ឧត្តមសេនីយ៍ឯក លន់ សុផាត ជួបសំណេះសំណាល និងផ្ដាំផ្ញើការងារចំពោះមុខមួយចំនួន ដល់ថ្នាក់ដឹកនាំ និងមន្រ្តីអង្គភាពតម្រួតបទបញ្ជា

ភ្នំពេញ ៖ ឯកឧត្តម ឧត្តមសេនីយ៍ឯក លន់ សុផាត អគ្គស្នងការរងនគរបាលជាតិ នារសៀលថ្ងៃទី១០ ខែកុម្ភៈ ឆ្នាំ២០២៣នេះ បានអញ្ជើញជាតំណាងដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ ជួបសំណេះសំណាលសាកសួរសុខទុក្ខ និងផ្ដាំផ្ញើការងារចាំបាច់មួយចំនួន ដល់កងកម្លាំងនៅអង្គភាពតម្រួតបទបញ្ជា នៃអគ្គស្នងការដ្ឋាននគរបាលជាតិ។

លោកឧត្តមសេនីយ៍ទោ ឆឹង កុមារ ប្រធានអង្គភាពតម្រួតបទបញ្ជា បានសម្ដែងនូវក្ដីសោមនស្សរីករាយ និងស្វាគមន៍យ៉ាងកក់ក្ដៅជូន ឯកឧត្តម ឧត្តមសេនីយ៍ឯក លន់ សុផាត ដែលបានឆ្លៀតពេលវេលាដ៏មានតម្លៃ និងជាតំណាងដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន ចុះសំណេះសំណាល និងសួរសុខទុក្ខកងកម្លាំងតម្រួតបទបញ្ជាដោយផ្ទាល់។

ថ្លែងក្នុងឱកាសនោះ ឯកឧត្តម ឧត្តមសេនីយ៍ឯក លន់ សុផាត បាននាំយកនូវការផ្ដាំផ្ញើសាកសួរសុខទុក្ខរបស់ ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ ជូនដល់ប្រធាន អនុប្រធាន និងមន្ដ្រីទាំងអស់ នៃអង្គភាពតម្រួតបទបញ្ជាដោយក្ដីនឹករលឹក។ ឯកឧត្តម ឧត្តមសេនីយ៍ឯក បានវាយតម្លៃខ្ពស់ និងកោតសរសើរចំពោះលទ្ធផលដែលអង្គភាពតម្រួតបទបញ្ជាសម្រេចបានដោយជោគជ័យនៅពេលកន្លងមក ដូចជាបានចូលរួមរក្សាសុវត្ថិភាព សន្តិសុខ សណ្តាប់ធា្នប់ កិច្ចប្រជុំកំពូលអាស៊ាន លើកទី៤០-៤១ និងកិច្ចប្រជុំកំពូលពាក់ព័ន្ធ, ការបោះឆ្នោតក្រុមប្រឹក្សាឃុំ សង្កាត់ និងព្រឹត្តិការណ៍សំខាន់ៗជាច្រើនទៀត។

ឯកឧត្តម ឧត្តមសេនីយ៍ឯក បានគូសបញ្ជាក់ថា បើទោះបីទទួលបានជោគជ័យនូវការងារកន្លងមកក្ដី ក៏នៅមានចន្លោះប្រហោងមួយចំនួនកើតមានផងដែរ ប៉ុន្ដែភាពអវិជ្ជាមានទាំងអស់នោះ ត្រូវបានលុបបំបាត់ទៅដោយតាមរយៈកិច្ចខិតខំប្រឹងប្រែងរបស់ប្រធានអង្គភាព និងមមន្រ្តីទាំងអស់ ព្រមទាំងទទួលបានការសាទរពីថ្នាក់ដឹកនាំ នៃអគ្គស្នងការដ្ឋាននគរបាលជាតិផងដែរ។

ឯកឧត្តម ឧត្តមសេនីយ៍ឯក បានគូសបញ្ជាក់ទៀតថា នៅមានកិច្ចការចំពោះមុខច្រើនទៀត ដែលកងកម្លាំងទាំងអស់ត្រូវតែរួមគ្នាអនុវត្តតាមអ្វីដែលថ្នាក់ដឹកនាំប្រគល់ជូន។ ជាក់ស្ដែងនៅពេលខាងមុខ កម្ពុជាត្រូវធ្វើជាម្ចាស់ផ្ទះក្នុងការប្រកួតកីឡាស៉ីហ្គេម និងអាស៊ានប៉ារ៉ាហ្គេម ព្រមទាំងព្រឹត្តិការណ៍នៃការបោះឆ្នោតជ្រើសរើសតំណាងរាស្ដ្រ ដែលនឹងប្រព្រឹត្តទៅនៅខែកក្កដា ឆ្នាំ២០២៣ខាងមុខ។

បន្ថែមពីនេះ ឯកឧត្តម ឧត្តមសេនីយ៍ឯក បានណែនាំប្រធានអង្គភាព និងមន្ដ្រី ត្រូវពង្រឹងសមត្ថភាពបន្ថែមទៀត ដោយត្រូវធ្វើការហ្វឹកហ្វឺនជាប្រចាំ ប្រមូលផ្ដុំកម្លាំងនៅអង្គភាព ព្រមទាំងរក្សាសាមគ្គីភាពផ្ទៃក្នុង ព្រោះជោគជ័យកន្លងមក គឺកើតចេញពីការសាមគ្គីភាពរបស់ប្រធានអង្គភាព និងមន្ដ្រីទាំងអស់ នៃអង្គភាពតម្រួតបទបញ្ជា។ លើសពីនេះ ត្រូវពិនិត្យវាយតម្លៃ ប្រកបដោយតម្លាភាព និងស្មើភាពគ្នា ដើម្បីស្នើលើកសរសើរ និងតម្លើងឋានន្ដរស័ក្ដិជាដើម។

គួរជម្រាបថា ក្នុងឱកាសនោះ ឯកឧត្តម ឧត្តមសេនីយ៍ឯក ក៏បាននាំយកនូវអំណោយរបស់ ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន រួមមាន៖ ថវិកាចំនួន១០លានរៀល, អង្ករ២តោន, មី១០កេស និងគ្រឿងឧបភោគ បរិភោគជាច្រើនទៀត ព្រមទាំងឧបត្ថម្ភថវិកាជូនមន្ដ្រីគ្រប់ៗរូបផងដែរ ៕