វគ្គហ្វឹកហ្វឺនបំប៉ន នាយទាហានរង ថ្នាក់ពួក ក្រុមថ្មើរជើង និងជំនាញបញ្ជូនសារ នៅសាលាពលទាហានទី៤ យោធភូមិភាគទី៤ បានបញ្ចប់ដោយជោគជ័យ
ភ្នំពេញ៖ បន្ទាប់ពីបានឆ្លងកាត់ការសិក្សាអស់រយៈពេល៩១ថ្ងៃ វគ្គហ្វឹកហ្វឺនបំប៉ននាយទាហានរង ថ្នាក់ពួក ក្រុមថ្មើរជើង និងជំនាញបញ្ជូនសារ ឆ្នាំ២០២២ នៅសាលាពលទាហានទី៤ ត្រូវបានប្រារព្ធពិធីបិទ នៅថ្ងៃទី៧ ខែតុលា ឆ្នាំ២០២២ ក្រោមអធិបតីភាព ឯកឧត្តម ឧត្តមសេនីយ៏ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ ។
ឧត្តមសេនីយ៍ត្រី ឈឹង សារុន នាយកសាលាពលទាហានទី៤ បានឡើងអានមតិស្វាគមន៍ និងរបាយការណ៍ស្តីពីផែនការហ្វឹកហ្វឺន ឆ្នាំ២០២២ របស់កងយោធពលខេមរភូមិន្ទ និងដោយបានការយកចិត្តទុកដាក់ខ្ពស់ពីសំណាក់ឯកឧត្តម ឧត្តមសេនីយ៍ឯក មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ ការដំណើរការបើកវគ្គហ្វឹកហ្វឺនបំប៉ននាយទាហានរង ថ្នាក់ពួក ក្រុមថ្មើរជើង និងជំនាញបញ្ជូនសារ នៃ សាលាពលទាហានទី៤ យោធភូមិទី៤ សិក្សារយ:ពេល ៩១ថ្ងៃ មានសិក្ខាកាមសរុបចំនួ ១១៤នាក់ ។ ជាលទ្ធផលក្រោយបញ្ចប់វគ្គសិក្ខាកាមទទួលបាននិទ្ទេសល្អចំនួន ២៩នាក់ ស្មើរ ២៥,៤៣% និទ្ទេសល្អបង្គួរចំនួន ៤៥នាក់ ស្មើរ ៣៩,៤៧%’និងនិទ្ទេសមធ្យមចំនួន ៤០នាក់ ស្មើរ ៣៥,០៨% ។ បញ្ជាក់: ក្នុងនោះដែរសិក្ខាកាមដែលបានឆ្លងកាត់ការសិក្សា និងអនុវត្តន៍បាញ់គ្រាប់ពិតជាក់ស្តែងនៅលើទីលានដែលបាននិទ្ទេសល្អ ទទួលបានប័ណ្ណសរសើរ និងថវិការលើកទឹកចិត្តពី ឯកឧត្តម មេបញ្ជាការ មានចំនួន ៣៦នាក់។
តំណាងកម្មសិក្សាការីម្នាក់ បានឡើងប្តេជ្ញាចិត្ត ជៀសវាងការប្រព្រឹត្តល្បែងស៊ីសងពាលា និងជៀសអោយឆ្ងាយពីការប្រើប្រាស់នូវគ្រឿងញៀនគ្រប់ប្រភេទ ស្មោះត្រង់ដាច់ខាត ចំពោះជាតិ សាសនា ព្រះមហាក្សត្រ ហ៊ានធ្វើពលីកម្មដើម្បីការពារបូរណភាពទឹកដី អធិបតេយ្យភាពជាតិ ស្មោះត្រង់ចំពោះរាជរដ្ឋាភិបាល ដែលមាន សម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ និងគោរពប្រតិបត្តិ នូវច្បាប់រដ្ឋធម្មនុញ្ញ នៃព្រះរាជាណាចក្រកម្ពុជា លក្ខន្តិកៈ បទវិន័យទូទៅ និងវិន័យផ្ទៃក្នុងនៃកងយោធពលខេមរភូមិន្ទ ឲ្យបានដាច់ខាត។
