ភ្នំពេញ៖ ឯកឧត្តម លន់ លឹមថៃ តំណាងរាស្ត្រមណ្ឌលខេត្តកំពង់ចាម និងជាលេខាធិការគណ:កម្មការទី៣ នៃរដ្ឋសភា រួមដំណើរដោយ លោក មាស ទួក ប្រធានក្រុមប្រឹក្សាស្រុកព្រៃឈរ នៅថ្ងៃទី២ ខែមករា ឆ្នាំ ២០២៣ បានអញ្ជើញចូលរួមក្នុងពិធីបើកបវេសនកាលឆ្នាំសិក្សា២០២២-២០២៣ ដែលប្រព្រឹត្តទៅនៅវិទ្យាល័យល្វា ស្ថិតនៅក្នុងឃុំល្វា ស្រុកព្រៃឈរ ខេត្តកំពង់ចាម។
ឆ្លៀតក្នុងឱកាសនោះផងដែរ ឯកឧត្តមបានថ្លែងអំណរគុណយ៉ាងជ្រាលជ្រៅបំផុតជូនចំពោះ លោកគ្រូអ្នកគ្រូទាំងអស់ ដែលបានយកអស់កម្លាំងកាយកម្លាំងចិត្តក្នុងការដឹកនាំ ក៏ដូចជាបង្ហាត់បង្រៀនដល់សិស្សានុសិស្សអោយទទួលបាននូវចំណេះដឹងបានយ៉ាងល្អប្រសើរ។
លើសពីនេះ ឯកឧត្តម លន់ លឹមថៃ ក៏បានលើកឡើងដែរថា ការបើកសាលារៀនអោយមានដំណើរការប្រកបដោយសុវត្ថិភាព និងភាពងាយស្រួលសព្វបែបយ៉ាងដូចសព្វថ្ងៃនេះ វាកើតចេញពីកត្តានៃសុខសន្តិភាព ហើយជាពិសេសនៅក្នុងដំណាក់កាលនៃការរីករាលដាលនៃជំងឺកូវីត១៩នេះតែម្តងគឺវាបានធ្វើអោយប៉ះពាល់យ៉ាងធ្ងន់ធ្ងរដល់វិស័យសិក្សាអប់រំ តែក្រោមការដឹកនាំដ៏ល្អ និងឈ្លាសវៃរបស់រាជរដ្ឋាភិបាលដែលដឹកនាំដោយសម្តេចតេជោបានធ្វើអោយប្រទេសយើងមានការបើកដំណើការសាលាអោយសិស្សានុសិស្សរបស់យើងបានរៀនសូត្រជាធម្មតាទ្បើងវិញដោយគ្មានការព្រួយបារម្ភ និងធ្វើអោយប្រទេសមួយនេះកាន់តែមានការអភិវឌ្ឍរីកចម្រើនជាលំដាប់។
ក្នុងឱកាសនោះ ឯកឧត្តមក៏បានផ្តាំផ្ញើអោយលោកគ្រូអ្នកគ្រូក៏ដូចជាគណ:គ្រប់គ្រងសាលាត្រូវចេះសាមគ្គីគ្នាធ្វើយ៉ាងណាខិតខំបង្ហាត់បង្រៀនដល់សិស្សានុសិស្សអោយទួលបាននូវចំណេះដឹងដែលប្រកបដោយប្រសិទ្ធភាព ជាពិសេសអប់រំអោយយុវជនរបស់យើងក្លាយជាគ្រាប់ពេជ្យដ៏មានតម្លៃសម្រាប់សង្គមជាតិទាំងមូល។ នាឱកាសនោះផងដែរឯកឧត្តម លន់ លឹមថៃ ក៏បានផ្ត់ល់ជូនដល់លោកគ្រូអ្នកគ្រូចំនួន៧៦នាក់ដោយក្នុងម្នាក់ៗទទួលបានថវិកាចំនួន៣ម៉ឺនរៀល ផ្តល់ជូនដល់សិស្សានុសិស្សចំនួន៨០០នាក់ក្នុងម្នាក់ៗទទួលបានសៀវភៅ២ក្បាលប៊ិច១ដើមផងដែរ ៕
