សមិទ្ធផលនានា ក្នុងវត្តធម្មសាមគ្គីពង្រ តម្លៃជាង ៥១ម៉ឺនដុល្លារ ក្នុងសង្កាត់កំពង់ស្វាយ ត្រូវបានរៀបចំធ្វើបុណ្យឆ្លង និងសម្ពោធដាក់ឲ្យប្រើប្រាស់

ភ្នំពេញ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងលោកជំទាវ ជ័យ ណារី អ៊ុំរាត្រី កាលពីថ្ងៃទី២ ខែតុលា ឆ្នាំ២០២២ ម្សិលមិញ បានអញ្ជើញជាអធិបតី ក្នុងពិធីបុណ្យឆ្លងព្រះបរិយត្តិសិក្ខាសាលា និងសមិទ្ធផលនានា វត្តធម្មសាមគ្គីពង្រ ស្ថិតនៅភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ដែលមានតម្លៃជាង៥១ម៉ឺនដុល្លារអាមេរិក។

ឯកឧត្តម អ៊ុំ រាត្រី មានប្រសាសន៍ថា សមិទ្ធផលនានដែលបានកើតចេញមកនាពេលនេះ គឺផ្តើមមកពីកត្តានៃសុខសន្តិភាព ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី នៃព្រះរាជាណាចក្រកម្ពុជា ។ទន្ទឹមនឹងការខិតខំប្រឹងប្រែងការអភិវឌ្ឍវិស័យអាណាចក្រ សម្តេចតេជោ ក៏បានយកចិត្តទុកដាក់ខ្ពស់ខិតខំប្រឹងប្រែងក្នុងការអភិវឌ្ឍន៍វិស័យព្រះពុទ្ធសាសនា ដើម្បីជាប្រយោជន៍ក្នុងការចូលរួមពង្រឹង សាមគ្គីភាព ការលើកកម្ពស់វប្បធម៌ នៃការអធ្យាស្រ័យយោគយល់គ្នានៅក្នុងសង្គមជាតិ រាជរដ្ឋាភិបាល និងពុទ្ធសាសនិកទាំងអស់ បានលើកស្ទួយព្រះពុទ្ធសាសនាជាដរាប បន្តការពារ និងគោរពប្រតិបត្តិ ព្រះពុទ្ធសាសនា បន្តស្ថិតនៅ និងជ្រួតជ្រាបដល់ប្រជាជនខ្មែរគ្រប់រូប និងស្ថិតស្ថេរគង់វង្ស ស្របតាមបាវចនា ជាតិ សាសនា ព្រះមហាក្សត្រ ។

ឯកឧត្តម អភិបាលខេត្ត បញ្ជាក់ថា រាជរដ្ឋាភិបាលពិតជាត្រូវការវត្តមាន និងការចូលរួមទាំងស្មារតី សម្ភារៈ និងបញ្ញាញាណ ពីព្រះសង្ឃគ្រប់ព្រះអង្គ ពុទ្ធបរិស័ទ ដើម្បីរួមគ្នាកសាងកម្ពុជា ឲ្យក្លាយទៅជាសង្គមមួយដែលមានការអភិវឌ្ឍន៍រីកចម្រើន គ្មានអំពើហិង្សា គ្មានការរំលោភសិទ្ធិ និងសេចក្ដីថ្លៃថ្នូររបស់មនុស្ស ចូលរួមចំណែកធ្វើឲ្យសង្គមកម្ពុជា ឲ្យនៅតែជាសង្គមមួយដែលមានមូលធនសង្គមដ៏រឹងមាំ ពោលគឺជាសង្គមមួយដែលមានប្រជាជនមានចំណេះដឹងជ្រៅជ្រះ មានគុណធម៌ សីលធម៌ ចរិយាធម៌ សាមគ្គីធម៌ និងជាប្រទេសដែលសំបូររុងរឿង បន្តនូវ អរិយធម៌ខ្ពង់ខ្ពស់ត្រចេះត្រចង់ប្រកបដោយសុខសន្តិភាព ជានិរន្តរ៍។

សូមបញ្ជាក់ថា ព្រះបរិយត្តិសិក្ខាសាលា ១ខ្នង ដែលត្រូវសម្ពោធឆ្លង មានតម្លៃ ១៨៦,៥០០ដុល្លារ រួមនឹងសមិទ្ធផលនានានៅក្នុងវត្ត សរុបថវិកាអស់ចំនួន៥១៣,៥៣០ដុល្លារ ដែលមានការចួលរួមពីឧបាសិកាស៊ិន ស៊ីណា និងក្រុមគ្រួសារព្រមទាំងពុទ្ធបរិស័ទក្នុង និងក្រៅប្រទេស។

នាឱកាសនោះឯកឧត្តម អ៊ុំ រាត្រី ក៏បានបំពាក់គ្រឿង ឥស្សរិយយស និងប្រគល់លិខិតថ្លែងអំណរគុណ ជូនចំពោះសប្បុរសជន ដែលបានចូលរួមចំណែកកសាង សមិទ្ធផលនានានៅក្នុងវត្ត ព្រមទាំមបានចែកអំណោយជូនពលរដ្ឋចាសជរា ពលរដ្ឋមានជីវភាពខ្វះខាត ចំនួន៥០គ្រួសារ ជូនអំណោយដល់តាជីយាយជី លោកគ្រូ-អ្នកគ្រូ និងសិស្សានុសិស្សដែលបានចូលរួមផងដែរ ៕