ឯកឧត្ដម កែវ រតនៈ ស្នេីរពលរដ្ឋស្រុកកណ្តៀង និងស្រុកក្រគរ បន្តគាំទ្រគោលនយោបាយរបស់រាជរដ្ឋាភិបាល ដើម្បីទទួលបាននូវសមិទ្ធិផលថ្មីៗបន្ថែមទៀត

ភ្នំពេញ៖ ឯកឧត្ដម កែវ រតនៈ រដ្ឋមន្ត្រីប្រតិអមនាយករដ្ឋមន្ត្រី អគ្គនាយកអគ្គិសនីកម្ពុជា និងជាប្រធានក្រុមការងាររាជរដ្ឋាភិបាល ចុះជួយស្រុកក្រគរ និងស្រុកកណ្តៀង និងជាបេក្ខជនតំណាងរាស្ត្រមណ្ឌលពោធិ៍សាត់ បានស្នេីប្រជាពលរដ្ឋ ឃុំស្រែស្តុក ស្រុកកណ្តៀង និងឃុំអន្សាចំបក់ ស្រុកក្រគរ បន្តគាំទ្រដល់គោលនយោបាយរបស់រាជរដ្ឋាភិបាលកម្ពុជា ដើម្បីទទួលបាននូវសមិទ្ធិផលថ្មីៗជាច្រើនទៀត ដែលជាតម្រូវការចាំបាច់ក្នុងមូលដ្ឋាន។

ឯកឧត្ដម បានលើកឡើងបែបនេះនាពេលកន្លងទៅថ្មីៗនេះ​ក្នុងឱកាសជួបសំណេះសំណាល ជាមួយប្រជាពលរដ្ឋ ចំនួន២ទីតាំងផ្សេងគ្នា គឺទី១៖​ នៅអគារទួលសុវត្ថិភាពភូមិក្តីឈ្វិត ឃុំស្រែស្តុក ស្រុកកណ្តៀង ចំនួន៣៤០០នាក់ និងទី២៖នៅរមណីដ្ឋានវប្បធម៌ ធម្មជាតិ និងប្រវត្តិសាស្ត្រ ភ្នំនាគស ស្ថិតក្នុងភូមិក្បាលដំរី ឃុំអន្សាចំបក់ ស្រុកក្រគរ ចំនួន២​ ២៧៥នាក់។

ឯកឧត្ដម បាននាំមកនូវការផ្តាំផ្ញើសួរសុខទុក្ខ ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា លោក ស៊ុយ សែម រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយខេត្តពោធិ៍សាត់ ដោយបានសម្តែងការកោតសរសើរ និងវាយតម្លៃខ្ពស់ ចំពោះប្រជាពលរដ្ឋឃុំស្រែស្តុក ស្រុកកណ្តៀង និងឃុំអន្សាចំបក់ ស្រុកក្រគរ ដែលជានិច្ចកាលតែងតែគាំទ្រគោលនយោបាយ របស់រាជរដ្ឋាភិបាលគ្រប់អាណត្តិ និងសូមឲ្យការគាំទ្រនេះបន្តទៅទៀត ដើម្បីទទួលបាននូវសមិទ្ធិផលធំៗថ្មីៗជាច្រើន គឺជាតម្រូវការចាំបាច់នៅក្នុងមូលដ្ឋាន។

ឯកឧត្ដម កែវ រតនៈ ក៏បានថ្លែងអំណរគុណចំពោះក្រុមការងាររាជរដ្ឋាភិបាលចុះមូលដ្ឋានឃុំ គ្រប់ថ្នាក់ ដែលបានផ្តល់ការគាំទ្រទាំងធនធាន និងស្មារតី ធ្វើឲ្យប្រជាពលរដ្ឋកាន់តែមានលទ្ធភាព ក្នុងការអភិវឌ្ឍន៍មូលដ្ឋាន​ និងបានបញ្ជាក់ថា រយៈពេល៥ឆ្នាំ របស់រាជរដ្ឋាភិបាល នីតិកាលទី៦ ប្រជាពលរដ្ឋពិតជាបានតាមដាននូវដំណើរការវិវត្តន៍ប្រែប្រួល ដ៏ស្មុគស្មាញ នៃស្ថានការណ៍តំបន់ និងពិភពលោក ជាពិសេសក្រុមប្រឆាំងជ្រុលនិយមមួយចំនួន នៅតែបន្តរកគ្រប់វិធី បង្កឲ្យមានភាពចលាចល វឹកវរក្នុងសង្គម ដើម្បីឈានទៅផ្តួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោត។

ឯកឧត្ដម បានលើកឡើងថា ក្នុងរយៈពេលជាង៤៤ឆ្នាំ ក្រោមការដឹកនាំ ប្រកបដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដាក់ចេញនូវគោលនយោបាយ និងវិធានការនានា ដោយមានការគាំទ្រ និងចូលរួមយ៉ាងសកម្មពីសំណាក់ថ្នាក់ដឹកនាំ និងប្រជាពលរដ្ឋទូទាំងខេត្ត មានការអភិវឌ្ឍន៍លើគ្រប់វិស័យ ទាំងវិស័យពុទ្ធចក្រ និងអាណាចក្រ ហើយក្នុងរយៈពេល៥ឆ្នាំខាងមុខ ពិតជាមានកិច្ចការជាច្រើនដែលត្រូវអនុវត្ត ដើម្បីអនាគត និងតម្រូវការចាំបាច់របស់ប្រជាពលរដ្ឋយើង។

ឯកឧត្ដម កែវ រតនៈ បានឱ្យដឹងទៀតថា សមិទ្ធិផលដែលកើតមានរហូតមកដល់ពេលនេះ គឺផ្តើមចេញពីសន្តិភាព ស្ថេរភាព ដែលរាជរដ្ឋាភិបាលកម្ពុជា បានខិតខំស្តារឡើងវិញតាំងពីបាតដៃទទេ ហេតុនេះសូមអំពាវនាវដល់ប្រជាពលរដ្ឋ ជួយថែរក្សាការពារកុំឲ្យធ្លាក់ទៅលើដៃក្រុមប្រឆាំងជ្រុលនិយម។ ហើយនាថ្ងៃទី២៣ ខែកក្កដា ឆ្នាំ២០២៣ខាងមុខនេះ គឺជាការបោះឆ្នោតជ្រើសតាំងតំណាងរាស្ត្រ នីតិកាលទី៧ ហេតុនេះក្នុងនាមជាតំណាងរាស្ត្រមណ្ឌលពោធិ៍សាត់ សូមឲ្យប្រជាពលរដ្ឋ ដែលគ្រប់អាយុ សូមអញ្ជើញទៅបោះឆ្នោតឲ្យបានគ្រប់ៗគ្នា។

ឯកឧត្ដម ក៏បានក្រើនរំលឹកដល់ក្រុមការងារ និងអាជ្ញាធរដែនដី ត្រូវបន្តការខិតខំបម្រើសេវាសាធារណៈ ជូនប្រជាពលរដ្ឋ ត្រូវមានព្រហ្មវិហារធម៌ទាំង៤ និងមានសុឆន្ទះកុំបង្កឲ្យមានការថ្នាំងថ្នាក់ ដល់អារម្មណ៍ប្រជាពលរដ្ឋ ព្រមទាំងបានផ្តល់ជូនវត្ថុកំដៃដល់អ្នកចូលរួមមួយចំនួនផងដែរ៕