សម្តេចតេជោ ហ៊ុន សែន៖ បើមានកម្លោះក្រមុំណា ស្គាល់គ្នាលើរថយន្តក្រុងពេលជិះទៅលេងស្រុក ថ្ងៃចូលឆ្នាំ ហើយរៀបការ អញ្ជើញខ្ញុំផង

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា ប្រសិនបើមានកម្លោះក្រមុំណា ស្គាល់គ្នាពេលជិះរថយន្តក្រុង មិនគិតថ្លៃទៅលេងស្រុកកំណើត ក្នុងឱកាសបុណ្យចូលឆ្នាំ ហើយរៀបករ សូមផ្ញើធៀបការអញ្ជើញសម្ដេចផង ។

ក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវអគារសម្ភព ស្ថិតនៅក្នុងបរិវេណនៃមន្ទីរពេទ្យកុមារជាតិ នាថ្ងៃទី២០ ខែមេសា សម្តេចតេជោ ហ៊ុន សែន បានបញ្ជាក់ថា «ខ្ញុំក៏សុំអរគុណឯកឧត្តម ឃួន ស្រេង អភិបាលរាជធានីភ្នំពេញ ដែលបានផ្តល់រថយន្តក្រុងដឹកជញ្ជូន ប្រជាជនប្រមាណជា ៥ម៉ឺននាក់ ចេញទៅលេងស្រុក។ ខ្ញុំប៉ុន្មានឆ្នាំចុងក្រោយនេះ លើកលែងតែដំណាក់កាលកូវីដទេ ខ្ញុំចង់ដេញថ្លៃជាមួយក្រុមរថយន្តឈ្នួល និងតាក់ស៉ី ពូកែឡើងថ្លៃកប់ពពក ខ្ញុំសង្កត់មើល ឥឡូវរថយន្តក្រុងបន្ថែមទៀត ដល់អីចឹងទៅអត់ឡើងថ្លៃដែរ។ គេនិយាយថា ខ្លះគេស្គាល់គ្នាលើរថយន្តក្រុង ពេលជិះទៅស្រុកជាមួយគ្នា ហើយសង្ឃឹមថាអាចមាននារី និងបុរស ដែលនៅកម្លោះក្រមុំអាចក្លាយជាប្តីប្រពន្ធនឹងគ្នា ហើយថ្ងៃក្រោយបើសិនជាមាននរណារៀបការ ផ្ញើសំបុត្រអញ្ជើញខ្ញុំផង»។

សូមជម្រាបថា អនុវត្តតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា រដ្ឋបាលរាជធានីភ្នំពេញ បានបញ្ចេញរថយន្តក្រុងដឹកអ្នកដំណើរចំនួន ៣៤៥គ្រឿង សម្រាប់បំរើសេវាដឹកជញ្ជូនសាធារណៈ ដើម្បីសំរួលដល់ការចំណាយ ជូនបងប្អូនប្រជាពលរដ្ឋ ក្នុងការធ្វើដំណើរទៅស្រុកកំណើត ជួបជុំបងប្អូនក្រុមគ្រួសារ ក្នុងពិធីបុណ្យចូលឆ្នាំថ្មី ប្រពៃណីជាតិ ឆ្នាំថោះបញ្ចសក័ ពុទ្ធសករាជ២៥៦៧ ដោយមិនយកប្រាក់។ ការដឹកជញ្ជូនប្រជាពលរដ្ឋ ដែលធ្វើដំណើរចេញពីរាជធានីភ្នំពេញ ទៅតាមបណ្តាខេត្ត និងតាមបណ្តាខេត្តមករាជធានីភ្នំពេញវិញ ត្រូវបានកំណត់ទីតាំង និងគោលដៅចេញដំណើរ និងពេលវេលាច្បាស់លាស់៕