នាយករដ្ឋមន្រ្តីចិន បញ្ជាក់ជូន សម្ដេចធិបតី ហ៊ុន ម៉ាណែត ថាចិនបន្តគាំទ្រ និងសហការជាមួយកម្ពុជាលើគ្រប់វិស័យ

ភ្នំពេញ៖ ឯកឧត្តម លី ឈាង នាយករដ្ឋមន្រ្តី នៃសាធារណរដ្ឋប្រជាមានិតចិន បានបញ្ជាក់ជូន សម្ដេចធិបតី ហ៊ុន ម៉ាណែត ជាថ្មីថា ចិនបន្តគាំទ្រ និងសហការជាមួយកម្ពុជាលើគ្រប់វិស័យ ដោយមិនមានការប្រែប្រួលឡើយ។

ឯកឧត្តមនាយករដ្ឋមន្រ្តី លី ឈាង បានបញ្ជាក់ជូនក្នុងឱកាសដែលឯកឧត្តម បានជួបសម្តែងការគួរសម និងពិភាក្សាការងារ ជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅមហាវិមានប្រជាជន នៃរដ្ឋធានីប៉េកាំង នាល្ងាចថ្ងៃសុក្រ ១កើត ខែភទ្របទ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី១៥ ខែកញ្ញា ឆ្នាំ២០២៣។

ឯកឧត្តមនាយករដ្ឋមន្រ្តី លី ឈាង ក៏បានជូនពរ សម្ដេចធិបតី និង គណៈប្រតិភូជាន់ខ្ពស់ បំពេញទស្សនកិច្ចផ្លូវការ ប្រកបដោយជោគជ័យ និងសូមធ្វើដំណើរមាតុភូមិនិវត្តន៍ប្រកបដោយសុខសុវត្ថិភាព ៕