នាយឧត្តមសេនីយ៍សាស្ត្រាចារ្យ ឯក មនោសែន អញ្ជើញបិទវគ្គបណ្តុះបណ្តាលកម្រិតបឋមវិជ្ជាជីវៈនគរបាល ជំនាន់ទី១៨ លើកទី១ នៅសាលានគរបាលជាតិភូមិភាគ៣

ភ្នំពេញ៖ នៅថ្ងៃចន្ទ ទី៣ ខែមិថុនា ឆ្នាំ២០២៤ ឯកឧត្តម នាយឧត្តមសេនីយ៍សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញជាអធិបតីក្នុងពិធីបិទវគ្គបណ្តុះបណ្តាលកម្រិតបឋមវិជ្ជាជីវៈនគរបាល ជំនាន់ទី១៨ លើកទី១ នៅសាលានគរបាលជាតិភូមិភាគ៣ ក្នុងខេត្តកំពង់ស្ពឺ ដែលមានសិស្សនគរបាលជ័យលាភី សរុបចំនួន១៨៨នាក់ នារី៣៣នាក់។

ថ្លែងក្នុងឱកាសនោះ ឯកឧត្តម នាយឧត្តមសេនីយ៍សាស្ត្រាចារ្យ បានបញ្ជាក់ថាពិធីបិទវគ្គសិក្សានាថ្ងៃនេះ ជាសក្ខីភាពឆ្លុះបញ្ចាំងឱ្យឃើញអំពីលទ្ធផលការងារថ្មីបន្ថែមទៀតដែលសម្រេចបានដោយជោគជ័យ ក្រោមការដឹកនាំដ៏ខ្ពង់ខ្ពស់ប្រកបដោយប្រាជ្ញាភិវឌ្ឍន៍និងទស្សនវិស័យវែងឆ្ងាយរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ហើយក៏ជាព្រឹត្តិការណ៍មួយដែលបានលើកតម្លៃនិងផ្ដល់កិត្តិយសដល់ប្អូនៗសិស្សនគរបាលជ័យលាភីទាំងអស់ ដែលបានខិតខំសិក្សារៀនសូត្រ ហ្វឹកហាត់ គោរពវិន័យបានល្អ រហូតទទួលបានជោគជ័យក្នុងការសិក្សា។

ក្នុងឱកាសនោះ ឯកឧត្តម នាយឧត្តមសេនីយ៍សាស្ត្រាចារ្យ ក៏បានគោរពថ្លែងអំណរគុណនិងដឹងគុណយ៉ាងជ្រាលជ្រៅបំផុតចំពោះ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ដែលជាបិតានិងជាអគ្គមគ្គទេសក៍ដ៏ឆ្នើមនៃសន្តិភាពនិងការអភិវឌ្ឍជាតិលើគ្រប់វិស័យ និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ចេញនូវកម្មវិធីនយោបាយនិងយុទ្ធសាស្ត្របញ្ចកោណ ដោយផ្ដល់អាទិភាពខ្ពស់ក្នុងការអភិវឌ្ឍធនធានមនុស្សលើគ្រប់វិស័យ រួមទាំងកងកម្លាំងនគរបាលជាតិ ព្រមទាំងបានគោរពថ្លែងអំណរគុណយ៉ាងជ្រាលជ្រៅចំពោះសម្ដេចក្រឡាហោម ស ខេង ដែលបានកសាងសមិទ្ធផលនិងស្នាដៃជាច្រើនរបស់ក្រសួងមហាផ្ទៃសម្រាប់អ្នកដឹកនាំបន្តវេន ជាពិសេស គឺការផ្ដល់តម្លៃនិងអាទិភាពដល់ការងារបណ្ដុះបណ្ដាលមន្ត្រីនគរបាលជាតិ។

ជាកិច្ចបន្ត ឯកឧត្តម នាយឧត្តមសេនីយ៍សាស្ត្រាចារ្យ ឯក មនោសែន ក៏បានថ្លែងនូវការកោតសរសើរចំពោះសាលានគរបាលជាតិភូមិភាគ៣និងអ្នកពាក់ព័ន្ធទាំងអស់ ដែលបានរួមសហការគ្នាយ៉ាងល្អក្នុងការគ្រប់គ្រងវគ្គសិក្សាខាងលើឱ្យដំណើរការស្របតាមគោលការណ៍ណែនាំរបស់បណ្ឌិត្យសភានិងបានបញ្ចប់ប្រកបដោយជោគជ័យ។

