ឯកឧត្តម នេត្រ ភក្រ្តា៖ ការបង្កើតនូវវត្តមានសត្វព្រៃនៅក្នុងតំបន់អង្គរ គឺជាផ្នែកមួយនៃការបង្កើនរបាយសត្វព្រៃនៅក្នុងតំបន់ព្រៃរបស់ប្រទេសកម្ពុជា
ឯកឧត្តម នេត្រ ភក្រ្តា រដ្ឋលេខាធិការក្រសួងបរិស្ថាន និងអ្នកដឹកនាំយុទ្ធនាការអន្ទាក់សូន្យ បានលើកឡើងថា ក្នុនាមរាជរដ្ឋាភិបាលកម្ពុជា ក៏ដូចជាក្នុងនាមក្រសួងបរិស្ថាន ដូចយើងបានដឹងស្រាបហើយថាតំបន់អង្គរគឺជារមណីយដ្ឋានមួយ ហើយវាក៏ជាឧទ្យានជាតិទីមួយក្នុងតំបន់អាសុីអាគ្នេយ៍ដែលបានបង្កើតឡើងតាំងពីឆ្នាំ១៩២៥មក ហើយអ្វីដែលការបង្កើតនូវវត្តមានសត្វព្រៃនៅក្នុងតំបន់អង្គរនេះគឺជាផ្នែកមួយនៃការបង្កើនរបាយសត្វព្រៃនៅក្នុងតំបន់ព្រៃរបស់ប្រទេសកម្ពុជា។
ឯកឧត្តម នេត្រ ភក្រ្តា បានលើកឡើងបែបនេះក្នុងដំណើរទស្សនកិច្ចនៅតំបន់ឧទ្យានជាតិអង្គរ ក្នុងខេត្តសៀមរាប កាលពីថ្ងៃទី០១ ខែមិថុនា ឆ្នាំ២០២៣។
ឯកឧត្តមរដ្ឋលេខាធិការ បានបន្តថា ការដែលយើងអាចបង្កើតនូវវត្តមានសត្វព្រៃនេះគឺ៖
ទី១.ដោយសារប្រទេសកម្ពុជារបស់យើងមានសុខសន្តិភាពពេញលេញ ដែលយើងអាចមានឱកាសក្នុងការគិតគូរទៅលើការងារការពារអភិរក្ស។
ទី២.តំបន់អង្គរគឺជាតំបន់មួយដែលយើងយល់ថាជាតំបន់ដែលមានសុវត្ថិភាពខ្ពស់ ដោយសារតែមានការគ្រប់គ្រង និងអភិរក្សពីអាជ្ញាធរជាតិអប្សរាដែលបានឈរជើងការពារនូវកន្លែងនេះ។
ឯកឧត្តមរដ្ឋលេខាធិការ បានបន្ថែមថា ចឹងហើយបានជាអង្គការសម្ព័ន្ធមិត្តសត្វព្រៃ ក៏ដូចជាអាជ្ញាធរជាតិអប្សរា សហការគ្នានូវក្នុងលែងសត្វព្រៃមួយចំនួន។ ហើយប្រភេទសត្វដែលយើងបានលែងនេះគឺមួយចំនួនយកមកពីមជ្ឈមណ្ឌលសង្រ្គោះសត្វព្រៃភ្នំតាម៉ៅដែលលែងនៅទីនេះ។
ឯកឧត្តមរដ្ឋលេខាធិការ បានបន្ថែមទៀតថា តារយៈជាលទ្ធផលយើងឃើញថា កិច្ចសហការរវាងអាជ្ញាធរជាតិអប្សរាជាមួយអង្គការសម្ព័ន្ធមិត្តសត្វព្រៃ ការលែងសត្វទោចចំនួន ៤គូ ស្មើនឹង ៨ក្បាល រហូតមកដល់ពេលនេះគឺវាបានកើតកូនបានរហូតទៅដល់ ៧ក្បាល។
ឯកឧត្តម នេត្រ ភក្រ្តា បានបញ្ជាក់ថា សត្ដែលយើងបានលែងនៅកន្លែងនេះ យើងជឿជាក់ថាវាមានសុវត្ថិភាព ហើយអ្វីដែលយើងខិតខំប្រឹងប្រែងបន្ថែមទៀតគឺការការពារជម្រករបស់វាឲ្យមានសុវត្ថិភាព។ ទន្ទឹមនឹងនេះ ដើម្បីការពារឲ្យសត្វនៅក្នុងព្រៃវាអាចមានលទ្ធភាពក្នុងការបន្តកំណើតកើតឲ្យបានច្រើន ហើយមានសុវត្ថិភាព យើងបានធ្វើយុទ្ធនាការអន្ទាក់សូន្យ ដើម្បីអប់រំផ្សព្វផ្សាយទៅដល់ប្រជាពលរដ្ឋឲ្យពួកគាត់មានការយល់ដឹងអំពីផលប៉ះពាល់ដែលកើតចេញពីអន្ទាក់។
ឯកឧត្តម នេត្រ ភក្រ្តា រដ្ឋលេខាធិការ បានជម្រាបជូនថា ពាក់ព័ន្ធជាមួយនិងការអនុវត្តច្បាប់ ឥឡូវនេះរដ្ឋសភាបាននិងកំពុងពិនិត្យហើយបានអនុម័តនូវក្រមបរិស្ថាន និងធនធានធម្មជាតិ ដែលជាផ្នែកមួយយ៉ាងសំខាន់នូវក្នុងការពង្រឹងទៅលើវិធានការនៃការគ្រប់គ្រង និងអភិរក្សសត្វព្រៃ។
ជាចុងក្រោយ ឯកឧត្តម នេត្រ ភក្រ្តា បានថ្លែងអំណរគុណចំពោះអាជ្ញាធរជាតិអប្សរា ក៏ដូចជាអង្គការសម្ព័ន្ធមិត្តសត្វព្រៃ(WA) ដែលបានសហការគ្នានៅក្នុងការបង្កើតនូវវត្តមានសត្វព្រៃនៅក្នុងតំបន់អង្គរនេះ ៕
