ឯកឧត្តម ម៉ុម ជឹមហ៊ុយ និងឯកឧត្តម ម៉ាន់ ឈឿន ចុះជួបសំណេះសំណាល ជាមួយគណៈគ្រប់គ្រងក្នុងសង្កាត់កន្ទោក ខណ្ឌកំបូល

ភ្នំពេញ៖ ឯកឧត្តម ម៉ុម ជឹមហ៊ុយ ប្រធានគណៈកម្មការទី៧ ព្រឹទ្ធសភា និងជាអនុប្រធានក្រុមសមាជិកព្រឹទ្ធសភាប្រចាំភូមិភាគទី១ អមដំណើរដោយឯកឧត្តម ម៉ាន់ ឈឿន អនុប្រធានគណៈកម្មការ នាថ្ងៃទី២៣ ខែធ្នូ ឆ្នាំ២០២២ បានអញ្ជើញចុះជួបសំណេះសំណាល និងពិភាក្សាការងារជាមួយគណៈគ្រប់គ្រង ស្ថិតក្នុងសង្កាត់កន្ទោក សង្កាត់កំបូល ខណ្ឌកំបូល រាជធានីភ្នំពេញ។

ប្រធានកម្រងសាលារៀន បានលើកឡើងពីការយកចិត្តទុកដាក់បំពេញការងាររបស់លោកគ្រូ អ្នកគ្រូ ដោយស្មារតីទទួលខុសត្រូវ និងឆន្ទៈខ្ពស់ ក្នុងការបណ្តុះបណ្តាលធនធានមនុស្ស។ ទោះជាដំណើរការដោយរលូន ប៉ុន្តែនៅជួបបញ្ហាប្រឈមមួយចំនួនរួមមាន ការខ្វះគ្រូ និងខ្វះអគារសិក្សាផងដែរ។ បន្ទាប់ពីបានស្តាប់សេចក្តីរាយការណ៍រួចមក ឯកឧត្តមប្រធានបានសម្តែងការកោតសរសើរ និងលើកទឹកចិត្តឱ្យបន្តការខិតខំតទៅទៀត តស៊ូជាមួយគ្នាដោយប្រែក្លាយបញ្ហាប្រឈមឱ្យទៅជាកាលានុវត្តភាព។

បញ្ហាអាទិភាពជាអចិន្រ្តែយ៍ពាក់ព័ន្ធវិស័យអប់រំមានជាអាទិ៍ ១-ត្រូវខិតខំដោះស្រាយសំណូមពររៀនសូត្រ នៅគ្រប់ភូមិសិក្សា ២-ទំនើបកម្មប្រព័ន្ធអប់រំ ដើម្បីឆ្លើយតបទៅសំណូមពរសង្គម និងទីផ្សារការងារ ៣-លើកកម្ពស់វិជ្ជាជីវៈគ្រូបង្រៀន ការបណ្តុះបណ្តាលវិជ្ជាជីវៈ និងលើកកម្ពស់ជីវភាពរស់នៅ និង៤-ប្រមូលគ្រប់ធនធាន ដើម្បីបុព្វហេតុវិស័យអប់រំ។ ពាក់ព័ន្ធសភាពការណ៍ជាតិ អន្តរជាតិ មានភាពស្មុគស្មាញ ចាក់ស្រេះ ដោយវិបត្តិជំងឺកូវីដ-១៩ ការអូសបន្លាយនៃសង្គ្រាម ការប្រកួតប្រជែងខាងភូមិសាស្រ្តនយោបាយ និងកាប្រែប្រួលអាកាសធាតុ។

ទោះជាវិបត្តិដ៏ស្មុគស្មាញ ក៏រាជរដ្ឋាភិបាលបានខិតខំដោះស្រាយដោយជោគជ័យក្នុងការប្រយុទ្ធប្រឆាំងជំងឺកូវីដ-១៩ ការស្តារសេដ្ឋកិច្ច និងការរៀបចំកិច្ចប្រជុំកំពូលនានា ដើម្បីជំរុញការអភិវឌ្ឍ និងលើកកម្ពស់កិត្យានុភាពជាតិលើឆាកអន្តរជាតិ។ សំណូមពរបន្តរួបរួមប្រមូលកម្លាំង គាំទ្រនូវគោលនយោបាយដ៏ត្រឹមត្រូវរបស់រាជរដ្ឋាភិបាល ក្រោមការដឹកនាំដ៏ឈ្លាសវៃ និងប៉ិនប្រសព្វ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដើម្បីបន្តការអភិវឌ្ឍប្រទេសជាតិយើង ឆ្ពោះទៅរកភាពរុងរឿងជាអមតៈ ៕