ឧបនាយករដ្ឋមន្ត្រី កែ គឹមយ៉ាន អញ្ជើញចុះជួបសំណេះសំណាល និងសួរសុខទុក្ខមនុស្សចាស់ ជនមានពិការភាព និងអតីតយុទ្ធជន នៅភូមិបឹងជម្រុកតេជោឈ្នះឈ្នះ ឃុំទួលពង្រ ស្រុកម៉ាឡៃ
ភ្នំពេញ៖ ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានក្រុមការងាររាជរដ្ឋាភិបាលចុះជួយខេត្តបន្ទាយមានជ័យ និងជាប្រធានកិត្តិយស សមាគមមូលនិធិមនុស្សចាស់ខេត្ត អមដោយក្រុមការងារ និងអាជ្ញាធរដែនដី នាព្រឹកថ្ងៃទី១៧ ខែធ្នូ ឆ្នាំ២០២២ បានអញ្ជើញចុះជួបសំណេះសំណាល និងសួរសុខទុក្ខមនុស្សចាស់ ជនមានពិការភាព និងអតីតយុទ្ធជន នៅភូមិបឹងជម្រុកតេជោឈ្នះឈ្នះ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។
ក្នងឱកាសនោះ ឯកឧត្តម ឧបនាយករដ្ឋមន្ត្រី កែ គឹមយ៉ាន បានពាំនាំកាផ្ញើការសួរសុខទុក្ខពីថ្នាក់ដឹកនាំកំពូលជាតិពិសេសសម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ដែលតែងតែយកចិត្តទុកដាក់ជានិច្ច ដល់ប្រជាពលរដ្ឋទាំងអស់ ក៏ដូចជាប្រជាពលលរដ្ឋដែលកំពុងរស់នៅតំបន់បឹងជង្រុកតេជោឈ្នះឈ្នះ ជាពិសេសយកចិត្តទុកដាក់ដល់មនុស្សវ័យចាស់ និងជនមានពិការភាពនៅក្នុងរដូវត្រជាក់នេះ។
ឯកឧត្តម ឧបនាយករដ្ឋមន្រ្តី សូមថ្លែងអំណរគុណ និងកោតសសើរចំពោះ អាជ្ញាធរគ្រប់លំដាប់ថ្នាក់ និងអង្គភាពពាក់ព័ន្ធទាំងអស់ ចំពោះការចូលរួមថែរក្សា ការពារសន្តិភាព និងភាពសុខក្សេមក្សាន្តរបស់ប្រជាជន និងបានចូលរួមអភិវឌ្ឍន៍មូលដ្ឋានបានរីកចម្រើន។
ឯកឧត្តម ឧបនាយករដ្ឋមន្រ្តី បានលើកឡើងពីការដាក់ចេញនូវគោលនយោបាយមនុស្សវ័យចាស់ និងកម្មវិធីជួយដល់អតីតយុទ្ធជន មន្រ្តីរាជការស៊ីវិលចូលនិវត្តន៍ ច្បាប់ការពារ និងលើកម្ពស់ជនមានពិការភាព ជំនួយសង្គមក្នុងអំឡុងកូវីដ១៩ ជំនួយសង្គមដល់គ្រួសារមានហានិភ័យដោយសម្ពាធអតិផរណា និងគ្រួសារដែលទទួលរងប៉ះពាល់ធ្ងន់ធ្ងរដោយគ្រោះទឹកជំនន់ជាដើម ។ល។
កម្មវិធីទាំងអស់នេះ គឺជាការយកចិត្តទុកដាក់ដ៏ខ្ពង់ខ្ពស់ពីប្រមុខរាជរដ្ឋាភិបាល ដើម្បីធានគុណភាព សុខុមាលភាពមនុស្សចាស់ និងជនមានពិការភាព ដើម្បីចូលរួមជួយសង្គមជាតិ។
ឯកឧត្តម ឧបនាយករដ្ឋមន្រ្តី បានណែនំាដល់អាជ្ញាធរ សមត្ថកិច្ចទាំងអស់ត្រូវបន្តថែរក្សា ការពារសន្តិភាព និងត្រូវបន្តជួយគាំទ្រដល់មនុស្សវ័យចាស់ និងជនមានពិការភាព ព្រមទាំងផ្តល់សេវាសាធារណៈឲ្យកាន់តែល្អប្រសើរថែមទៀត។ ត្រូវចូលរួមអនុវត្តគោលនយោបាយភូមិ ឃុំ មានសុវត្តិភាព និងប្រយុទ្ធប្រឆាំងគ្រឿងញៀន។
ឯកឧត្តម ឧបនាយករដ្ឋមន្រ្តី ក៏បានផ្តល់អំណោយ និងថវិកាជូនដល់ មនុស្សវ័យចាស់ និងជនមានពិការភាពចំនួន៣៤៣នាក់ និង ក្រុមការងារអភិវឌ្ឍបឹងជង្រុក ក្រុមការងារកងកម្លាំង.ប្រជាការពារភូមិតេជោឈ្នះឈ្នះ, អនុសាខា និងសាខាបក្សភូមិ, ក្រុមគ្រូពេទ្យ, លោកគ្រូ អ្នកគ្រូ, យុវជនសម្ពន្ធស្រលាញ់សន្តិភាព សឹករងស្រុក, នរគបាលស្រុក អាវុធហត្ថស្រុក៕
