បរទេស៖ គណបក្សកាន់អំណាចរបស់ប្រទេសថៃ កំពុងរុំព័ទ្ធទៅដោយវិបត្តិសេដ្ឋកិច្ច និងបញ្ហាចាក់ស្រែះដូចសម្បុកពីងពាងនៅតំបន់ព្រំដែន ទន្លឹមនឹងការប្រឈមមុខភាពមិនច្បាស់លាស់កាន់តែខ្លាំងថែមទៀតក្នុងសប្តាហ៍នេះ ខណៈតុលាការកំពូលរបស់ថៃចាប់ផ្តើមបើកសវនាការលើសំណុំរឿងអ្នកនយោបាយដ៏មានឥទ្ធិពលបំផុតគឺលោក ថាក់ស៊ីន ឈិនៈវ័ត ដែលអាចឈានទៅដល់ការជាប់ពន្ធនាគារ។
នាមជាមហាសេដ្ឋីផង អតីតនាយករដ្ឋមន្ត្រីផង និងជាឆ្អឹងខ្នងនៅពីក្រោយរាជរដ្ឋាភិបាលរបស់កូនស្រីផង លោក ថាក់ស៊ីន ពេលធ្វើមាតុភូមិនិវត្តន៍កាលពីឆ្នាំ២០២៣ បន្ទាប់ពីនិរទេសខ្លួនរយៈពេល១៥ឆ្នាំ ក៏បានរួចផុតពីពន្ធនាគារ ដោយលោកបានចាយពេលការឃុំខ្លួនស្ទើរទាំងស្រុងនៅក្នុងមន្ទីរពេទ្យ ក្រោមហេតុផលសុខភាព។ យ៉ាងណា ក្នុងសប្តាហ៍នេះ អម្រែកនៃសម្ពាធ និងបញ្ហាកាន់តែច្រើនឡើងបានធ្លាក់ទៅលើអ្នកនយោបាយចំណូលថ្មី គឺលោកស្រី ថែថងថាន ឈិនៈវ័ត និងគណបក្សភឿថៃ ប្រសិនបើតុលាការចាត់ទុកថា ការឃុំខ្លួនរបស់លោក ថាក់ស៊ីន នៅមន្ទីរពេទ្យខុសច្បាប់មែននោះ ហើយលោក ថាក់ស៊ីន អាចជាប់ពន្ធនាគារ ខណៈកូនស្រីរបស់លោកកំពុងប្រឈមវិបត្តិទំនុកចិត្តរួចទៅហើយ ក្នុងនាមជានាយករដ្ឋមន្រ្តី ស្របពេលប្រជាជនថៃជាច្រើនអស់ជំនឿ ដោយសាររាជរដ្ឋាភិបាលមិនអាចដោះស្រាយរាល់វិបត្តិដែលកំពុងផុសឡើងជាលំដាប់បែបនេះ។
ជាក់ស្តែង ការឡើងកម្តៅនៃវិវាទព្រំដែនជាមួយកម្ពុជា ក៏បានធ្វើឱ្យរាជរដ្ឋាភិបាលថៃក្រោមការដឹកនាំរបស់លោកស្រី ផែថងថាន រងការប៉ះទង្គិចជាមួយយោធាដ៏មានឥទ្ធិពលខាងនយោបាយរបស់ប្រទេសថៃផងដែរ ខណៈរបបយោធាថៃធ្លាប់បានផ្តួលរំលំអតីតរាជរដ្ឋាភិបាល ថាក់ស៊ីន ឈិនៈវ័ត ក្នុងឆ្នាំ២០០៦ និងលោកស្រី យីងឡាក់ ឈិនៈវ័ត ក្នុងឆ្នាំ២០១៤។ ជាមួយគ្នានេះ ក្រុមជាតិនិយមកំពុងពិនិត្យមើលការដោះស្រាយកិច្ចចរចាសំខាន់ៗរបស់រាជរដ្ឋាភិបាលជាមួយប្រទេសជិតខាង[គឺកម្ពុជា] ក្នុងកិច្ចចរចាគណកម្មាធិការព្រំដែនចម្រុះ (JBC) នៅថ្ងៃទី១៤មិថុនាខាងមុខនេះ ចំពេលកើនឡើងនូវភាពមិនសប្បាយចិត្តជាសាធារណៈ ជុំវិញការគ្រប់គ្រងសេដ្ឋកិច្ចដែលកំពុងជាប់គាំង។ ជាមួយគ្នានេះ ក្រុមអ្នកវិភាគអះអាងថា លទ្ធផលអវិជ្ជមានលើសំណុំរឿងលោក ថាក់ស៊ីន សម្ពាធសេដ្ឋកិច្ច និងជម្លោះព្រំដែន នឹងជំរុញឱ្យមានសម្ពាធលើរាជរដ្ឋាភិបាលបច្ចុប្បន្ន និងគណបក្សភឿថៃ ទាំងនៅក្នុងក្រុមចម្រុះ និងក្នុងចំណោមសាធារណជន។
រដ្ឋបាលបក្សភឿថៃកំពុងដោះស្រាយដើម្បីរកច្រកចេញពីជម្លោះព្រំដែនជាមួយកម្ពុជាកុំឱ្យអូសបន្លាយយូរជាងនេះ។ យ៉ាងណា អ្នកឯកទេសខាងវិទ្យាសាស្រ្តនយោបាយបានសន្មតថា កិច្ចពិភាក្សា JBC ជាមួយកម្ពុជាខាងមុខនេះ ប្រហែលជាមិននាំទៅរកដំណោះស្រាយនោះទេ។
ឥឡូវនេះ ប្រទេសថៃកំពុងប្រឈមមុខនឹងបញ្ហាសន្តិសុខ ហើយក្រុមជាតិនិយមជ្រុលកំពុងកើនឡើង ដូចផ្សិតត្រូវទឹក ស្របពេលការដឹកនាំរបស់រាជរដ្ឋាភិបាលមានភាពទន់ខ្សោយ។ ប្រការនេះ នាំឱ្យប្រជាជនថៃមួយចំនួនបានចាប់ផ្ដើមអំពាវនាវឱ្យមានរដ្ឋប្រហារ។
ក្រៅតែពីវិវាទដីព្រំដែនជាមួយកម្ពុជា ថៃក៏ប្រឈមភាពតានតឹងកាន់តែខ្លាំងឡើងនៅតាមព្រំដែនថៃ-មីយ៉ាន់ម៉ាផងដែរ ខណៈការបោះបង្គោលព្រំដែនមិនទាន់ច្បាស់លាស់ ដែលនាំឱ្យមានការប៉ះទង្គិចគ្នារវាងទាហានថៃ និងទាហានរបបសឹកមីយ៉ាន់ម៉ា។
ចំណែកឯខេត្តនៅជាប់ព្រំដែនភាគខាងត្បូងជាមួយប្រទេសម៉ាឡេស៊ី ក៏រមែងផុសឡើងនូវភាពចលាចលថ្មីៗ ដែលនាំឱ្យជម្លោះកម្រើកឡើងវិញឥតល្ហែ រវាងពុទ្ធសាសនិក និងសាសនិកអ៊ិស្លាមនៅក្នុងតំបន់ ដែលរួមមានខេត្តចំនួន៤ គឺខេត្តយ៉ាឡា, ប៉ាតានី, នារ៉ាធីវ៉ាត និងខេត្តស៊ុងក្លា។ ទាំងនេះហើយ ជាទឡ្ហីករណ៍យ៉ាងប្រត្យក្សជុំវិញភាពផុយស្រួយនៃគណបក្សភឿថៃ និងកម្សោយនៃរាជរដ្ឋាភិបាល ដែលជំរុញឱ្យមានការតវ៉ាប៉ះបោរ ឬក៏អាចឈានដល់មានរដ្ឋប្រហារពីសំណាក់ក្រុមជាតិនិយមជ្រុល(ថៃ)ក៏ថាបាន៕
