សម្ដេចតេជោ៖ កង្វល់ពិតប្រាកដ ដែលខ្ញុំកំពុងតែខ្វល់ពេលនេះ សម្រាប់បុណ្យចូលឆ្នាំចិន-វៀតណាម គឺគ្រោះថ្នាក់ចរាចរណ៍ និងអគ្គីភ័យ

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានថ្លែងថា កង្វល់ពិប្រាកដ ដែលសម្ដេចកំពុងតែខ្វល់នាពេលនេះ គឺបញ្ហាគ្រោះថ្នាក់ចរាចរណ៍ និងអគ្គីភ័យ ក្នុងអំឡុងពេលបុណ្យចូលឆ្នាំចិន និងវៀតណាម ។

ក្នុងឱកាសអញ្ជើញពិនិត្យមើលវឌ្ឍនភាពនៃការសាងសង់ «មន្ទីរពេទ្យជាតិតេជោសន្ដិភាព» ដែលមានទីតាំងស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ព្រមទាំងសំណេះសំណាលជាមួយកម្មករសំណង់ នៅក្នុងការដ្ឋានមន្ទីរពេទ្យនេះប្រមាណ ១,២០០ នាក់ នាថ្ងៃទី១៩ ខែមករានេះ សម្តេចតេជោ ហ៊ុន សែន បានបញ្ជាក់ថា «កង្វល់ពិតប្រាកដ ប្រហែលជាមិនមែនកូវីដទេ កូវីដនៅតែជាកង្វល់ដែលអាចនឹងមានការឆ្លង ប៉ុន្ដែវាតិចតួចទេ កង្វល់ពិតប្រាកដដែលខ្ញុំ កំពុងតែខ្វល់នាពេលនេះ សម្រាប់ពេលបុណ្យចូលឆ្នាំចិន-វៀតណាមនេះ ទីមួយគ្រោះថ្នាក់ចរាចរណ៍ សូមអំពាវនាវចំពោះប្រជាពលរដ្ឋរបស់យើង កុំឱ្យពេលចូលឆ្នាំនេះក្លាយជាបុណ្យខ្មោច» ។

សម្តេចតេជោ ហ៊ុន សែន បានអំពាវនាវឱ្យបងប្អូនប្រជាពលរដ្ឋ មានការព្រមប្រយ័ត្នអំពីគ្រោះថ្នាក់ចរាចរណ៍ រាល់ការធ្វើដំណើរត្រូវគោរពច្បាប់ចរាចរណ៍ ចៀសវាងការគ្រោះថ្នាក់ដោយយថាហេតុណាមួយ។ ជាមួយគ្នានោះ ក្នុងឱកាសដែលមានវិធីសែនព្រេនផ្សេងៗត្រូវប្រយ័ត្នភ្លើងធូប ភ្លើងទៀត ចៀសវាងការឆាបឆេះដោយអគ្គីភ័យ ក្នុងអំឡុងពេលពិធីបុណ្យចូលឆ្នាំចិនខាងមុខនេះ ៕