សម្តេចធិបតី ហ៊ុន ម៉ាណែត៖ ការកសាង និងអភិវឌ្ឍន៍នៅតំបន់កោះនរា មានលក្ខណៈពិសេស ជាការស្តារឡើងវិញ នូវអ្វីដែលបានបាត់
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគាំទ្រដល់ការអភិវឌ្ឍគម្រោងទីក្រុងរណបកោះនរា និងចាត់ទុកគម្រោងនេះ ជាការអភិវឌ្ឍពិសេស ដែលស្តារឡើងវិញពីការបាក់ដី ដោយចរន្តទឹកហូរ ប្រែក្លាយជាតំបន់ពហុសកម្មភាពសេដ្ឋកិច្ច។
ក្នុងឱកាសអញ្ជើញសម្ពោធដាក់ឱ្យប្រើប្រាស់ស្ពានកោះនរា នារសៀលថ្ងៃទី១៥ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បញ្ជាក់ថា «ពិតណាស់ ការកសាងនៅកោះនរានេះ មានលក្ខណៈពិសេស ជាការស្តារឡើងវិញ នូវអ្វីដែលបានបាត់។ បើតាមខ្ញុំមើលផែនទី កាលពីឆ្នាំ១៩២៩ ដែលបារាំងគូស ពេលនោះកោះនរានៅទំហំធំ ហើយនៅចំមុខទឹកនៃទន្លេចតុមុខតែម្តង ប៉ុន្តែរាប់សិបឆ្នាំមកនេះ គឺបានរួញបន្តិចម្តងៗ ដោយចរន្តទឹក ហើយក្រោយឆ្នាំ១៩៧៩ ក៏មានប្រជាពលរដ្ឋមួយចំនួន រស់នៅទីនេះហើយប្រកបរបរធ្វើចំការ នេសាទ ប៉ុន្តែដោយសារចរន្តទឹកពីមួយឆ្នាំទៅមួយឆ្នាំបាក់រហូត មកដល់ឆ្នាំ២០០៥ គឺអស់តែម្តង។ បានន័យថាអ្វីដែលយើងកំពុងអង្គុយនេះ គឺស្តារឡើងវិញទេ»។
សម្តេចធិបតីបន្ថែមថា «កន្លែងនេះពិសេស កន្លែងផ្សេងៗទៀតមានដីហើយ យើងគ្រាន់តែប្រែប្រួលអភិវឌ្ឍន៍ តែកន្លែងនេះជាកន្លែងដែលស្រង់ទាំងមូលតែម្តង ។ អ្នកខ្លះគេថាចាក់ដីលុបទន្លេ ទីនេះគឺស្រង់ឡើងវិញនូវអ្វីដែលបាក់ពីមុន ហើយធ្វើឱ្យរស់រវើកជាងមុន។ កន្លែងនេះមានទំហំជាង១០០ហិកតា កាលពីមុនចិញ្ចឹមប្រជាជនមិនច្រើនទេ ប្រកបរបរកសិកម្ម ប្រជានេសាទ តែឥឡូវប្រែក្លាយទៅជាតំបន់ពហុសកម្មភាពសេដ្ឋកិច្ច»។
សម្តេចធិបតី ហ៊ុន ម៉ាណែត បានថ្លែងអំណរគុណ ដល់អាជ្ញាធររាជធានីភ្នំពេញ ដែលបានចូលរួមបង្កលក្ខណៈងាយស្រួល សម្រាប់កិច្ចអភិវឌ្ឍន៍កោះនរា។
សម្តេចធិបតី ហ៊ុន ម៉ាណែត បានថ្លែទៀតថា ហេដ្ឋារចនាសម្ព័ន្ធ មានសារៈសំខាន់ណាស់សម្រាប់ជាតិ ដែលជាសរសៃឈាមរបស់ជាតិ។ រាជរដ្ឋាភិបាលតែងតែផ្តល់អាទិភាព ដល់ការកសាងហេដ្ឋារចនាសម្ព័ន្ធតភ្ជាប់ ហើយផ្លូវជាអាទិភាពគន្លឹះមួយ ក្នុងគោលនយោបាយរាជរដ្ឋាភិបាល ៕
