អនុប្រធានទី២ ព្រឹទ្ធសភា៖ សាលា អ្នកគោលនយោបាយ និងវិស័យឯកជន ត្រូវផ្សារភ្ជាប់គ្នា ដើម្បីផលិត និងគាំទ្រផលិតផលក្នុងស្រុក

ភ្នំពេញ៖ ក្នុងឱកាសអញ្ជើញធ្វើបាឋកថាស្ដីពី “ឱកាសនៃការកែច្នៃអាហារ” ដល់សាស្រ្ដាចារ្យ និងនិស្សិត នៃសាកលវិទ្យាល័យភូមិន្ទភ្នំពេញ នារសៀលថ្ងៃទី២៦ ខែមករា ឆ្នាំ២០២៦ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានលើកឡើងនូវចក្ខុវិស័យវែងឆ្ងាយក្នុងការជំរុញសេដ្ឋកិច្ចជាតិ តាមរយៈការផ្សារភ្ជាប់ជាមួយការស្រាវជ្រាវក្នុងសាលាទៅកាន់ទីផ្សារជាក់ស្តែង និងការកសាង «សេដ្ឋកិច្ចពិត» (Real Economy) ដើម្បីធានាបាននូវឯករាជ្យភាពនៃផលិតផលក្នុងស្រុករបស់កម្ពុជា។

ឯកឧត្តមបណ្ឌិត ក៏បានបញ្ជាក់ថាគោលបំណងចម្បងនៃជំនួបនេះ គឺការបង្កើតបណ្ដាញទំនាក់ទំនងរវាង សាលារៀន អ្នកគោលនយោបាយ និងវិស័យឯកជន។

ឯកឧត្តមបានសង្កត់ធ្ងន់ថា សាលារៀនគឺជាមជ្ឈមណ្ឌលស្រាវជ្រាវដ៏ធំបំផុត ប៉ុន្តែផលិតផលទាំងនោះចាំបាច់ត្រូវមានការជ្រោមជ្រែងពីវិស័យឯកជន ដើម្បីរុញឱ្យចេញផុតពីរបងសាលាទៅដល់ដៃអ្នកប្រើប្រាស់។ នេះជាយុទ្ធសាស្ត្រថ្មី ដែលចង់ឱ្យនិស្សិតមិនត្រឹមតែរៀនទ្រឹស្ដី ប៉ុន្តែត្រូវចេះបង្កើតផលិតផលដែលអាចប្រកួតប្រជែងបាន ដោយប្រកាន់ភ្ជាប់គោលការណ៍ រៀននិងរក “Learn and Earn”។

ក្នុងឱកាសនោះដែរ ឯកឧត្តម បានបង្ហាញអំពីតម្រូវការចាំបាច់នៃធនធានមនុស្ស ដោយផ្ដោតសំខាន់លើជំនាញ និងសមត្ថភាពភាសា គឺនិស្សិតត្រូវតែចេះភាសាខ្មែរឱ្យច្បាស់ និងភាសាអង់គ្លេសឱ្យប្រាកដសម្រាប់ទំនាក់ទំនងអន្តរជាតិ និងការសិក្សាស្រាវជ្រាវ។ ចំពោះភាសាប្រទេសជិតខាងគួររៀនសូត្រដើម្បីអត្ថប្រយោជន៍ពាណិជ្ជកម្ម និងទេសចរណ៍៕