ឯកឧត្ដម សក់ សេដ្ឋា អញ្ជើញសំណេះសំណាល និងពិសាបាយសាមគ្គី ជាមួយនិស្សិតអាហារូបករណ៍សម្តេចតេជោ និងសម្តេចកិត្តិព្រឹទ្ធបណ្ឌិត ក្នុងស្រុកបវេល
ភ្នំពេញ៖ ឯកឧត្ដម សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកបវេល ខេត្តបាត់ដំបង កាលពីថ្ងៃទី១០ ខែមិថុនា ឆ្នាំ២០២៣ បានអញ្ជើញអញ្ជើញជាអធិបតីភាព សំណេះសំណាល និងពិសាបាយសាមគ្គីជាមួយ និស្សិតអាហារូបករណ៍សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ក្នុងស្រុកបវេល ខេត្តបាត់ដំបង ចំនួន ៦៥នាក់ ដែលកំពុងសិក្សានៅសាកលវិទ្យាល័យ និងវិទ្យាស្ថាននានាក្នុងក្រុងបាត់ដំបង ។
ពិធីនេះត្រូវបានធ្វើឡើងកាលពីថ្ងៃទី១០ ខែមិថុនា ឆ្នាំ២០២៣ នៅឯសាលចំរើនសិរីមង្គល ក្រុងបាត់ដំបង ដោយមានការអញ្ជើញចូលរួមពីឯកឧត្តម អ៊ុយ រី ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលអភិបាលខេត្តផងដែរ ។
ថ្លែងនាឱកាសនោះឯកឧត្ដម សក់ សេដ្ឋា បានមានប្រសាសន៍ថា ខេត្តបាត់ដំបងជាខេត្តដែលមានសក្ដានុពលខាងផ្នែកកសិកម្ម ទន្ទឹមនឹងនោះដែរ ខេត្តក៏កំពុងមានតម្រូវការជាច្រើនខាងផ្នែកនេះ ដោយទាមទារឱ្យអ្នកវិនិយោគក្នុងស្រុក និងក្រៅស្រុក ចាប់អារម្មណ៍វិនិយោគផ្នែកកសិឧស្សាហកម្ម ដូចជាការកែច្នៃផ្លែឈើ ការយកផលិតផលកសិកម្មយកទៅកែច្នៃ ដើម្បីធ្វើការលក់ និងនាំចេញទៅក្រៅប្រទេស ព្រោះសព្វថ្ងៃនេះផលិតផលកសិកម្មជាច្រើន នៅមិនទាន់បានយកមកកែច្នៃអស់លទ្ធភាពនៅឡើយទេ ធ្វើឱ្យផលិតផលទាំងនោះលើសតម្រូវការទីផ្សារ បណ្ដាលឱ្យមានការធ្លាក់ថ្លៃផងដែរ ។ មិនត្រឹមតែវិស័យកសិកម្មប៉ុណ្ណោះទេ ក្នុងនោះវិស័យទេសចរណ៍ក៏សំខាន់ផងដែរ។
ឯកឧត្តមបានបន្តថា វិស័យទេសចរណ៍ក៏ជាវិស័យអាទិភាពមួយ ក្នុងចំណោមវិស័យផ្សេងនៅខេត្តបាត់ដំបង ក៏ប៉ុន្តែសម្រាប់វិស័យសណ្ឋាគារ ឬផ្ទះសំណាក់ជាដើម ហាក់បីដូចជានៅមិនទាន់មានច្រើននៅឡើយ ដោយយើងត្រូវការអ្នកវិនិយោគជាច្រើន បោះទុនវិនិយោគវិស័យសណ្ឋាគារ ផ្ទះសំណាក់ Resortបន្ថែមទៀត ដើម្បីត្រៀមរង់ចាំទទួលទេសចរដែលនឹងមកទស្សនាកំសាន្ដខេត្តបាត់ដំបងនាពេលខាងមុខផងដែរ ។
