រដ្ឋមន្ត្រីកសិកម្ម ណែនាំដល់កសិករត្រូវជ្រើសរើសប្រើប្រាស់ពូជស្រូវសុទ្ធ ពូជស្រូវល្អ ដូចជាសែនក្រអូប និងផ្ការំដួល ដែលជាពូជស្រូវយុទ្ធសាស្ត្ររបស់ខ្មែរ

បន្ទាយមានជ័យ៖ កាលពីថ្ងៃទី១១ ខែកញ្ញា ឆ្នាំ២០២៣ ឯកឧត្ដម ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ព្រមទាំងប្រតិភូអមដំណើរ អមដំណើរដោយលោក ឃ្លោក នួយ អភិបាលរងខេត្ត តំណាងឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ប្រធានមន្ទីកសិកម្ម រុក្ខប្រមាញ់ និងនេសាទខេត្ត អញ្ជើញចុះមើលការបង្កបង្កើនផលស្រូវ ព្រមទាំងបានជួបសំណេះសំណាលជាមួយរបស់បងប្អូនប្រជាកសិក ដែលកំពុងប្រមូលផលស្រូវ នៅក្នុងភូមិសាស្រ្តស្រុកភ្នំស្រុក ខេត្តបន្ទាយមានជ័យ។

នាឱកាសនោះ ឯកឧត្តម ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ក៏បានណែនាំដល់កសិករត្រូវជ្រើសរើសប្រើប្រាស់ពូជស្រូវសុទ្ធ ពូជស្រូវល្អ ដូចជាសែនក្រអូប និងផ្ការំដួល ដែលជាពូជស្រូវយុទ្ធសាស្ត្ររបស់ខ្មែរ ដើម្បីទទួលបានទន្និផលខ្ពស់ និងមានតម្រូវការទីផ្សារ។

ឯកឧត្តមបានបញ្ជាក់ថា ការជ្រើសរើសពូជស្រូវសុទ្ធ ដូចជាសែនក្រអូប និងផ្ការំដួល គឺជួយដល់កសិករ ទទួលបានទន្និផលនិងបង្កើនផលចំណេញសម្រាប់កសិករ មួយវិញទៀតវាក៏មានតម្រូវទីផ្សារ និងមានតម្លៃល្អផងដែរ។

ក្រៅពីការចុះពិនិត្យមើលការបង្កបង្កើនផលស្រូវរបស់កសិករ ឯកឧត្តម រដ្ឋមន្ត្រី ក្រសួងកសិកម្ម ក៏បានចុះពិនិត្យមើលស្ថានភាពភូមិសាស្រ្តនៅតាមបន្ទាត់ព្រំដែន ដោយឯកឧត្តម រួមនឹងប្រតិភូអមដំណើរការចុះពិនិត្យមើលនៅតាមបន្ទាត់ព្រំដែនផ្តោតសំខាន់លើប៉ូលសេដ្ឋកិច្ចទី៤ រួមមាន ខេត្តបន្ទាយមានជ័យ បាត់ដំបង ពោធិ៍សាត់ និងខេត្តបៃលិន ពិនិត្យមើលយុទ្ធសាស្រ្តនៃការនាំចេញ -ចូលតាមព្រំដែន ពិសេសផ្តោសំខាន់ លើផលិតផលកសិកម្មដែល
កសិករផលិតបាន ដើម្បីធ្វើការនាំចេញទៅក្រៅប្រទេស។

យោងតាមរបាយការណ៍របស់មន្ទីកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ ក្នុងឆ្នាំ២០២៣ ការងារដាំដុះដំណាំកសិកម្ម ដំណាំស្រូវរដូវវស្សា ផែនការដាំដុះ ២៥២ ៣២០ ហិកតា , ភ្ជួររាស់បានសរុប ២៥៥ ៣៤១ ហិកតា, ដាំដុះសរុប ២៥២ ១៦៣៦ ហិកតា, ការប្រមូលផលស្រូវសរុប ២២៦៧៤៥ហិកតា ស្មើនឹង១០០% នៃផែនការបរិមាណ ផលសរុប៧៦៨៧២៥តោន។ ដោយឡែកដំណាំស្រូវដូវប្រាំង ផែនការដាំដុះមានចំនួន២២ ០០០ ហិតតា, ភ្ជួររាស់បានសរុប ៥២ ៣៩៩ ហិកតា។ ដាំដុះសរុប ៥២ ៣៩៩ហិកតា ស្មើនឹង ២៣៨,១៨ភាគរយនៃផែនការ៕