សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចូលរួមរំលែកមរណទុក្ខជាមួយគ្រួសារសព ប្តីប្រពន្ធដែលស្លាប់ដោយដើមសំរ៉ងសង្កត់លើនៅស្រុកបូទុមសាគរខេត្តកោះកុង
ភ្នំពេញ៖ នៅថ្ងៃសុក្រ ទី២៥ ខែមេសា ឆ្នាំ២០២៥នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឯកឧត្តមវេជ្ជ. អ៊ុយ សំអុន នាយកនាយកដ្ឋានគ្រប់គ្រងគ្រោះមហន្តរាយ និងសហការី ដោយមានការចូលរួមពីក្រុមប្រតិបត្តិសាខាកាកបាទក្រហមកម្ពុជាខេត្តកោះកុង និងអនុសាខាកាកបាទក្រហមកម្ពុជា ស្រុកបូទុមសាគរ ចូលរួមរំលែកមរណទុក្ខដ៏ក្រៀមក្រំបំផុតជាមួយក្រុមគ្រួសារសពប្តីប្រពន្ធដោយប្តីឈ្មោះ ឪ រិទ្ធ អាយុ៣៧ឆ្នាំ និងប្រពន្ធឈ្មោះ យ៉ាន់ សំភស់ អាយុ៤១ឆ្នាំ ដែលស្លាប់ដោយគ្រោះឧបទ្ទវហេតុដើមសំរ៉ងសង្កត់លើក្នុងពេលប្រមូលផ្លែសំរ៉ងកាលពីថ្ងៃទី២២ ខែមេសា ឆ្នាំ២០២៥ ដើម្បីយកទៅលក់ចិញ្ចឹមជីវិតបន្ថែមលើរបរនេសាទ រស់នៅក្នុងភូមិជីត្រេះ ឃុំអណ្តូងទឹក ស្រុកបូទុមសាគរ ខេត្តកោះកុង។
ស្ថិតក្នុងសមានទុក្ខដ៏ក្រៀមក្រំសោកសង្រេងជាទីបំផុតជាមួយក្រុមគ្រួសារសព ឯកឧត្តមវេជ្ជ. អ៊ុយ សំអុន បានមានប្រសាសន៍ថា ការមកចូលរួមរំលែកមរណទុក្ខនៅពេលនេះគឺធ្វើឡើងបន្ទាប់ពីទទួលបានព័ត៌មានដល់រន្ធត់ និងសោកសង្រេងនេះភ្លាម សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចាត់រូបឯកឧត្តមមកចូលរួមផ្ទាល់ ដោយនាំយកថវិកាចំនួន១០លានរៀល និងគ្រឿងឧបភោគបរិភោគមួយចំនួន ព្រមជាមួយនូវប្រសាសន៍ផ្តាំផ្ញើរំលែកទុក្ខដ៏ក្រៀមក្រំបំផុតជាមួយក្រុមគ្រួសារសព ដែលបានរងគ្រោះដោយដលមសំរ៉ងសង្កត់លើបណ្តាលឲ្យបាត់បង់ជីវិតប្តីប្រពន្ធចោលកូនទាំង៥នាក់គួរឱ្យសោកសង្រេង និងខ្លោចផ្សារជាទីបំផុត និងសូមបួងសួងដល់វិញ្ញាណក្ខន្ធសពលោក ឪ រិទ្ធ និងអ្នកស្រី យ៉ាន់ សំភស់ បានទៅកាន់សុគតិភពកុំបីឃ្លៀងឃ្លាតឡើយ។
ឯកឧត្តមវេជ្ជ. បន្តថាពេលនេះក្មួយបាត់បង់ឪពុកម្តាយ តែក្មួយៗនៅមានលោកយាយលោកតា និងអ៊ុំពូមីងដូច្នេះក្មួយៗទាំងប្រាំត្រូវខិតខំរៀនសូត្រនិងស្តាប់ដំបូន្មានលោកយាយលោកតា ធ្វើជាចៅល្អ ក្មេងល្អ និងជាពលរដ្ឋល្អក្នុងសង្គម ។
ទន្ទឹមគ្នានេះ បន្ថែមលើការចូលរួមបុណ្យសពចំនួន៤០ម៉ឺនរៀល ដើម្បីជួយសម្រាលបន្ទុកលោកយាយលោកតាដែលត្រូវមើលថែចៅកំព្រាទាំង៥ដែលឪពុកម្តាយស្លាប់ចោលនោះលោកជំទាវ មិថុនា ភូថង អភិបាលខេត្តនិងជាប្រធានគណ:កម្មាធិការកាកបាទក្រហមកម្ពុជាខេត្តកោះកុង សម្រេចជួយឧបត្ថម្ភរាល់៣ខែម្តងនូវអង្ករ៣០គីឡូក្រាម មីត្រីខ ទឹកសុទ្ធ និងថវិកា៦ម៉ឺនរៀលរហូតដល់អាចមានលទ្ធភាពចិញ្ចឹមខ្លួនឯងបាន។
គ្រួសារសព បានគោរពថ្លែងអំណរគុណ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានចាត់មន្ត្រីមកចូលរួមរំលែកមរណទុក្ខក្នុងខណៈកំពុងរងទុក្ខដ៏សោកសៅនាពេលនេះ និងសូមគោរពជូនពរសម្តេចកិត្តិព្រឹទ្ធបណ្ឌិត សូមមានសុខភាពល្អបរិបូណ៌ កម្លាំងមាំមួន និងជន្មាយុយឺនយូរ។ជាមួយគ្នានេះក៏សូមអរគុណលោកជំទាវ មិថុនា ភូថង និងសាខាកាកបាទក្រហមកម្ពុជាខេត្តកោះកុងដែលបានចូលរួមបុណ្យសពនិងជួយឧបត្ថម្ភស្បៀងនិងថវិកាសម្រាប់ជួយទ្រទ្រង់ដល់ការរស់នៅរបស់ចៅៗកំព្រាទាំង៥រាល់៣ខែម្តងរហូតដល់អាចមានលទ្ធភាពចិញ្ចឹមខ្លួនឯងបាន។
ឆ្លៀតក្នុងឱកាសនោះដែរ អនុវត្តតាមអនុសាសន៍ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមម្ពុជា ក្រុមការងារកាកបាទក្រហមកម្ពុជាបានបន្តចុះជួបសួរសុខទុក្ខ និងចែកអំណោយមនុស្សធម៌សម្រាលការលំបាកជូនប្រជាពលរដ្ឋងាយរងគ្រោះបំផុតចំនួន២០គ្រួសារ ក្នុងឃុំអណ្តូងទឹក ស្រុកបូទុមសាគរ ខេត្តកោះកុង។ គ្រួសារនីមួយៗទទួលបាន ឭ៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកស៊ីអ៊ីវ ១យួរ, ឃីត (មុង ភួយ សារុង ក្រមា) ១ឃីត និងថវិកាមួយចំនួន៕
