ព្រឹកស្អែក យុទ្ធនាការអន្ទាក់សូន្យ ដំណាក់កាលទី២ ចាប់ផ្តើមនៅខេត្តសៀមរាប ខណៈភោជនីយដ្ឋានចំនួន១០ បន្ថែមទៀតប្តេជ្ញាមិនលក់សាច់សត្វព្រៃ
ភ្នំពេញ៖ ក្រសួងបរិស្ថាន អង្គការសង្គមស៊ីវិល មន្រ្តីអាជ្ញាធរមូលដ្ឋាន សហគមន៍មូលដ្ឋាន និងភាគីដៃគូពាក់ព័ន្ធ នៅព្រឹកថ្ងៃទី២ ខែមិថុនា ឆ្នាំ២០២៣ ស្អែកនេះ បានរួមគ្នាបើកយុទ្ធនាការអន្ទាក់សូន្យ ដំណាក់កាលទី២ នៅខេត្តសៀមរាប។ ក្នុងយុទ្ធនាការនេះដែរ គេរំពឹងថា នឹងជួយជំរុញបន្ថែមទៀត ក៏ដូចជាបំផុសចលនាប្រជាពលរដ្ឋ ឱ្យបញ្ឈប់ការដាក់អន្ទាក់សម្លាប់សត្វព្រៃ និងបញ្ឈប់ការបរិភោគសាច់សត្វព្រៃ។
ក្នុងសន្និសីទសារព័ត៌មានស្តីពី យុទ្ធនាការអន្ទាក់សូន្យ ដំណាក់កាលទី២ នៅខេត្តសៀមរាប នារសៀលថ្ងៃទី១ ខែមិថុនា ឆ្នាំ២០២៣ នៅមន្ទីរបរិស្ថានខេត្ត ឯកឧត្តម នេត្រ ភក្រ្តា រដ្ឋលេខាធិការក្រសួងបរិស្ថាន និងជាអ្នកដឹកនាំយុទ្ធនាការអន្ទាក់សូន្យ បានមានប្រសាសន៍ថា តាមរយៈការធ្វើយុទ្ធនាការអន្ទាក់សូន្យ ដំណាក់កាលទី២នេះ យ៉ាងហោចណាស់ ក៏មានភោជនីយដ្ឋានចំនួន១០ នៅខេត្តសៀមរាប បានប្តេជ្ញាមិនលក់ សាច់សត្វព្រៃ។ ការចូលរួមពីសំណាក់ ម្ចាស់ភោជនីយដ្ឋាន គឺជាផ្នែកមួយយ៉ាងសំខាន់ ក្នុងការទប់ស្កាត់ ការសម្លាប់សត្វព្រៃ ក៏ដូចជាការចូលរួមកាត់បន្ថយដាក់អន្ទាក់ ក្នុងតំបន់ធម្មជាតិ។
ជាមួយគ្នានេះ ឯកឧត្តមរដ្ឋេលេខាធិការ បានបន្តថា ការចូលរួមពីសំណាក់បងប្អូនប្រជាពលរដ្ឋ គឺជាចលករមួយយ៉ាងសំខាន់ ក្នុងការអភិរក្សសត្វព្រៃ ឱ្យបានគង់វង្ស យូរអង្វែង តរៀងទៅ។
លោក ស៊ុន គង់ ប្រធានមន្ទីរបរិស្ថានខេត្តសៀមរាប បានបញ្ជាក់ថា ខេត្តសៀមរាប មានផ្ទៃដីប្រព័ន្ធតំបន់ការពារធម្មជាតិ សរុបប្រមាណ ២៨១.៥៣០ហិចតា ដែលតំបន់ការពារធម្មជាតិទាំងនោះរួមមាន៖
១-ឧទ្យានជាតិព្រះជ័យវរ្ម័ន-នរោត្តម «ភ្នំគូលែន»
២-ដែនជម្រកសត្វព្រៃបឹងពែរ
៣-ដែនជម្រកសត្វព្រៃគូលែន-ព្រហ្មទេព