នាឱកាសនេះ ឧត្តមសេនីយ៏ឯក ពៅ ហេង បានលើកឡើងពីព្រឹត្តិការណ៍ជាតិ អន្តរជាតិមួយចំនួនដែលកើតមានឡើង ជាពិសេសសភាពការណ៍ព្រំដែនរវាង កម្ពុជា និងថៃ ជានិច្ចកាលភាគីថៃតែងតែធ្វើការផ្លាស់ប្តូរកងកម្លាំងឈរជើងនៅក្នុងអំឡុង ខែតុលា ជារៀងរាល់ឆ្នាំ ដែលធ្វើអោយអង្គភាពឈរជើងនៅតាមខ្សែរបន្ទាត់ព្រំដែន ទិសយោធភូមិភាគទី៤ ត្រូវប្រុងប្រយ័ត្ន និងយកចិត្តទុកដាក់ យាមកាម បង្កើនកិច្ចការពារអោយបានខ្ពស់នៅសកម្មភាពនានាដែលកើតមាននៅតាមខ្សែរបន្ទាត់ព្រំដែនមិនអោយមានការបាត់បង់ជាដាច់ខាត។
ឯកឧត្តម ឧត្តមសេនីយ៍ឯក ពៅ ហេង បានថ្លែងអំណរគុណ យ៉ាងជ្រាលជ្រៅចំពោះ នាយកសាលាពលទាហានទី៤ ជំនាញដែលពាក់ព័ន្ធ និងគ្រូបង្គោលដែលបានខិតខំបង្ហាត់បង្រៀនយ៉ាងយកចិត្តទុកដាក់ ទើបវគ្គហ្វឹកហ្វឺននេះបានដំណើរការបញ្ចប់ប្រកបដោយលទ្ធផលផ្លែផ្កា និងមានប្រសិទ្ធភាពខ្ពស់។ ឯកឧត្តម បានធ្វើការកោតសរសើរ និងវាយតំលៃខ្ពស់ដល់សិក្ខាកាមទាំងអស់ ដែលខិតខំយកចិត្តទុកដាក់ប្រឹងប្រែងរៀនសូត្រ រហូតទទួលបានលទ្ធផលវិជ្ជមាន តាមតាររំពឹងទុក។
ឯកឧត្តម បានផ្តាំផ្ញើរដល់សិក្ខាកាមដែលទើបបញ្ចប់វគ្គនាពេលនេះ ពេលត្រឡប់ទៅអង្គភាពវិញ ត្រូវយកចំណេៈដឹងពីការរៀនសូត្រទៅបំរើអង្គភាពខ្លួន និងបន្តផ្សព្វផ្សាយបន្តជូនយោធិនរួមអាជីព បន្តខិតខំស្រាវជ្រាវឯកសារបន្ថែមទៀត ពង្រីកសកម្មភាពអភិវឌ្ឍន៏ឲ្យមានការីកចំរើនក្នុងអង្គភាពក៏ដូចជាជីវភាពរស់នៅតាមគ្រួសាររបស់ខ្លួនសំដៅរួមចំណែករួមកសាងលើកស្ទួយសេដ្ឋកិច្ចជាតិ និងប្រែក្លាយចំណេះដឹងខ្លួនឯងផងដែរ ។ ត្រូវបន្តពង្រឹងជំហរស្មោះត្រង់ដាច់ខាតការពារ ជាតិ សាសនា ព្រះមហាក្សត្រ បន្តចូលរួមអនុវត្តន៏គោលនយោបាយយុទ្ធសាស្ត្រចតុកោណរបស់រាជរដ្ឋាភិបាលគ្រប់តំណាក់កាល បន្តខិតខំកសាអង្គភាពរឹងមាំលើគ្រប់វិស័យ បន្តអនុវត្តន៏យ៉ាងម៉ឺងម៉ាត់រាល់បទបញ្ជារបស់ក្រសួងការពារជាតិ អគ្គបញ្ជាការ នៃកងយោធពលខេមរភូមិន្ទ បញ្ជាការដ្ឋានកងទ័ពជើងគោក និង យោធភូមិភាគទី៤ បានប្រគល់ជូន សហការជាមួយអជ្ញាធរដែនដីគ្រប់លំដាប់ថ្នាក់ដើម្បីភូមិ ឃុំមានសុវត្ថិភាព ត្រៀមចុះជួយប្រជាពលរដ្ឋជួបគ្រោះមហន្តរាយដោយធម្មជាតិ និងគោរព អនុវត្តន៍វិធាននានា របស់ក្រសួងសុខាភិបាល ទប់ស្កាត់ ការពារ ការរីករាលដាលជំងឺកូវីដ-១៩ ដែលពិភពលោកកំពុងប្រឈម និងសូមគាំទ្រដាច់ខាត ឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករមន្ត្រីនៃព្រះរាជាណាចក្រកម្ពុជានាពេលអនាគត ៕
