ឯកឧត្តម ហ៊ុន ម៉ានី៖ ការបោះឆ្នោតមួយសន្លឹកជូនគណបក្សប្រជាជន ស្មើនឹងការបោះឆ្នោតជូនដល់ការរីកចម្រើន នៃជីវភាពរស់នៅរបស់ខ្លួនឯង និងក្រុមគ្រួសារ
ភ្នំពេញ៖ ឯកឧត្តម ហ៊ុន ម៉ានី អនុប្រធានទី០១ ក្រុមការងារគណបក្សចុះជួយខេត្តកំពង់ស្ពឺ និងជាអ្នកតំណាងរាស្រ្តមណ្ឌលខេត្តកំពង់ស្ពឺ មានប្រសាសន៍ថា ការបោះឆ្នោតមួយសន្លឹកជូនគណបក្សប្រជាជនកម្ពុជា ស្មើនឹងការបោះឆ្នោតជូនដល់ការរីកចម្រើន នៃជីវភាពរស់នៅរបស់ខ្លួនឯង និងក្រុមគ្រួសារ។
ឯកឧត្តម ហ៊ុន ម៉ានី មានប្រសាសន៍បែបនេះក្នុងឱកាសអញ្ជើញជួបសំណេះសំណាលជាមួយ សមាជិក សមាជិកា គណបក្សប្រជាជនកម្ពុជា ក្នុងយុទ្ធនាការឃោសនារកសំឡេងឆ្នោត នៅឃុំជង្រុក ស្រុកគងពិសី ខេត្តកំពង់ស្ពឺ នាព្រឹកថ្ងៃទី០៦ ខែកក្កដា ឆ្នាំ២០២៣។
ឯកឧត្តម ហ៊ុន ម៉ានី បានបន្តថា ការបោះឆ្នោតជូនគណបក្សប្រជាជនកម្ពុជា គឺជាការធានាដល់ការងារ និងការថែរក្សាអត្ថប្រយោជន៍របស់បងប្អូន កម្មករ កម្មការិនី នៅដដែល។ លើសពីនេះទៅទៀតនោះ បងប្អូនកម្មករ កម្មការិនីក៏អាចទទួលបាននូវកំណើនអត្ថប្រយោជន៍នានា ចេញពីការងាររបស់បងប្អូនជាបន្តបន្ទាប់ដូចអ្វីដែលបងប្អូនទទួលបានកន្លងមកហើយ សូម្បីតែក្នុងកាលៈទេសៈនៃការរីករាលដាលជំងឺកូវីដ១៩ ក៏រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា ព្យាយាមរក្សានូវ អត្ថប្រយោជន៍ជូនបងប្អូនឲ្យបានល្អប្រសើរផងដែរ។
ឯកឧត្តមបានបន្ថែមថា ការឈ្នះរបស់គណបក្សប្រជាជនកម្ពុជា និងធានាដល់ការបន្តបេសកកម្មក្នុងការបម្រើ និងការពារផលប្រយោជន៍ជូនជាតិ និងប្រជាជន។ ជាមួយគ្នានោះ ឯកឧត្តម ក៏បានអំពាវដល់សមាជិក សមាជិកាទាំងអស់ យកចិត្តទុកដាក់ចំពោះការគូសសន្លឹកឆ្នោតឲ្យបានត្រឹមត្រូវ ជៀសវាងការធ្វេសប្រហែសណាមួយដែលបណ្តាលឲ្យសន្លឹកឆ្នោតរបស់យើងមិនអាចយកជាការបាន ឬជាសន្លឹកឆ្នោតដែលមិនបានការ ។ ទន្ទឹមនឹងនេះ ឯកឧត្តមបានរំលឹកដល់សមាជិក សមាជិកា អោយភ្ជាប់នូវឯកសារ ២ ដែលអាចយកទៅបោះឆ្នោតគឺ៖ អត្តសញ្ញាណប័ណ្ណសញ្ជាតិខ្មែរ ឬ ឯ.អ. ឯកសារបញ្ជាក់អត្តសញ្ញាណផងដែរ ៕
