បណ្ឌិត ហ៊ុន ម៉ាណែត៖ ជំរំទ័ពទេវតា ដែលមានទ័ពស្រួចជាយុវជន បានមកចូលរួមយ៉ាងច្រើនកុះករ គឺដោយសារមានបេះដូងស្រឡាញ់គាំទ្រ និងជឿជាក់លើការដឹកនាំរបស់បក្ស

ភ្នំពេញ៖ ឯកឧត្តមបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល បានថ្លែងថា ជំរំទ័ពទេវតា ដែលមានទ័ពស្រួចជាយុវជនសកម្មជនបក្សបានមកចូលរួមយ៉ាងច្រើនកុះករ គឺដោយសារមានបេះដូងស្រឡាញ់គាំទ្របក្ស និងជឿជាក់លើការដឹកនាំរបស់បក្ស និងការ បានឃើញជាក់ស្តែងនូវសមិទ្ធផលដែលបក្សបានខិតខំកសាងឡើងក្នុងរយៈកាលកន្លងមកនេះ ជាពិសេសទំនុកចិត្តក្នុងការផ្ញើជោគវាសនាលើការដឹកនាំរបស់បក្សទាំងសម្រាប់បច្ចុប្បន្ន និងអនាគត។

ក្នុងពិធីសំណេះសំណាលជាមួយក្រុមការងារយុវជនគណបក្សប្រជាជនកម្ពុជាខេត្តកំពង់ធំ នាថ្ងៃទី១០ ខែមិថុនា ឆ្នាំ២០២៣ ឯកឧត្តមបណ្ឌិត ហ៊ុន ម៉ាណែត បានបញ្ជាក់ថា ភាពជោគជ័យរបស់គណបក្សប្រជាជនកម្ពុជា គឺអាស្រ័យនឹងកត្តា ២ យ៉ាង៖ ទី១. តួអង្គបេក្ខភាពនាយករដ្ឋមន្ត្រីជា សម្តេចតេជោ ពីព្រោះជាតួអង្គដែលប្រជាពលរដ្ឋស្គាល់ច្បាស់ និងជឿទុកចិត្ត ដោយតែងបានចងចាំក្នុងចិត្តជាប់រហូតមកថា ជាអ្នកសង្គ្រោះជីវិត, ការពារជីវិត និងរំដោះប្រទេសឱ្យរួចផុតពីសង្គ្រាម ដោយបាននាំកម្ពុជាមកកាន់ត្រើយសន្តិភាព សុភមង្គល និងការអភិវឌ្ឍលើគ្រប់វិស័យ និងទី២. គឺកិច្ចខិតខំប្រឹងប្រែងរបស់ថ្នាក់ដឹកនាំបក្សគ្រប់លំដាប់ថ្នាក់ ព្រមទាំងស្នាដៃសមិទ្ធផលជាច្រើន ដែលគណបក្សប្រជាជនកម្ពុជាបានកសាងជូនជាតិ និងប្រជាជន ៕