អភិបាលខេត្តកំពង់ស្ពឺ៖ យុទ្ធនាការអន្ទាក់សូន្យ ពិតជាផ្តល់សារសំខាន់យ៉ាងខ្លាំងក្លាក្នុងការទប់ស្កាត់ និងកិច្ចការអភិរក្សសត្វព្រៃនៅកម្ពុជា

ភ្នំពេញ៖ ឯកឧត្តម វុី សំណាង អភិបាលនៃគណៈអភិបាលខេត្តកំពង់ស្ពឺ បានថ្លែងថា យុទ្ធនាការអន្ទាក់សូន្យ ពិតជាផ្តល់សារសំខាន់យ៉ាងខ្លាំងក្លាក្នុងការទប់ស្កាត់ និងកិច្ចការអភិរក្សសត្វព្រៃនៅកម្ពុជា។

ក្នុងពិធីបើកយុទ្ធនាការអន្ទាក់សូន្យដំណាក់កាលទី២នៅថ្ងៃទី០៩ ខែឧសភា ឆ្នាំ២០២៣ នៅខេត្តកំពង់ស្ពឺ ឯកឧត្តម វ៉ី សំណាង មានប្រសាសន៍ថា ការបាត់បង់ប្រភេទសត្វព្រៃមួយចំនួនវាបានបង្កគ្រោះថ្នាក់ដល់ប្រភេទសត្វដទៃទៀតពីព្រោះថាសត្វទាំងអស់វាសុទ្ធសឹងតែមានទំនាក់ទំនងនិងបំពេញគ្នាទៅវិញទៅមក។

ឯកឧត្តមបន្ថែមថា បើខ្វះការចូលរួមពី ពលរដ្ឋនោះព្រៃឈើ សត្វព្រៃ របស់យើងនឹងទទួលរងគ្រោះថ្នាក់ពុំខាន ដោយហេតុនេះហើយ ឯកឧត្តម បានអំពាវនាវឱ្យពលរដ្ឋចូលរួមទាំងអស់គ្នាដើម្បីសំដៅធ្វើយ៉ាងណាអភិរក្សសត្វព្រៃឱ្យបានគង់វង្សយូរអង្វែងដល់កូនចៅជំនាន់ក្រោយ ។

ឯកឧត្តមបញ្ជាក់បន្ថែមថា មន្រ្តីឧទ្យានុរក្ស និងមន្រ្តីពាក់ព័ន្ធទទួលផលលំបាកច្រើនដែលក្នុងនេះទទួលរងទាំងការដើរកាត់ព្រៃភ្នំ ទាំងយប់ទាំងថ្ងៃ ហើយពិសេសនៅប្រឈមមុខជាមួយជនល្មើសក្នុងពេលបំពេញការងារថែមទៀត។

ឯកឧត្តម វ៉ី សំណាង មានប្រសាសន៍ថា”អ្នកបរិភោគសត្វព្រៃតែងទទួលរងគ្រោះថ្នាក់ដោយសារតែឆ្លងជំងឺដោយសារមិនបានឆ្លងកាត់ការត្រួតពិនិត្យពីសំណាក់ពេទ្យសត្វ។អ្នកដែលបរិភោគសត្វព្រៃបានបាត់ជីវិតដោយសាររោគជំងឺ។យើងត្រូវបឈ្ឈប់បរិភោគសាច់សត្វព្រៃ ពីព្រោះថាសត្វព្រៃក៏មានជីវិតដូចយើងដែរ។សត្វព្រៃមានតម្លៃដ៏មហាសាល យើងត្រូវរក្សាទុកសម្រាប់កូនចៅជំនាន់ក្រោយបន្តទៀត”។

ទន្ទឹមជាមួយគ្នាឯកឧត្តមបានលើកឡើងដោយមានវិធានការចំពោះអ្នកដែលលក់ខ្សែគោ ខ្សែហ្រ្វាំងកង់ដែលបានដាក់លក់ក្នុងព្រៃជាតំបន់អភិរក្សដែលទីកន្លែងទាំងនោះត្រូវបានគេចាត់ទុកថាពួកគេលក់សម្រាប់ជនល្មើសប្រើសអន្ទាក់សម្លាប់សត្វព្រៃតែប៉ុណ្ណោះ។

គួរបញ្ជាក់ថាខេត្គ គោលដៅសម្រាប់យុទ្ធនាការអន្ទាក់សូន្យក្នុងដំណាក់កាលទី២នេះ មាន ខេត្តពោធិ៍សាត់ ខេត្តកំពង់ស្ពឺ ខេត្តកោះកុង ខេត្តសៀមរាប ខេត្តបាត់ដំបង និងខេត្តប៉ៃលិន៕