រដ្ឋលេខាធិការក្រសួងការបរទេស ទទួលជួបពិភាក្សាការងារទ្វេភាគីជាមួយ អនុរដ្ឋមន្រ្តីការបរទេសឥណ្ឌូនេស៊ី

ភ្នំពេញ៖ លោកជំទាវបណ្ឌិត សឿង រដ្ឋចាវី ក្រសួងការបរទេស និងសហប្រតិបត្តិការអន្តរជាតិ តំណាងដ៏ខ្ពង់ខ្ពស់របស់ ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ នារសៀលថ្ងៃទី១៥ ខែសីហា ឆ្នាំ២០២៣ បានទទួលជួបពិភាក្សាការងារទ្វេភាគីជាមួយឯកឧត្តម Pahala Nugraha Mansury អនុរដ្ឋមន្រ្តីការបរទេសឥណ្ឌូនេស៊ី នៅទីស្តីការក្រសួង។

នៅក្នុងជំនួបនេះ ឯកឧត្តមអនុរដ្ឋមន្រ្តីឥណ្ឌូនេស៊ី បានអបអរសាទរយ៉ាងកក់ក្ដៅចំពោះជោគជ័យរបស់កម្ពុជាក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧ និងបានបញ្ជាក់អំពីការគាំទ្រយ៉ាងពេញលេញរបស់រដ្ឋាភិបាលឥណ្ឌូនេស៊ីក្នុងការបន្តធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជាអាណត្តិថ្មី។

ដោយផ្ដល់សារសំខាន់លើសន្តិសុខស្បៀងរបស់ប្រទេសទាំងពីរ និងតំបន់ ឯកឧត្តម Pahala Nugraha Mansury បានបញ្ជាក់ជូនថា ភាគីឥណ្ឌូនេស៊ីមានបំណងនាំចូលអង្ករពីកម្ពុជា និងនាំចេញជីកសិកម្មមកកម្ពុជា ក្នុងក្របខ័ណ្ឌនៃកិច្ចព្រមព្រៀងរវាងរដ្ឋាភិបាល និងរដ្ឋាភិបាល និងធុរកិច្ច និងធុរកិច្ច។

ភាគីទាំងពីរសម្តែងការពេញចិត្តចំពោះវឌ្ឍនភាពនៃទំនាក់ទំនងទ្វេភាគី ដែលបានបន្តរីកចម្រើនកាន់តែខ្លាំងលើគ្រប់វិស័យ និងបានឯកភាពបន្តពង្រឹងកិច្ចសហប្រតិបត្តិការលើវិស័យសំខាន់ៗ រួមមាន សន្តិសុខ-នយោបាយ ពាណិជ្ជកម្ម ទេសចរណ៍ អប់រំ សុខាភិបាល និងកសិកម្ម។ ភាគីកម្ពុជាបានថ្លែងអំណរគុណយ៉ាងជ្រាលជ្រៅចំពោះឥណ្ឌូនេស៊ីក្នុងការជួយអភិវឌ្ឍន៍ធនធានមនុស្ស និងស្វាគមន៍បំណងរបស់ឥណ្ឌូនេស៊ីក្នុងការផ្ដល់ការកសាងសមត្ថភាពនៅក្នុងវិស័យដែលពាក់ព័ន្ធនឹងកសិកម្ម ដូចជាការគ្រប់គ្រងប្រព័ន្ធធារាសាស្ត្រ និងនេសាទ រួមទាំងផ្នែកវារីវប្បកម្ម។

ភាគីទាំងពីរក៏បានពិភាក្សាអំពីការត្រៀមរៀបចំកិច្ចប្រជុំរវាងឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីកម្ពុជា និងឯកឧត្តមប្រធានាធិបតី ចូកូ​ វីដូដូ ក្នុងឱកាសនៃកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ នៅហ្សាការតា និងកិច្ចប្រជុំលើកទី៥របស់គណៈកម្មការចម្រុះសម្រាប់កិច្ចសហប្រតិបត្តិការទ្វេភាគីរវាងកម្ពុជា-ឥណ្ឌូនេស៊ី (JCBC) នៅត្រីមាសទី៤ ឆ្នាំ២០២៣ ៕