លោក ជា ធីរិទ្ធ ត្រូវបានព្រះមហាក្សត្រផ្ដល់គោរម្យងារជា ឯកឧត្តម នឹងត្រូវបំពេញតួនាទីជានាយករងខុទ្ទកាល័យ សម្ដេចតេជោ ហ៊ុន សែន ប្រធានព្រឹទ្ធសភា
ភ្នំពេញ៖ អតីតក្មេងរស់ព្រោះបាយវត្ត លោក ជា ធីរិទ្ធ ដែលប្រសូតចេញគ្រួសារកសិករ ដែលមានឳពុកជាអ្នកឡើងត្នោត ត្រូវបានព្រះមហាក្សត្រផ្ដល់គោរម្យងារជា ឯកឧត្តម នឹងត្រូវបំពេញតួនាទីជានាយករងខុទ្ទកាល័យ និងជាជំនួយការសម្ដេចតេជោ ហ៊ុន សែន ប្រធានព្រឹទ្ធសភា នីតិកាលទី៥ ឋានៈស្មើរដ្ឋលេខាធិការ។
មុនទទួលបានគោរមងារជាឯកឧត្ដម នាពេលនេះ លោក ជា ធីរិទ្ធ ធ្លាប់ត្រូវបានតែងតាំងជាជំនួយការសម្ដេចតេជោ កាលពីចុងនីតិកាលទី៦ នៃរដ្ឋសភា និងជំនួយការនាយករដ្ឋមន្ត្រី សម្ដេចធិបតី ហ៊ុន ម៉ាណែត នានីតិកាលទី៧។
ក្នុងបទសម្ភាសន៍ជាមួយប្រព័ន្ធផ្សព្វផ្សាយ លោក ជា ធីរិទ្ធ អះអាងថា ពីដើមឡើយលោកមិនធ្លាប់ស្រមៃថាទទួលបានតំណែងនេះឡើយ ព្រោះកាលនៅរៀនឯស្រុកកំណើត លោកមិនហ៊ានទាំងស្រមៃថារៀនចប់វិទ្យាល័យផង ក៏ព្រោះតែអ្នកជុំវិញខ្លួនក៏ដូចជាបងប្អូន បានឈប់រៀនទាំងមិនចប់អនុវិទ្យាល័យ៕
