នាយឧត្តមសេនីយ៍ គៀត ច័ន្ទថារិទ្ធ ដឹកនាំគណៈប្រតិភូ ចូលរួមកិច្ចប្រជុំអគ្គនាយកអន្តោប្រវេសន៍ និងប្រធានកុងស៊ុលអាស៊ាន លើកទី២៦ និងកិច្ចប្រជុំពាក់ព័ន្ធ នៅខេត្តភូកេត ប្រទេសថៃ

ភ្នំពេញ៖ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ នៅថ្ងៃពុធ ៨រោច ខែទុតិយាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៩ ខែសីហា ឆ្នាំ២០២៣ បានដឹកនាំគណៈប្រតិភូ ចូលរួមកិច្ចប្រជុំអគ្គនាយកអន្តោប្រវេសន៍ និងប្រធានកុងស៊ុលអាស៊ាន លើកទី២៦ (26th DGICM) និងកិច្ចប្រជុំពាក់ព័ន្ធ ចាប់ពីថ្ងៃទី៩ ដល់ថ្ងៃទី១០ ខែសីហា ឆ្នាំ២០២៣ នៅខេត្តភូកេត ប្រទេសថៃ។

បន្ទាប់មក កិច្ចប្រជុំបានចាប់ផ្តើមដំណើរការតាមកម្មវិធី ដោយផ្តើមពីពិធីប្តូរវេនប្រធានកិច្ចប្រជុំ DGICM ពីអគ្គនាយកអន្តោប្រវេសន៍សិង្ហបូរី ទៅអគ្គនាយកអន្តោប្រវេសន៍ថៃ ដែលមានឯកឧត្តម ឧត្តមសេនីយ៍ឯក Phakphumphiphat Sujjapan អគ្គស្នងការនៃការិយាល័យអន្តោប្រវេសន៍ថៃ ជាប្រធានកិច្ចប្រជុំ 26th DGICM ក្នុងឆ្នាំនេះ ដោយមានការអញ្ជើញចូលរួមពីតំណាងស្ថាប័នអន្តោប្រវេសន៍ និងកុងស៊ុលនៃបណ្តាប្រទេសជាសមាជិកអាស៊ាន និងលេខាធិការដ្ឋានអាស៊ាន។

សូមជម្រាបជូនថា កិច្ចប្រជុំ DGICM នេះត្រូវបានរៀបចំឡើងជាប្រចាំឆ្នាំ ក្នុងគោលបំណងដើម្បីជំរុញកិច្ចសហប្រតិបត្តិការទាំងក្នុងតំបន់ និងអន្តរជាតិ លើការងារអន្តោប្រវេសន៍ និងដើម្បីពង្រឹងសន្តិសុខព្រំដែនក្នុងចំណោមបណ្តាប្រទេសជាសមាជិកអាស៊ាន តាមរយៈការចែករំលែកព័ត៌មានដែលត្រូវបានវាយតម្លៃថា មានហានិភ័យ និងព័ត៌មានពាក់ព័ន្ធនឹងឯកសារធ្វើដំណើរក្លែងក្លាយ ដែលត្រូវរកឃើញនៅតាមបណ្តាច្រកទ្វារ។ គួរបញ្ជាក់ថា កិច្ចប្រជុំបានបន្តពិនិត្យ និងពិភាក្សាតាមរបៀបវារៈ ដែលសមាជិកបានឯកភាពក្នុងកិច្ចប្រជុំកាលពីពេលព្រឹកផងដែរ ៕