សម្តេចតេជោ ហ៊ុន សែន៖ មានមន្ទីរពេទ្យល្អហើយ តែអ្វីដែលត្រូវល្អសំខាន់ទៅទៀតនោះ គឺត្រូវមានគ្រូពេទ្យល្អ ទើបអាចដោះស្រាយបានបញ្ហា
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានថ្លែងថា ឥលូវនេះ យើងមានមន្ទីរពេទ្យល្អហើយ តែអ្វីដែលត្រូវល្អសំខាន់ទៅទៀតនោះ គឺត្រូវមានគ្រូពេទ្យល្អ ទើបអាចដោះស្រាយបានបញ្ហា ។
ក្នុងឱកាសអញ្ជើញសម្ពោធ អគារព្យាបាលកម្រិតអន្តរជាតិ នៅមន្ទីរពេទ្យកាល់ម៉ែត តម្លៃជាង៧០លានដុល្លារ នាថ្ងៃទី២៣ ខែឧសភា ឆ្នាំ២០២៣ សម្ដេចតេជោ ហ៊ុន សែន បានបញ្ជាក់ថា «ឥលូវនេះ យើងមានមន្ទីរពេទ្យល្អហើយ តែអ្វីដែលត្រូវល្អសំខាន់ទៅទៀតនោះ គឺត្រូវមានគ្រូពេទ្យល្អ ទើបអាចដោះស្រាយបានបញ្ហា»។
សម្ដេចតេជោ ហ៊ុន សែន បានលើកឡើងថា មានមន្ទីរពេទ្យល្អ វាពិបាកណាស់ទៅហើយ ដើម្បីឲ្យអាចមានមន្ទីរពេទ្យ មានសម្ភារ បច្ចេកទេសល្អ ដូច្នេះចាំបាច់ណាស់ ត្រូវការចំណុច២សំខាន់ ដែលទាមទារគ្រូពេទ្យត្រូវធ្វើឲ្យបាន គឺការគោរពក្រមសីលធម៌វិជ្ជាជីវៈ និងការលើកកម្ពស់សមត្ថភាព។
បន្ថែមពីនោះទៀត សម្ដេចតេជោ នាយករដ្ឋមន្ដ្រី បានឲ្យដឹងថា ក្រមសីលធម៌វិជ្ជាជីវៈរបស់គ្រូពេទ្យ ដែលទាមទារខ្លាំងណាស់ ត្រូវគិតដល់ជីវិតមនុស្សជាសំខាន់។ សម្ដេចបន្ដថា យើងធ្វើពេទ្យ ដើម្បីសង្គ្រោះជីវិតមនុស្ស នេះជាក្រមសីលធម៌ចំបង របស់ក្រមគ្រូពេទ្យ។
សម្ដេចតេជោ ហ៊ុន សែន បានគូសបញ្ជាក់ថា សម្ដេចសង្ឃឹមថា គ្រូពេទ្យរបស់យើង ដោយគេបានប្រសិទ្ធនាម ក្នុងដំណាក់កាលកូវីដ-១៩ ថា ជា «កងទ័ពអាវសរ» មិនត្រូវធ្វើឲ្យកិត្ដិយសនេះ បាត់បង់ទៅវិញនោះទេ។
ទន្ទឹមគ្នានេះ សម្ដេចតេជោ ហ៊ុន សែន ក៏បានអំពាវនាវដល់ក្រុមគ្រូពេទ្យ ពង្រឹងក្រមសីលធម៌វិជ្ជាជីវៈ ដោយយកការបម្រើប្រជាជន ធ្វើជាស្នូល ធ្វើជាគោលដៅ នៃការធ្វើសកម្មភាព សម្រាប់គ្រូពេទ្យ។
សម្តេចតេជោ ហ៊ុន សែន បានថ្លែងទៀតថា ធ្វើជាគ្រូពេទ្យ គឺដើម្បីសង្គ្រោះជីវិតប្រជាពលរដ្ឋ ហើយសម្តេចតេជោ សង្ឃឹមថា គ្រូពេទ្យ និងនិស្សិតធ្វើកម្មសិក្សា យកចិត្តទុកដាក់ ក្នុងការផ្តល់សេវា ព្យាបាលជូនប្រជាពលរដ្ឋ។
គូសបញ្ជាក់ថា «អគារតេជោអភិវឌ្ឍន៍» សាងសង់ឡើង ក្នុងគោលបំណងអភិវឌ្ឍន៍ និងធ្វើទំនើបកម្មអគារមជ្ឈមណ្ឌលពហុឯកទេស នៃមន្ទីរពេទ្យកាល់ម៉ែត ជាមន្ទីរពេទ្យបង្អែកលំដាប់ខ្ពស់ចុងក្រោយ ដើម្បីផ្តល់នូវសេវាពហុឯកទេស ប្រកបទៅដោយបច្ចេកវិទ្យាវេជ្ជសាស្ត្រដ៏ទំនើប ស្របតាមការវិវត្តរបស់សកលលោក នាពេលបច្ចុប្បន្ន ដែលជាក្ដីរំពឹងរបស់ប្រជាពលរដ្ឋកម្ពុជា។ «អគារតេជោអភិវឌ្ឍន៍» សាងសង់អំពីបេតុងអាម៉េ លាតសន្ធឹងតាមបណ្តោយមហាវិថីព្រះមុនីវង្សមានបណ្តោយប្រវែង ១៥៣ម៉ែត្រ ទទឹងប្រវែង២២.៥ ម៉ែត្រ មានកម្ពស់ ១២ជាន់ និងក្រោមដី ២ជាន់ ផ្ទៃក្រឡាសរុប ៤៨,១៩៥ម៉ែត្រក្រឡា សាងសង់ស្របតាមប្រព័ន្ធស្ដង់ដារមន្ទីរពេទ្យអន្តរជាតិ (បទដ្ឋានបច្ចេកទេសបារាំង) មានគ្រែសម្រាកព្យាបាលសរុបចំនួន ៤២៦គ្រែ ៕