ឯកឧត្ដមបន្ថែមថា បរទេសវាយតម្លៃ និងផ្ដល់ភាពជាគំរូមួយដល់ខេត្តបាត់ដំបង ដែលថា បាត់ដំបងជាខេត្តមានមូលដ្ឋានសេដ្ឋកិច្ចរឹងមាំ ជាងខេត្តណាៗទាំងអស់ ។
ជាមួយគ្នានោះឯកឧត្ដម សក់ សេដ្ឋា បានគូសបញ្ជាក់ថា គ្រប់បណ្ដាប្រទេសបានចាត់ទុក ការអភិវឌ្ឍន៍ធនធានមនុស្ស ជាកត្តាដ៏សំខាន់បំផុត សម្រាប់នាំប្រទេសជាតិ ទៅកាន់ភាពរីកចម្រើនជឿនលឿន ។
លើសពីនេះឯកឧត្ដមបានក្រើនរំលឹកដល់សិស្សនិស្សិតក្នុងពិធីនោះថា មុខវិជ្ជាវិទ្យាសាស្ត្របច្ចេកទេស នៅតែជាមុខវិជ្ជាដែលងាយនឹងរកការងារធ្វើ ខណៈអ្នកមានលើពិភពលោក ក៏ផ្ដើមចេញពីអ្នកដែលរកស៊ីលក់ខាងបច្ចេកវិទ្យាដែរ ។
ឯកឧត្ដម សក់ សេដ្ឋា ថ្លែងថា គ្រឿងញៀន នៅតែជាបញ្ហាប្រឈម ដែលរាជរដ្ឋាភិបាលត្រូវបន្តខិតខំដោះស្រាយ ។ ឯកឧត្ដមថា បញ្ហាគ្រឿងញៀនបើយើងមើលទៅ គឺមិនទាន់ស្រាកស្រាននៅឡើយទេ ដែលក្មួយៗនិស្សិតទាំងអស់ ត្រូវចូលរួមជាមួយរាជរដ្ឋាភិបាល ជាមួយអាជ្ញាធរមានសមត្ថកិច្ច ទៅលើបញ្ហាគញរឿងញៀននេះ ។
បន្ថែមលើសពីនេះឯកឧត្ដមរដ្ឋលេខាធិការ ក៏បានស្នើឲ្យសាកលវិទ្យាល័យ និងវិទ្យាស្ថាននានា ជួយទំនុបបម្រុង ផ្ដល់ឱកាស សំខាន់ការអប់រំជួយតម្រង់ទិសសម្រាប់ការសិក្សារៀនសូត្រ ដល់ក្មួយៗនិស្សិត ព្រោះក្មួយជាអ្នកបន្តវេនក្នុងការចូលរួម កសាងអភិវឌ្ឍន៍ប្រទេសជាតិឲ្យកាន់តែរីកចម្រើនជឿនលឿនតទៅមុខទៀត ។
ឯកឧត្ដម សក់ សេដ្ឋា បានលើកឡើងថា មិនមែនតារាចម្រៀងទាំងអស់សុទ្ធតែល្បីនោះទេ ហើយតារាចម្រៀង វណ្ណដា ជាឧទាហរណ៍មួយនៃយុវជនសម័យថ្មី ក្នុងការចាប់យកឱកាសការងារ ឲ្យត្រូវតាមចំណេះជំនាញរបស់ខ្លួន ។ ឯកឧត្ដមថា វណ្ណដាបានប្រើទេពកោសល្យរបស់ខ្លួន ក្នុងការផលិតបទចម្រៀង ដែលទទួលបានការគាំទ្រពីប្រជាជន ពិសេសស្រទាប់យុវវ័យ ។ ឯកឧត្ដមចាត់ទុកថាវណ្ណដាជាអ្នកជោគជ័យមួយ ប៉ុន្តែបើគ្មានចំណេះជំនាញ សីលធម៌ ចរិយាធម៌ និងវិន័យ ក៏គ្មានជោគជ័យណាមួយកើតឡើងដែរ ៕
