សមាគមពាណិជ្ជករគ្រឿងអលង្ការ សន្យាខិតខំជំរុញវិស័យគ្រឿងអលង្ការកម្ពុជា ឲ្យកាន់តែរីកចម្រើនស្របតាមការវិវត្តរបស់កម្ពុជា និងពិភពលោក

ភ្នំពេញ៖ ប្រធានស្តីទី សមាគមពាណិជ្ជករ គ្រឿងអលង្ការ និងត្បូងមានតម្លៃកម្ពុជា លោកបណ្ឌិត ឆាយ ស៊ីណាត បានអះអាងថា ក្នុងនាមជាប្រធានស្តីទីសមាគម នឹងបន្តកិច្ចខិតខំប្រឹងប្រែងស្វែងរកនូវគំនិតនិងសកម្មភាពថ្មីៗ ដើម្បីជំរុញវិស័យគ្រឿង អលង្ការនៅកម្ពុជាឲ្យកាន់តែរីកចម្រើនស្របតាមកាវិវត្តរបស់ប្រទេសជាតិនិងពិភពលោក។

ផ្អែកលើបទពិសោធន៍ និងមានទំនាក់ទំនងក្នុងវិស័យនេះកន្លងមក លោកប្រធានស្តីទី មានសុទិដ្ឋិនិយមថា ឆ្លងកាត់នូវព្រឹត្តិការណ៍នារីឯកលើកដំបូងឆ្នាំ២០២៤ នឹងធ្វើឲ្យមានភាពលេចធ្លោនៃព្រឹត្តិការណ៍ដែលបានរៀបចំឡើងដោយសមាគមឲ្យកាន់តែរសរវើក។ ម្យ៉ាងទៀតយើងនឹងរៀបចំពិព័រណ៍គ្រឿងអលង្ការកម្ពុជា- អន្តរជាតិ លើកទី១៥ ឆ្នាំ២០២៤ ចាប់ពីថ្ងៃទី២១ ដល់ថ្ងៃទី២៥ ខែមីនា នាពេលប៉ុន្មានថ្ងៃខាងមុខនេះ ដូច្នេះក្នុងព្រឹត្តិការណ៍នៃការជ្រើសរើសនិងជំនួបរវាងនារីឯកនៅក្នុងរាត្រីនេះ គឺជាពេលវេលាមួយដែលយើងត្រៀមក្នុងការសម្រិតសម្រាំងយកនារី ដែលគាត់មានសមត្ថភាពអាចបន្តទៅក្នុងកម្មវិធីបន្តបន្ទាប់ទៀត។

កញ្ញា មាន សូនីតា ដែលជាគណៈកម្មការនារីឯក ក្នុងការសម្រេច និងជ្រើសរើសបេក្ខនារីចំនួន ១០០នាក់ ដើម្បីចូលរួមក្នុងកម្មវិធីសម្ពោធព្រឹត្តិការណ៍នារីឯកលើកទី១ ឆ្នាំ២០២៤ នាថ្ងៃទី២៣ ខែមីនា ឆ្នាំ២០២៤ ក្នុងកម្មវិធីពិព័រណ៍គ្រឿង អលង្ការកម្ពុជា-អន្តរជាតិ លើកទី១៥ ឆ្នាំ២០២៤ របស់សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា។

លោកបណ្ឌិត រំពឹងថា សកម្មភាកម្មវិធីនេះ នឹងធ្វើឲ្យកម្ពុជាកាន់តែលេចធ្លោឡើងថែមទៀ៎តនៅលើឆាកអន្តរជាតិ តាមរយៈបណ្តាញដៃគូថ្នាក់តំបន់ ទាំងនៅក្នុងអាស៊ាន និងពិភពលោក គឺមានគ្រប់ទិសទី ដូច្នេះរាល់អ្វីដែលជាផលិតផល ឬសកម្មភាពរបស់សមាគមយើង មានឱកាសក្នុងការផ្សព្វផ្សាយ ដែលមានការសហការជាមួយបណ្តាដៃគូខាងក្រៅ ដើម្បីជំរុញដល់កិច្ចការងារវិស័យគ្រឿងអលង្ការថ្នាក់ជាតិ និងអន្តរជាតិ ។ ដូច្នេះបេក្ខនារី ដែលបានដាក់ពាក្យចូលរួមក្នុងការជ្រើសរើសនារីឯក ក្នុងពេលនេះ គឺម្នាក់ៗនឹងអាចមានឱកាសនិងអនាគតល្អប្រសើរផងដែរ។

គណៈកម្មការនារីឯកលើកទី១ កញ្ញា មាន សូនីតា បានលើកឡើងថា ការចាប់ផ្តើមជំនួបដំបូងនៅថ្ងៃនេះ គឺជាការប្រកួតដំបូងមួយរបស់បេក្ខនារីទាំងអស់ ក្នុងការចម្រាញ់និងសម្រេចជ្រើសរើសបេក្ខនារីចំនួន១០០នាក់ដំបូង ដើម្បីបន្តដំណើរទៅកាន់ការប្រកួតដ៏ស្វិតស្វាញ នាពេលខាង មុខនេះ ។ កញ្ញាសង្ឃឹមថា បេក្ខនារីទាំងអស់ត្រូវតែខិតខំប្រឹងដើម្បីបង្ហាញនូវសមត្ថភាព, ទេពកោសល្យ និងរូបសម្រស់របស់ខ្លួននៅក្នុងរាត្រីនេះឲ្យអស់ពីសមត្ថភាព។

កញ្ញាបញ្ជាក់ថា នេះគឺជាការប្រកួតនារីឯកលើកទី១នៅក្នុងប្រទេសកម្ពុជា ក៏ប៉ុន្តែស្តង់ដារនិងការសហការគឺលំដាប់អន្តរជាតិ បេក្ខនារីដែលបានទៅកាន់វគ្គបន្តនៅក្នុងរាត្រីនេះ ត្រូវតែមានមោទ នភាព នៅលើលទ្ធផលដែលខ្លួនបានបង្ហាញនៅក្នុងយប់នេះ ហើយអ្នកដែលអាចក្លាយទៅជាម្ចាស់ជ័យលាភីនោះ នឹងក្លាយទៅជាអ្នកដែលតំណាងឲ្យប្រទេសកម្ពុជានៅលើឆាកអន្តរជាតិ៕