តំណាង ប.ស.ស. ជួបពិភាក្សាការងារជាមួយ អ្នកជំនាញការសហប្រតិបត្តិការអាល្លឺម៉ង់ (GIZ) តាមរយៈប្រព័ន្ធវីដេអូអនឡាញ

ភ្នំពេញ៖ ដោយទទួលបានការអនុញ្ញាតពីសំណាក់ ឯកឧត្ដម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. លោក លៀង ពន្លក ប្រធាននាយកដ្ឋានគោលនយោបាយសន្ដិសុខសង្គម បានដឹកនាំមន្រី្ដ និងបុគ្គលិកជំនាញ ជួបពិភាក្សាការងារលើការចាត់ចែង និងការគ្រប់គ្រងរបបសន្ដិសុខសង្គមផ្នែកប្រាក់សោធនរបស់ ប.ស.ស. ជាមួយអ្នកជំនាញការកិច្ចសហប្រតិបត្តិការអាល្លឺម៉ង់ (GIZ) ដើម្បីរៀបចំសេចក្ដីព្រាងសៀវភៅណែនាំស្តីពីការត្រួតពិនិត្យលើរបបសន្តិសុខសង្គមផ្នែកប្រាក់សោធន ដែលជាជំនួយបច្ចេកទេសរបស់កិច្ចសហប្រតិបត្តិការអាល្លឺម៉ង់ (GIZ)។

ក្នុងជំនួបពិភាក្សានេះ តំណាង ប.ស.ស. បានផ្ដល់នូវធាតុចូលសំខាន់ៗទាក់ទងនឹងបទប្បញ្ញត្តិរបបសន្ដិសុខសង្គមផ្នែកប្រាក់សោធន, ការរួមចំណែកជាកាតព្វកិច្ច និងជាជម្រើសសម្រាប់ចូលរួមក្នុងផ្នែកប្រាក់សោធន, អត្ថប្រយោជន៍ផ្សេងៗដែលផ្ដល់ជូនសមាជិក, យន្ដការនៃការដោះស្រាយបណ្ដឹង ព្រមទាំងផ្ដល់ធាតុចូលសំខាន់ៗជាច្រើនទៀត ដើម្បីបំពេញសេចក្ដីព្រាងសៀវភៅណែនាំខាងលើ ដែលអនុលោមតាមអនុក្រឹត្យលេខ១៦០ អនក្រ.បក ចុះថ្ងៃទី៨ ខែសីហា ឆ្នាំ២០២២ ស្ដីពីនិយ័តកម្មប្រព័ន្ធសន្តិសុខសង្គម ឱ្យមានភាពពេញលេញ និងគ្រប់ជ្រុងជ្រោយ។

ជំនួបពិភាក្សាខាងលើ រៀបចំនិងសម្របសម្រួលដោយនិយ័តករសន្តិសុខសង្គម ដោយមានការចូលរួមពីថ្នាក់ដឹកនាំ មន្រ្តី និងបុគ្គលិកនៃនាយកដ្ឋានគោលនយោបាយសន្ដិសុខសង្គម និងអ្នកជំនាញការសហប្រតិបត្តិការអាល្លឺម៉ង់ (GIZ) សរុបប្រមាណជា ២៥រូប តាមរយៈប្រព័ន្ធវីដេអូអនឡាញ៕