ភ្នំពេញ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ នាព្រឹកថ្ងៃទី២៣ ខែវិច្ឆិកា ឆ្នាំ២០២២ បានអញ្ជើញជាអធិបតីភាពក្នុងពិធីប្រកាសទទួលស្គាល់សមាគមខ្មែរចិនអាណត្តិទី៦ ក្នុងស្រុកមង្គរបូរី ខេត្តបន្ទាយមានជ័យ ។
ពិធីនេះដោយមានពីឯកឧត្តម លោក លោកស្រីអភិបាល អភិបាលរងស្រុក ក្រុង មេបញ្ជាការ មេបញ្ជាការរងគ្រប់កងឯកភាព មន្ទីរ អង្គភាព ពាក់ព័ន្ធ ធ្វើនៅសាលារៀនចុងវ៉ា ស្រុកមង្គលបូរី ខេត្តបន្ទាយមានជ័យ ។
បន្ទាប់ពីរបាយការណ៍ ស្វាគមន៍របស់ លោក គួយ គាំ អគ្គលេខាធិការសមាគមខ្មែរ ចិនស្រុកមង្គលបូរី និងជានាយកសាលារៀនខ្មែរ ចិនចុងវ៉ា ស្តីពីលទ្ធផលការងារសម្រេចបាន ការរីកចម្រើន របស់សមាគមន៍រួចមក។
ពិធីប្រគល់សេចក្តីសម្រេច និងមតិប្តេជ្ញាចិត្តរបស់ លោក អ៊ឹង វណ្ណម៉ៅ ប្រធានសមាគមខ្មែរ ចិន ស្រុកមង្គលបូរី អាណត្តិទី៦ថ្មី មានមតិប្តេជ្ញាចិត្ត បន្តខិតខំរួមជាមួយអនុប្រធាន និងសមាជិក សមាជិកាទាំង២៩រូប ដើម្បីដឹកនាំសមាគមឲ្យកាន់តែមានការរីកចម្រើន និងមាននិរន្តរភាពទៅមុខប្រកបដោយប្រសិទ្ធិភាពថែមទៀត។
ថ្លែងសំណេះសំណាលក្នុងពិធីនោះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ថ្នាក់ដឹកនាំ សមាជិក សមាជិកាទាំងអស់របស់សមាគមខ្មែរ ចិនស្រុកមង្គលបូរី គ្រប់អាណត្តិដែលបានធ្វើឲ្យសមាគមមាននិរន្តរភាពការងារ និងសម្រេចបានលទ្ធផលគួរជាទីមោទនៈ។
ជាមួយគ្នានោះ ឯកឧត្តមអភិបាលខេត្តបានថ្លែងអំណរគុណចំពោះ លោក ចៅ គិមហាន ប្រធានទ្រទ្រង់សាលារៀនខ្មែរ ចិន ចុងវ៉ា ស្រុកមង្គលបូរី ដែលរស់នៅប្រទេសបារាំង ព្រមទាំងសប្បុរសជនជិតឆ្ងាយក្នុង និងក្រៅប្រទេស បានជួយឧបត្ថម្ភគាំទ្រដល់សមាគមឲ្យមានដំណើរការល្អតាំងពីដើម មកដល់បច្ចុប្បន្ននេះ នឹងធ្វើឲ្យសាលារៀនចិនចុងវ៉ា អាចមានលទ្ធភាពបង្រៀនសិស្សានុសិស្សទាំងភាសាខ្មែរ ចិន អង់គ្លេស ប្រមាណជិត៧០០នាក់ នាពេលបច្ចុប្បន្ននេះ។ នេះគឺជាការចូលរួមចំណែកយ៉ាងសំខាន់ជាមួយរាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះ រាជាណាចក្រកម្ពុជា ក្នុងការអភិវឌ្ឍន៍ធនធានមនុស្សដែលជាវិស័យអទិភាពក្នុងយុទ្ធសាស្ត្រចតុកោណ។
ជាមួយនោះឯកឧត្តម អ៊ុំ រាត្រី អភិបាលខេត្តបន្ទាយមានជ័យ សង្ឃឹមយ៉ាងមុតមាំថា ប្រធានសមាគម អនុប្រធាន សមាជិកទាំងអស់នៃអាណត្តិទី៦ថ្មីនេះនឹងបន្តខិតខំកសាងសមិទ្ធផលថ្មីបន្ថែមទៀត រួមសាមគ្គីគ្នាដឹកនាំសមាគមឲ្យមាននិរន្តភាព និងសម្រេចបានជោគជ័យតាមផែនការ សកម្មភាព និង លក្ខន្តិកៈការងាររបស់សមាគម៕
