មិនបញ្ចប់ត្រឹមខេត្តជុំវិញបឹងទន្លេសាបទេ សម្តេចតេជោ នឹងបន្តចុះទៅខេត្តព្រៃវែង ចុងសប្តាហ៍នេះ

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី បើទោះបីត្រូវបំពេញការងារពេញមួយសប្តាហ៍យ៉ាងមមាញឹកនៅតាមខេត្តជុំវិញបឹងទន្លេសាប ដើម្បីដោះស្រាយការលំបាករបស់កសិករដោយសារ ទឹកជំនន់យ៉ាងណាក្តី តែសម្តេចតេជោនាយករដ្ឋមន្ត្រី មិនឈប់សម្រាកនោះឡើយ ដោយបានកំណត់យកថ្ងៃទី៣០ ខែតុលា បន្តជួបពលរដ្ឋនៅក្នុងខេត្តព្រៃវែងបន្ថែមទៀត។

សម្តេចតេជោនាយករដ្ឋមន្ត្រី បានបញ្ជាក់លើហ្វេសប៊ុកទៀបភ្លឺថ្ងៃអង្គារ ទី២៥ ខែតុលា ឆ្នាំ២០២២នេះយ៉ាងដូច្នេះ [បេសកកម្មជួយប្រជាជនដែលរងគ្រោះ
ដោយជំនន់ទឹកភ្លៀងបានមកដល់ខេត្តពោធិ៍សាត់។ ព្រឹកនេះបន្ទាប់ពីជួបប្រជាជននៅខេត្តពោធិ៍សាត់ ខ្ញុំត្រូវចេញទៅបាយថ្ងៃត្រង់
នៅខេត្តកំពង់ឆ្នាំង។ បន្ទាប់ពីកាបញ្ចប់ការងារនៅខេត្តកំពង់ឆ្នាំងថ្ងៃទី២៦ ខ្ញុំត្រូវត្រឡប់ចូលភ្នំពេញ ដើម្បីដឹកនាំការងារចាំបាច់ដោយខានមិនបាន គឺការប្រជុំគណៈរដ្ឋមន្ត្រីឆ្លងច្បាប់ថវិកាសម្រាប់ការគ្រប់គ្រងឆ្នាំ២០២៣។ ថ្ងៃទី២៩ ខែតុលា ខ្ញុំត្រូវទៅកាន់ខេត្តកំពង់ធំ និងថ្ងៃទី៣០ ខែតុលា ត្រូវទៅកាន់ខេត្តព្រៃវែង]។

ឯកឧត្តម គន់ គីម ទេសរដ្ឋមន្ត្រីជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ក៏បានឱ្យដឹងថា សម្តេចតេជោ បានបញ្ជារូបលោក និងរដ្ឋមន្ត្រីកសិកម្ម ព្រមទាំងអភិបាលខេត្ត និងអ្នកពាក់ព័ន្ធ ឱ្យរៀបចំការងារចុះទៅខេត្តព្រៃវែងបន្ត។

តាមការចង្អុលបង្ហាញឲ្យនាយឧត្តមសេនីយ៍ គន់ គីម បានកត់សម្គាល់ថា សម្តេចតេជោ ហ៊ុន សែន បានយកចិត្តទុកដាក់ខ្ពស់ណាស់ចំពោះសុខទុក្ខប្រជាពលរដ្ឋ។ បើទោះបីត្រូវនឿយហត់ និងមានបេសកកម្មយ៉ាងមមាញឹកនៅតាមខេត្តជុំវិញបឹងទន្លេសាប តែសម្តេចមិនអាចបង្អែបង្អង់លើការងារចែកពូជស្រូវនោះឡើយ ដើម្បីជួយពលរដ្ឋបានទាន់ពេលវេលា។

សូមបញ្ជាក់ថា សម្តេចតេជោ ហ៊ុន សែន បានចាប់ផ្តើមបេសកកម្មការងារនៅខេត្តជុំវិញបឹងទន្លេសាប នៅថ្ងៃទី២១ ខែតុលា ឆ្នាំ២០២២ ក្រោយបញ្ចប់ការងារនៅខេត្តសៀមរាបរយៈពេលពីរថ្ងៃ នៅថ្ងៃទី២២ ខែតុលា សម្តេចតេជោបានបន្តដំណើរមកកាន់ខេត្តបន្ទាយមានជ័យ ដើម្បីជួបសំណេះសំណាលជាមួយមន្ត្រីរាជការ និងកម្លាំងប្រដាប់អាវុធ ព្រមទាំងចែកស្រូវពូជជូនប្រជាកសិកររងគ្រោះដោយទឹកជំនន់។។