើម្បីឱ្យពួកគាត់បានចុះបញ្ជីក្នុងប្រព័ន្ធ និងបានទទួលអត្ថប្រយោជន៍ផ្សេងៗពីរាជរដ្ឋាភិបាល ព្រោះប្រសិនបើពួកគាត់នៅក្រៅប្រព័ន្ធ យើងពិបាកក្នុងការគ្រប់គ្រងចំនួនទិន្នន័យ និងផ្ដល់ការគាំពារដល់គាត់មិនគ្រប់ជ្រុងជ្រោយ មិនចំគោលដៅឡើយ ។
ឯកឧត្ដមទេសរដ្ឋមន្ត្រី សក់ សេដ្ឋា ក៏បានថ្លែងរំលឹកថា ប្រទេសកម្ពុជា ពិតជាអភ័ព្វដែលជួបតែសង្គ្រាម និងឆ្លងកាត់របបព្រៃផ្សៃប្រល័យពូជសាសន៍ ប៉ុលពត ដែលធ្វើឲ្យប្រជាពលរដ្ឋខ្មែរ ស្លាប់យ៉ាងច្រើន និងរងទុក្ខវេទនាជាច្រើនឆ្នាំ ។ ឯកឧត្ដមថា កម្ពុជា បានជួបវិបត្តិភ្លើងសង្គ្រាមយ៉ាងខ្លោចផ្សារអស់រយៈពេលប្រមាណជា ៣ទសវត្សរ៍ ក្រោយពេលរដ្ឋប្រហារដោយខុសច្បាប់ពីក្រុមសេនាប្រមុខ លន់ នល់ មានអាមេរិក និងវៀតណាមខាងត្បូងធ្វើជាបង្អែក។ ភ្លើងសង្គ្រាមដែលបង្កាត់ឡើងនៅថ្ងៃទី១៨ ខែមីនា ឆ្នាំ១៩៧០ បានឆេះរោលរាលបំផ្លិចបំផ្លាញនាវាកម្ពុជាស្ទើរក្លាយជាផេះផង់។ ភ្លើងសង្គ្រាមដែលបង្កាត់ឡើងត្រឹមមួយតែមួយថ្ងៃ តែបានឆេះរោលរាលរហូតដល់ទៅ៣ទសវត្សរ៍។ ភ្លើងសង្គ្រាមនេះ ត្រូវបានបិទបញ្ចប់ទៅវិញទាំងស្រុង នៅថ្ងៃទី២៩ ខែធ្នូ ឆ្នាំ១៩៩៨ ថ្ងៃដែលមេដឹកនាំខ្មែរក្រហម មកសុំរួមរស់នឹងរាជរដ្ឋាភិបាល ។
ក្នុងពិធីកាន់បិណ្ឌវេនទី៨ ដែលដឹកនាំដោយឯកឧត្ដមទេសរដ្ឋមន្ត្រី សក់ សេដ្ឋា ទទួលបានបច្ច័យសរុប ២១លានរៀល និងប្រាក់ដុល្លារចំនួន ២០០ដុល្លារ ៕
