ក្រសួងបរិស្ថាន បើកកិច្ចប្រជុំលើកទី៤នៃគណកម្មការដឹកនាំគម្រោងនិរន្តរភាពតំបន់ការពារទេសភាពនិងទេសចរណ៍ធម្មជាតិកម្ពុជា ដើម្បីពិនិត្យវឌ្ឍនភាពលទ្ធផលសម្រេចបាន ឆ្នាំ២០២២ និងលើកទិសដៅឆ្នាំ២០២៣
ភ្នំពេញ៖ ក្រុមការងារគម្រោងនិរន្តរភាពតំបន់ការពារ ទេសភាពនិងទេសចរណ៍ធម្មជាតិកម្ពុជា បានរៀបចំកិច្ចប្រជុំលើកទី៤ នៃគណកម្មការដឹកនាំគម្រោង និរន្តរភាពតំបន់ការពារទេសភាពនិងទេសចរណ៍ធម្មជាតិកម្ពុជា ដើម្បីពិនិត្យវឌ្ឍនភាពនិងលទ្ធផលសម្រេចបាន ឆ្នាំ២០២២ និងផែនការសកម្មភាពនិងថវិកាឆ្នាំ២០២៣។
កិច្ចប្រជុំនេះបានធ្វើឡើង នៅថ្ងៃទី៦ ខែតុលា ឆ្នាំ២០២២ ក្រោមអធិតីភាព ឯកឧត្តម សៅ សុភាព រដ្ឋលេខាធិការក្រសួងបរិស្ថាន និងឯកឧត្តម ទិន ពន្លក រដ្ឋលេខាធិការក្រសួងបរិស្ថាន ព្រមទាំងមានការចូលរួមពីតំណាងក្រសួងមហាផ្ទៃ ក្រសួងសេដ្ឋកិច្ចនិងហិរញ្ញវត្ថុ ក្រសួងអភិវឌ្ឍន៍ជនបទ ក្រសួងវប្បធម៌និងវិចិត្រសិល្បៈ ក្រសួងធនធានទឹកនិងឧតុនិយម និងអ្នកពាក់ព័ន្ធ រៀបចំនៅក្រុងសៀមរាប និងការចូលរួមតាមប្រព័ន្ធអនឡាញហ្សូម។
គម្រោងនេះមានគោលបំណងធ្វើឲ្យប្រសើរនូវការគ្រប់គ្រងតំបន់ការពារធម្មជាតិ ជំរុញឱកាសសម្រាប់ការអភិវឌ្ឍទេសចរណ៍ធម្មជាតិ និងបង្កើនច្រវ៉ាក់តម្លៃអនុផលព្រៃឈើនៅតំបន់ជួរភ្នំក្រវាញនិងបឹងទន្លេសាប។ វិសាលភាពរបស់គម្រោង គឺគាំទ្រដល់ការគ្រប់គ្រងធនធានធម្មជាតិដែលមានផ្ទៃដីជាង ៣,៨លានហិកតា ក្នុងតំបន់ការពារធម្មជាតិកម្ពុជា ក្នុងខេត្តគោលដៅចំនួន៧ រួមមាន កោះកុង កំពង់ស្ពឺ កំពង់ឆ្នាំង ពោធិ៍សាត់ បាត់ដំបង កំពង់ធំ និងសៀមរាប។
គួរកត់សម្គាល់ថា គម្រោងនិរន្តរភាពតំបន់ការពារទេសភាពនិងទេសចរណ៍ធម្មជាតិកម្ពុជា ជាគម្រោងដំបូងបំផុតរបស់ធនាគារពិភពលោក និងមានក្រសួងបរិស្ថាន និងក្រសួងអភិវឌ្ឍន៍ជនបទ ជាភ្នាក់ងារប្រតិបត្តិគម្រោង៕
