រាជរដ្ឋាភិបាល កំពុងខិតខំប្រឹងប្រែង ដើម្បីសម្រេចនូវសមិទ្ធផលថ្មីៗជាច្រើនទៀត ក្នុងការលើកស្ទួយកេរ្តិ៍ឈ្មោះរបស់កម្ពុជាឱ្យកាន់តែលេចធ្លោខ្ពស់ត្រដែតនៅលើឆាកអន្តរជាតិ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា រាជរដ្ឋាភិបាល បាននិងកំពុងខិតខំប្រឹងប្រែង ដើម្បីសម្រេចនូវសមិទ្ធផលថ្មីៗជាច្រើនទៀត ក្នុងការលើកស្ទួយកេរ្តិ៍ឈ្មោះរបស់កម្ពុជាឱ្យកាន់តែលេចធ្លោខ្ពស់ត្រដែតនៅលើឆាកអន្តរជាតិ តាមរយៈការដាក់បញ្ចូលសម្បត្តិវប្បធម៌កម្ពុជាមួយចំនួន ទៅក្នុងបញ្ជី-បេតិកភណ្ឌពិភពលោក និង បេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ។
ក្នុងពិធីទទួលវត្ថុបុរាណខ្មែរ ដែលបានប្រគល់ជូនព្រះរាជាណាចក្រកម្ពុជាវិញ នៅវិមានសន្តិភាព រាជធានីភ្នំពេញ នាព្រឹកថ្ងៃទី២២ ខែសីហា ឆ្នាំ២០២៤នេះ សម្ដេចធិបតី បានបង្ហាញការប្តេជ្ញាចិត្តរបស់រាជរដ្ឋាភិបាល ក្នុងការការពារ, ការទប់ស្កាត់អំពើចោរកម្ម, ការចរាចរ និង ការជួញដូរខុសច្បាប់នៃសម្បត្តិវប្បធម៌ ក៏ដូចជាការស្វែងរក និង ទាមទារយកមកវិញនូវមរតកវប្បធម៌ជាតិ បានស្តែងចេញតាមរយៈការអនុវត្តច្បាប់ ទាំងច្បាប់ជាតិ, អន្តរជាតិ, អនុសញ្ញាអង្គការយូណេស្កូដែលកម្ពុជា បានធ្វើសច្ចាប័ន និង កិច្ចព្រមព្រៀងទ្វេភាគីជាមួយប្រទេសមួយចំនួន ក៏ដូចជា តាមរយៈកិច្ចសហការ ជាមួយបណ្តាប្រទេសនានា រួមទាំងអ្នកជំនាញជាតិ អន្តរជាតិ ជាច្រើននាក់ទៀត ដែលបានជួយជ្រោមជ្រែងលើកិច្ចការនេះ។
លទ្ធផលនៃកិច្ចខិតខំប្រឹងប្រែងទាំងនេះ បានអនុញ្ញាតឱ្យកម្ពុជាអាចនាំយកមកមាតុប្រទេសវិញជាបន្តបន្ទាប់នូវសម្បត្តិបេតិកភណ្ឌវប្បធម៌ជាតិ ដែល បានបាត់បង់កន្លងមក តាមរយៈការប្រគល់ដោយស្ម័គ្រចិត្ត, ការចរចា, ការរឹបអូស, ការទាមទារ និង ការប្ដឹងផ្តល់គ្នាតាមផ្លូវតុលាការ។ល។ បច្ចុប្បន្ន, កម្ពុជាកំពុងធ្វើការស្រាវជ្រាវជាបន្ត, ពីព្រោះ គ្មានវិនាទីណាមួយដែលកូនខ្មែរអាចបំភ្លេចនូវព្រលឹងដូនតា និង អត្តសញ្ញាណជាតិខ្លួនបានឡើយ ៕