ឯកឧត្តម នាយឧត្តមសេនីយ៍សាស្ត្រាចារ្យ ឯក មនោសែន បានបន្តថ្លែងបញ្ជាក់ថា ស្ថិតក្រោមម្លប់សន្តិភាពនិងក្រោមការដឹកនាំប្រកបដោយស្មារតីទទួលខុសត្រូវរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជាសេនាធិការជូនរាជរដ្ឋាភិបាល ដើម្បីរួមចំណែកសម្រេចគោលដៅយុទ្ធសាស្ត្របញ្ចកោណ ដំណាក់កាលទី១ និងឆ្លើយតបទៅនឹងបដិវត្តឧស្សាហកម្មទី៤ និងបរិវត្តកម្មឌីជីថលនៃសេដ្ឋកិច្ចនិងសង្គមកម្ពុជា បណ្ឌិត្យសភានគរបាលកម្ពុជា បានបេ្តជ្ញាចិត្តយ៉ាងមុតមាំឥតងាករេ ចូលរួមអនុវត្តកម្មវិធីកំណែទម្រង់សំខាន់ៗ ក្នុងគោលដៅបម្រើឧត្តមប្រយោជន៍ជាតិ ដើម្បីឆ្លើយតបតាមសំណូមពរប្រជាពលរដ្ឋ។

ក្នុងឱកាសដ៏ប្រពៃនោះ ឯកឧត្តម នាយឧត្តមសេនីយ៍សាស្ត្រាចារ្យ ក៏បានថ្លែងការកោតសរសើរនិងសូមអរគុណចំពោះឯកឧត្ដមរដ្ឋមន្រ្តីក្រសួងបរិស្ថាន ឯកឧត្ដមអភិបាលខេត្តកំពង់ស្ពឺ ខេត្តព្រះសីហនុ ខេត្តតាកែវ ខេត្តកំពត ខេត្តកែប និងលោកជំទាវអភិបាលខេត្តកោះកុង ព្រមទាំងសប្បុរសជនទាំងអស់ ដែលបានចូលរួមឧបត្ថម្ភជាមួយក្រសួងមហាផ្ទៃ ដើម្បីកសាងសមិទ្ធផលនានានៅសាលានគរបាលជាតិភូមិភាគ៣ ឱ្យលេចចេញជារូបរាងឡើងជាបណ្ដើរៗ ដូចយើងទាំងអស់គ្នាបានឃើញជាក់ស្ដែងនាពេលនេះ។

ពាក់ព័ន្ធនឹងការបណ្តុះបណ្តាលនេះ ឯកឧត្តម នាយឧត្តមសេនីយ៍សាស្ត្រាចារ្យ ឯក មនោសែន បានលើកឡើងថា កាលពីមុន ប្អូនៗជាជនស៊ីវិលដែលមិនបានយល់ដឹងអំពីតួនាទី ភារកិច្ច ក្រមសីលធម៌វិជ្ជាជីវៈ និងបទវិន័យនានារបស់នគរបាលនោះទេ។ ដូច្នេះ ប្រសិនបើប្អូនៗ មិនបានឆ្លងកាត់វគ្គនេះទេ ប្អូនៗមិនអាចបំពេញភារកិច្ចរបស់ខ្លួនជាមន្រ្តីនគរបាលបានល្អជូនអង្គភាពនិងប្រជាពលរដ្ឋបានឡើយ។ ម្យ៉ាងវិញទៀត ប្អូនៗទាំងអស់គឺជាឈាមថ្មីដែលរាជរដ្ឋាភិបាលនិងក្រសួងមហាផ្ទៃ បានជ្រើសរើសយកមកចាក់បញ្ចូលក្នុងរដ្ឋបាលសាធារណៈ ដើម្បីបម្រើការងារក្នុងវិស័យសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គមឱ្យបានល្អប្រសើរ។ ហេតុនេះ ចាំបាច់ណាស់ដែលទាមទារឱ្យឈាមថ្មីនេះជាឈាមដែលមានគុណភាពល្អ ដើម្បីបំពេញតួនាទីជាមន្រ្តីនគរបាលបន្តវេនប្រកបដោយលក្ខណសម្បត្តិសមស្របនិងមានការពេញចិត្តពីសំណាក់ប្រជាពលរដ្ឋ។

មុននឹងបញ្ចប់ ឯកឧត្តម នាយឧត្តមសេនីយ៍សាស្ត្រាចារ្យ ឯក មនោសែន ក៏បានផ្តល់មតិផ្ដាំផ្ញើមួយចំនួនសម្រាប់ប្អូនៗជាសិស្សនគរបាលជ័យលាភី ត្រូវយកចំណេះដឹងនិងជំនាញ ទៅប្រើប្រាស់ឱ្យមានប្រយោជន៍ដល់អង្គភាពនិងសង្គមជាតិ ត្រូវគោរពក្រមសីលធម៌វិជ្ជាជីវៈ គោរពច្បាប់ ត្រូវមានអត្តចរិតល្អ ដើម្បីធ្វើជាមន្រ្តីនគរបាលល្អ ក្នុងការបម្រើជាតិនិងប្រជាពលរដ្ឋ ៕