សមាជិកសភាបក្សប្រឆាំងកំពូលថៃ៖ កិច្ចខិតខំប្រឹងប្រែងកំពុងបន្តផ្តោតលើការបង្ក្រាបប្រតិបត្តិការឆបោក តាមព្រំដែនថៃ-មីយ៉ាន់ម៉ា អាចសង្គ្រោះមនុស្សមួយចំនួនតូចប៉ុណ្ណោះ
បាងកក៖ សមាជិកសភាបក្សប្រឆាំងកំពូលថៃ លោក រាំងស៊ីម៉ាន រ៉ូម បានលើកឡើងថា កិច្ចខិតខំប្រឹងប្រែងកំពុងបន្តផ្តោតលើការបង្ក្រាបប្រតិបត្តិការឆបោកនៅតាមព្រំដែនប្រទេសថៃ ជាមួយប្រទេសមីយ៉ាន់ម៉ា អាចសង្គ្រោះមនុស្សមួយចំនួនតូចប៉ុណ្ណោះ ខណៈលោកអំពាវនាវឱ្យមានវិធានការទូលំទូលាយបន្ថែមទៀត ដើម្បីលុបបំបាត់ឧស្សាហកម្មខុសច្បាប់ដែលកំពុងរីកចម្រើននេះ។
ថៃ ដោយមានការគាំទ្រពីប្រទេសចិន កំពុងជំរុញឱ្យរុះរើមជ្ឈមណ្ឌលឆបោកនៅក្នុងតំបន់ម្យ៉ាវ៉ាឌី Myawaddy របស់ប្រទេសមីយ៉ាន់ម៉ា ជាផ្នែកនៃបណ្តាញប្រតិបត្តិការខុសច្បាប់ និងទទួលបានប្រាក់ចំណេញខ្ពស់នៅទូទាំងអាស៊ីអាគ្នេយ៍ ដោយមនុស្សរាប់សែននាក់ ត្រូវបានជួញដូរដោយក្រុមឧក្រិដ្ឋជនក្នុងប៉ុន្មានឆ្នាំថ្មីៗ នេះបើយោងតាមអង្គការសហប្រជាជាតិ។ លោក រាំងស៊ីម៉ាន ប្រធានគណៈកម្មាធិការរបស់សភា ស្តីពីសន្តិសុខជាតិ និងកិច្ចការព្រំដែន បានលើកឡើងថា មនុស្ស៣សែននាក់កំពុងប្រតិបត្តិការនៅក្នុងបរិវេណឆបោកក្នុងតំបន់ម្យ៉ាវ៉ាឌី ក្នុងនោះតិចជាង១ម៉ឺននាក់ ត្រូវបានជួយសង្គ្រោះ។
នៅក្នុងសភាកាលពីថ្ងៃព្រហស្បតិ៍ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា បាននិយាយថា បញ្ហាមជ្ឈមណ្ឌលឆបោក គឺជាបញ្ហាបន្ទាន់ដែលរាជរដ្ឋាភិបាលកំពុងដោះស្រាយ។ មជ្ឈមណ្ឌលឆបោកនៅជុំវិញតំបន់ម្យ៉ាវ៉ាឌី និងទីប្រជុំជនព្រំដែនផ្សេងទៀត បានដំណើរការអស់ជាច្រើនឆ្នាំ។ ថៃបានកាត់ផ្តាច់ការផ្គត់ផ្គង់អគ្គិសនី អ៊ីនធឺណិត និងប្រេងឥន្ធនៈ ទៅកាន់តំបន់ព្រំដែនមួយចំនួន រួមទាំងតំបន់ម្យ៉ាវ៉ាឌី។ ជនបរទេសជាង៧០០០នាក់ ភាគច្រើនមកពីប្រទេសចិន កំពុងរង់ចាំធ្វើដំណើរពីតំបន់ម្យ៉ាវ៉ាឌី ទៅកាន់ប្រទេសថៃ ខណៈពេលរាជធានីបាងកកកំពុងសម្របសម្រួលជាមួយស្ថានទូតជាច្រើន ដើម្បីសម្រួលការធ្វើមាតុភូមិនិវត្តន៍របស់ពួកគេ។
យ៉ាងណាមិញ បើតាមលោក រាំងស៊ីម៉ាន តំណាងឱ្យគណបក្សប្រជាជនប្រឆាំង អាជ្ញាធរថៃមិនទាន់ចាប់បានមេខ្លោងដែលកំពុងប្រតិបត្តិការឆបោកនោះទេ។ អ្នកទាំងនោះរួមមាន៖ វរសេនីយ៍ឯក សៀវ ឈិតធូ (Saw Chit Thu) ជាមេទ័ពមីយ៉ាន់ម៉ាដែលគ្រប់គ្រងតំបន់ជុំវិញម្យ៉ាវ៉ាឌី។ លោក រាំងស៊ីម៉ាន សង្ស័យថា មានទំនាក់ទំនងរវាងលោក សៀវ ឈិតធូ ដែលដឹកនាំកងទ័ពជាតិការ៉ែន(Karen) និងមន្ត្រីថៃ។ លោកសង្កត់ធ្ងន់ថា៖«ដល់ពេលហើយ ដើម្បីបញ្ឈប់អំពើពុករលួយនៅប្រទេសថៃ»៕
