ឧត្តមសេនីយ៍ឯក បណ្ឌិត តុប នេត ដឹកនាំកិច្ចប្រជុំពិគ្រោះយោល់លើការរៀបចំសេចក្ដីព្រាងប្រកាស ស្ដីពីការចុះបញ្ជីស្នាក់នៅ
ភ្នំពេញ៖ នៅព្រឹកថ្ងៃអង្គារ ១១កើត ខែអាសាឍ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី១៦ ខែកក្កដា ឆ្នាំ២០២៤ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញដឹកនាំកិច្ចប្រជុំពិគ្រោះយោល់លើការរៀបចំសេចក្ដីព្រាងប្រកាស ស្ដីពីការចុះបញ្ជីស្នាក់នៅ។
ក្នុងកិច្ចប្រជុំនេះ ក៏មានការអញ្ជើញចូលរួមពី ឯកឧត្តម អគ្គនាយករង លោកប្រធាននាយកដ្ឋានស្ថិតិប្រជាពលរដ្ឋ លោកអនុប្រធាននាយកដ្ឋាន ព្រមទាំងមន្រ្តីជំនាញដែលពាក់ព័ន្ធចំណុះអគ្គនាយកដ្ឋានអត្តសញ្ញាណកម្ម និងលោកស្នងការរងទទួលផែនការងារអត្តសញ្ញាណកម្ម រាជធានីភ្នំពេញ, លោកស្នងការរង ខេត្តកណ្តាល, លោកស្នងការរង ខេត្តព្រះសីហនុ, លោកស្នងការរង ខេត្តសៀមរាប, និងលោកស្នងការរង ខេត្តបាត់ដំបង ព្រមទាំងលោកនាយការិយាល័យទទួលផែនការងារស្ថិតិប្រជាពលរដ្ឋផងដែរ។
នេះជាកិច្ចប្រជុំមួយសំខាន់ បន្ទាប់ពីមានការពិគ្រោះយោបល់ផ្ទៃក្នុង ជាមួយថ្នាក់ដឹកនាំ និងនាយកដ្ឋានជំនាញ ដែលមានបទពិសោធន៍លើការងារគ្រប់គ្រងការស្នាក់នៅ ដើម្បីផ្តល់យោបល់លើចំណុចមួយចំនួនដែលជាគន្លឹះ និងជាបរិបទថ្មី នៃការចុះបញ្ជីស្នាក់នៅ។
កិច្ចប្រជុំនេះផងដែរគឺផ្តោតសំខាន់ទៅលើចំណុចមួយគឺធ្វើយ៉ាងណាឱ្យការចុះបញ្ជីស្នាក់នៅបានគ្រប់ៗគ្នា ជាប់លាប់ និងអចិន្រ្តៃយ៍។ ព្រោះដោយកន្លងមកយើងអនុវត្តលើការចុះបញ្ជីស្នាក់នៅនេះទៅតាមអនុក្រឹត្យចំនួន០២គឺ៖ ១/. អនុក្រឹត្យ ស្តីពីសៀវភៅស្នាក់នៅឆ្នាំ១៩៩៧ និង២/. អនុក្រឹត្យ ស្តីពីសៀវភៅគ្រួសារឆ្នាំ១៩៩៨ និងបន្តអនុវត្តរហូតមកដល់បច្ចុប្បន្នដែលទទួលបានការអនុវត្តដោយរលូន ជាមួយនឹងសមិទ្ធផលល្អប្រសើរ តែក៏មានបញ្ហារួមមួយគឺការចុះបញ្ជីមិនបានពេញលេញ។ ប៉ុន្តែបន្ទាប់ច្បាប់ ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ចូលជាធរមាននៅថ្ងៃទី០១ ខែកក្កដា ឆ្នាំ២០២៣ មក ការចុះបញ្ជីស្នាក់នៅគឺត្រូវធ្វើឱ្យបានគ្រប់ៗគ្នា ជាប់លាប់ និងអចិន្រ្តៃយ៍។ ដោយគោលបំណងសំខាន់ នៃការចុះបញ្ជីស្នាក់នៅនេះ គឺជាការរាប់ចំនួនមនុស្ស ឱ្យបានច្បាស់លាស់ និងត្រឹមត្រូវ ៕
