ភ្នំពេញ៖ មន្រ្តីជំនាញផ្នែកម្ហូបអាហារនៃសាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) បានបន្តអនុវត្តសកម្មភាពចុះអង្កេតការលក់ដូរសាច់បង្កកនៅតាមទីផ្សារតាមបណ្ដារាជធានី-ខេត្ត ដោយក្នុងនោះបានរកឃើញសាច់បង្កក ប្រហិតចម្រុះប្រមាណជាង៤៧,៦គីឡូក្រាម ពុំមានអនុលោមភាពទៅតាមច្បាប់។
បើតាមហ្វេសប៊ុករបស់ក្រសួងពាណិជ្ជកម្ម នៅថ្ងៃទី១៥ ខែសីហា ឆ្នាំ២០២៤ បានឱ្យដឹង មន្រ្តីជំនាញផ្នែកម្ហូបអាហារនៃសាខា ក.ប.ប. បាននាំយករថយន្តពិសោធន៍ម្ហូបអាហារ ចុះត្រួតពិនិត្យម្ហូបអាហារនៅតាមបណ្តាទីផ្សារ ផ្ទះលក់ទំនិញ និងសិប្បកម្មផលិតចែកចាយនំបញ្ចុក តាមភូមិសាស្ត្រសំខាន់ៗចំនួន៤ រួមមាន៖ ខេត្តស្វាយរៀង តាកែវ កណ្ដាល និងបាត់ដំបង ដោយក្នុងគោលបំណងដើម្បីធានាឱ្យបាននូវការចរាចរទំនិញ ដែលមានសុវត្ថិភាពជូនប្រជាពលរដ្ឋ ជាពិសេសទប់ស្កាត់ទំនិញពុំមានអនុលោមភាព ដែលប៉ះពាល់ដល់សុខភាពអ្នកប្រើប្រាស់ រំលោភសិទ្ធិអ្នកប្រើប្រាស់ និងការប្រកួតប្រជែងមិនស្មោះត្រង់ជាដើម។
ជាមួយគ្នា នៅក្នុងការចុះត្រួតពិនិត្យ និងតាមដាន មន្រ្តីជំនាញផ្នែកម្ហូបអាហារបានធ្វើការត្រួតពិនិត្យលើទំនិញចម្រុះគ្រប់ប្រភេទប្រមាណជិត៤០សំណាកគំរូ ដោយក្នុងនោះមានដូចជា៖ សាច់បង្កក ប្រហិតចម្រុះ បន្លែ តំណាប់ ជ្រក់ គ្រឿងសមុទ្ទ ម្ហូបអាហារក្រៀម និងនំបញ្ចុក។ ក្រោយការពិនិត្យសំណាកគំរូប្រមាណជាង៤០ សមត្ថកិច្ចបានរកឃើញសាច់បង្កក និងប្រហិតខូចគុណភាពប្រមាណ៤៧,៦គីឡូក្រាម ដែលពុំមានអនុលោមភាព។ យ៉ាងណា បន្ទាប់មករកឃើញថា មានទំនិញមិនមានគុណភាព មន្រ្តីជំនាញផ្នែកម្ហូបអាហារបានដកហូតទំនិញទាំងអស់ទៅកម្ទេច និងដុតបំផ្លាញចោលតាមនីតិវិធី។
គួរបញ្ជាក់ផងដែរថា កាលពីថ្ងៃទី១១ ខែសីហា ឆ្នាំ២០២៤ មន្រ្តីជំនាញផ្នែកម្ហូបអាហារនៃសាខា ក.ប.ប. បានរកឃើញសាច់បង្កកជិត៧តោនក្នុងរថយន្តមួយដែលជួបគ្រោះថ្នាក់ចរាចរណ៍នៅផ្លូវល្បឿនលឿនត្រង់ចំណុចភូមិសម្បូរ ឃុំតាំងស្យា ស្រុកភ្នំស្រួច ដោយក្នុងនោះមានពងត្រីបង្កក ប្រហិតសាច់មាន់ប្រឡាក់ម្សៅប្រហិតសេងឡុង SHENG LONG ប្រហិតបន្ទះសាច់មាន់ប្រឡាក់ម្សៅ សាច់មាន់ចង្កាក់ប្រឡាក់គ្រឿង ឈាមទា ពោះគោ ព្រុយត្រីសាម៉ុន កន្ទុយជ្រូក សាច់មាន់ សាច់គោ ក្រលៀនគោ ពោះវៀនជ្រូក និងឆ្អឹងជំនីជ្រូក ដែលក្នុងមានចំនួនសរុបចំនួន៤៣៨កេស ស្មើនឹង៦តោន និង១៩៩គីឡូក្រាម។
គួររំលឹកថា ក្រសួងពាណិជ្ជកម្ម និងក្រសួងកសិកម្មកាលពីថ្ងៃទី១២ ខែមករា ឆ្នាំ២០២៤ បានចេញសេចក្តីប្រកាសព័ត៌មាន ដោយចេញវិធានការហាមឃាត់ជាដាច់ខាតនូវការនាំចូលនូវគ្រឿងក្នុងនិងបំណែកសាច់បង្កកជាបណ្តោះអាសន្ន សម្រាប់រយៈពេលប្រាំមួយខែ ៕
