ឧត្តមសេនីយ៍ទោ សោម ស៊ុន ដឹកនាំកម្លាំងចម្រុះ ត្រួតពិនិត្យការកាប់ទន្ទ្រានព្រៃឈើយកដីរដ្ឋធ្វើកម្មសិទ្ធិ នៅតំបន់ខ្សាច់វែង ក្នុងសហគមន៍ក្បាលអូរក្រញ៉ាក ក្នុងភូមិសាស្រ្តស្រុកសណ្ដាន់ ខេត្តកំពង់ធំ

ភ្នំពេញ៖ នៅព្រឹកថ្ងៃទី២២ ខែកក្កដា ឆ្នាំ២០២៤ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធាន អចិន្ត្រៃយ៍គណៈកម្មការការពារ គ្រប់គ្រង និងបង្ក្រាបទល្មើសធនធានធម្មជាតិ ក្នុងភូមិសាស្ត្រខេត្តកំពង់ធំ បានបន្តដឹកនាំកងកម្លាំងទាំងបី មន្ត្រីស្ថាប័នជំនាញពាក់ព័ន្ធ និងប្រធានសហគមន៍ ទៅត្រួតពិនិត្យសកម្មភាពការកាប់ទន្ទ្រានព្រៃឈើយកដីរដ្ឋធ្វើកម្មសិទ្ធិ របស់ក្រុមជនល្មើសមួយចំនួនក្នុងភូមិសាស្ត្រតំបន់ខ្សាច់វែង ស្ថិត ក្នុងតំបន់សហគមន៍ក្បាលអូរក្រញ៉ាក ស្ថិតក្នុងឃុំមានរិទ្ធ ស្រុកសណ្ដាន់ ខេត្តកំពង់ធំ។

លោក នន់ ឡាង អនុប្រធានសហគមន៍ក្បាលអូរក្រញ៉ាកបានបញ្ជាក់ថា តំបន់ដែលមានការកាប់បំផ្លាញនេះឈ្មោះហៅថាតំបន់ខ្សាច់វែង ក្នុងតំបន់សហគមន៍ក្បាលអូរក្រញ៉ាក ស្ថិតនៅក្នុងឃុំមានរិទ្ធ ស្រុកសណ្ដាន់ ខេត្តកំពង់ធំ ដែលមានផ្ទៃដីប្រមាណជាជាង១៥ ហិកតា ដែលជាផ្ទៃដីត្រូវបានជនល្មើសលួចកាប់ទន្ទ្រានថ្មីក្នុងរដូវប្រាំងកន្លងទៅនេះ នៅក្នុងចន្លោះមុនពេលចូលឆ្នាំថ្មីប្រពៃណីខ្មែរ មុនពេលកងកម្លាំងចម្រុះមកបំពេញបេសកកម្មការពារ ទប់ស្កាត់ និងបង្រាបបទល្មើសធនធានធម្មជាតិ។

ឧត្តមសេនីយ៍ទោ សោម ស៊ុន ក្នុងនាមអនុប្រធានអចិន្ត្រៃយ៍គណៈកម្មការការពារ គ្រប់គ្រង និងបង្ក្រាបបទល្មើសធនធានធម្មជាតិខេត្តកំពង់ធំ បានថ្លែងនូវការសោកស្ដាយចំពោះការបាត់បង់នូវធនធានធម្មជាតិ ដែលត្រូវរងការកាប់ទន្ទ្រានយកដីធ្វើជាកម្មសិទ្ធិពីសំណាក់ជនល្មើស និងបានណែនាំដល់មន្ត្រីជំនាញដែលមានការពាក់ព័ន្ធ ប្រធាន អនុប្រធានព្រៃសហគមន៍រួមជាមួយកងកម្លាំងចម្រុះ ត្រូវគ្រប់គ្រងឲ្យបាននូវផ្ទៃដីដែលបានកាប់ទន្ទ្រានយកដោយខុសច្បាប់ទាំងនេះ ឲ្យបានគង់វង្សនឹងដាច់ខាតត្រូវស្រាវជ្រាវវែករកមុខសញ្ញាជនល្មើស ដើម្បីកសាងសំណុំរឿងបញ្ជូនទៅតុលាការ ផ្ដន្ទាទោស តាមផ្លូវច្បាប់ជាធរមាន ដោយគ្មានការលើកលែងឡើយ។ហើយត្រូវបន្តសកម្មភាពការពារ ទប់ស្កាត់ និងបង្រាបបទល្មើសធនធានធម្មជាតិឲ្យមានប្រសិទ្ធភាពបន្ថែមទៀត ដោយគ្មានការដកថយឡើយ។

នៅក្នុងឱកាសនេះដែរ ឧត្តមសេនីយ៍ទោ សោម ស៊ុន បានពាំនូវការផ្តាំផ្ញើសាកសួរសុខទុក្ខ ពីសំណាក់ឯកឧត្តមអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ និងបានឧបត្ថម្ភស្បៀងអាហារ គ្រឿងឧបភោគ បរិភោគ ប្រេងឥន្ធនៈ និងថវិកាមួយចំនួន ដែល ជាអណោយដ៍ថ្លៃ ថ្លៃថ្លា របស់ សម្តេច មហា បវរ ធិបតី ហ៊ុន ម៉ាណែត និង លោក ជំទាវ បណ្ឌិត ពេជ ចន្ទមុន្នី ជូនដល់កងកម្លាំងចម្រុះ សម្រាប់ជួសជុលមធ្យោបាយធ្វើ ដែលមានការខ្វះខាតក្នុងការបំពេញភារកិច្ច និងដោះស្រាយការហូបចុកប្រចាំថ្ងៃផងដែរ៕