៤-ដែនជម្រក សត្វព្រៃភ្នំត្នោត-ភ្នំពក
៥-តំបន់ការពារទេសភាពអង្គរ
៦-តំបន់ការពារទេសភាពទំនាប ខាងជើងបឹងទន្លេសាប
៧-តំបន់ប្រើប្រាស់ច្រើនយ៉ាង បឹងទន្លេសាប
៨-តំបន់ រ៉ាមសារ បឹងទន្លេឆ្មារ ដែលមាន ៤ ការិយាល័យសម្រាប់ធ្វើការគ្រប់គ្រងរួមមាន៖ ទី១.ការិយាល័យឧទ្យានជាតិ, ទី២.ការិយាល័យដែនជម្រកសត្វព្រៃ, ទី៣.ការិយាល័យ ការពារទេសភាព និងទី៤.ការិយាល័យតំបន់ប្រើប្រាស់ច្រើនយ៉ាង ដែលមានមន្ត្រី ឧទ្យានុរក្សចំនួន១០១នាក់ /ស្ត្រី៥នាក់ មានស្នាក់ការ និងស្នាក់ការរង ចំនួន ២៦ស្នាក់ការ។
លោកប្រធានមន្ទីរ បានបន្ថែមថា តាមការអង្កេត សិក្សាស្រាវជ្រាវ មានប្រភេទសត្វព្រៃនៅក្នុងតំបន់ការពារធម្មជាតិ ភូមិសាស្ត្រខេត្តសៀមរាប បាននឹងកំពុងថយចុះ គួរឱ្យព្រួយបារម្ភ។ ប្រភេទសត្វព្រៃមួយចំនួនដូចជា៖ ទន្សោង, សត្វកែះ, ទោច, ខ្លាឃ្មុំ, ប្រើស, ពង្រូល និងសត្វស្លាប កំពុងទទួលរងការគំរាមកំហែង និងបានចាត់ទុកជាប្រភេទសត្វកម្រ និងជិតផុតពូជ ក្នុងបញ្ជីក្រហម IUCN ។
ឯកឧត្តម ឃឹម ហ្វីណង់ អភិបាលរងខេត្តសៀមរាប បានមានប្រសាសន៍ថា ការបរិភោគសាច់សត្វព្រៃ គឺជារឿងមួយមិនល្អសោះឡើយ ពិសេសនៅខេត្តសៀមរាប ដែលជាតំបន់ទេសចរណ៍ដ៏សំខាន់មួយ ក្នុងប្រទេសកម្ពុជា។ យើងត្រូវបញ្ចប់ការដាក់អន្ទាក់ និងបញ្ឈប់ ការបរិភោគសាច់សត្វព្រៃ។
ទន្ទឹមជាមួយគ្នានេះ ឯកឧត្តមអភិបាលរងខេត្ត បានមានប្រសាសន៍បន្តថា បើយើងមិនបានរឹតបន្តឹង ពាក់ព័ន្ធទៅនឹងការដាក់អន្ទាក់នោះទេ វាហាក់បីដូចជាមិនមានប្រសិទ្ធភាព ក្នុងការអនុវត្តនោះឡើយ។ យើងត្រូវជំរុញយុទ្ធនាការនេះ ឱ្យមានប្រសិទ្ធភាព និងរួមគ្នាបំផុសចលនាឱ្យទទួល បានប្រសិទ្ធភាព កាន់តែប្រសើរ នៅថ្ងៃខាងមុខ។
គួរជម្រាបផងដែរថា ខេត្តគោលដៅសម្រាប់យុទ្ធនាការអន្ទាក់សូន្យ ក្នុងដំណាក់កាលទី២ នេះរួមមាន៖ ខេត្តពោធិ៍សាត់, កំពង់ស្ពឺ, កោះកុង, សៀមរាប, បាត់ដំបង និងខេត្តប៉ៃលិន ៕
