កូរ៉េខាងជើងថ្កោលទោសអាមេរិកចំពោះការផ្គត់ផ្គង់មីស៊ីលចម្ងាយឆ្ងាយឱ្យអ៊ុយក្រែន
សេអ៊ូល៖ ប្រទេសកូរ៉េខាងជើងកាលពីថ្ងៃសៅរ៍បានថ្កោលទោសសហរដ្ឋអាមេរិកចំពោះការផ្គត់ផ្គង់មីស៊ីលផ្លោងរយៈចម្ងាយឆ្ងាយរបស់អ៊ុយក្រែនដែលត្រូវបានគេស្គាល់ថា ATACMS ដោយបញ្ជាក់ថា ការវាយប្រហារណាមួយលើប្រទេសរុស្ស៊ីជាមួយពួកគេនឹងរារាំងដល់កិច្ចខិតខំប្រឹងប្រែងសន្តិភាពតែប៉ុណ្ណោះ។
កាលពីថ្ងៃអង្គារ ប្រទេសអ៊ុយក្រែនបានឲ្យដឹងថា ខ្លួនបានប្រើប្រាស់ប្រព័ន្ធមីស៊ីល Tactical Missile System (ATACMS) ដែលផ្គត់ផ្គង់ដោយសហរដ្ឋអាមេរិក ជាលើកដំបូង ដោយបានធ្វើឱ្យខូចខាតយ៉ាងធ្ងន់ធ្ងរលើអាកាសយានដ្ឋានចំនួនពីរនៅក្នុងតំបន់ដែលកាន់កាប់ដោយរុស្ស៊ី។ កងកម្លាំងរុស្ស៊ីបានលុកលុយអ៊ុយក្រែនក្នុងខែកុម្ភៈ ឆ្នាំ២០២២ ហើយរដ្ឋាភិបាលក្រុង Kyiv បានស្នើសុំម្តងហើយម្តងទៀតពីទីក្រុងវ៉ាស៊ីនតោនសម្រាប់មីស៊ីល ខណៈដែលសន្យាថានឹងមិនប្រើប្រាស់វានៅក្នុងប្រទេសរុស្ស៊ី។
លោក Sin Hong-Chol ឯកអគ្គរដ្ឋទូតកូរ៉េខាងជើងប្រចាំនៅរុស្ស៊ី បានឲ្យដឹងនៅក្នុងសេចក្តីថ្លែងការណ៍មួយ ដែលធ្វើឡើងដោយប្រព័ន្ធផ្សព្វផ្សាយរដ្ឋ KCNA ថា ទីបំផុតសហរដ្ឋអាមេរិកបានប្រគល់ប្រព័ន្ធកាំជ្រួចពីដីទៅដី ATACMS ដល់អ៊ុយក្រែន ទោះបីជាមានការព្រួយបារម្ភយ៉ាងខ្លាំង និងការប្រឆាំងយ៉ាងខ្លាំងពីសហគមន៍អន្តរជាតិក៏ដោយ។
រាល់ការវាយប្រហារនៅផ្នែកខាងក្នុងនៃប្រទេសរុស្ស៊ី ដែលជាមហាអំណាចនុយក្លេអ៊ែរ នឹងមិនផ្តល់ជំនួយដល់ការបញ្ចប់ដំបូងនៃស្ថានភាពអ៊ុយក្រែន ឬដំណោះស្រាយដោយសន្តិវិធីដូចការតស៊ូមតិរបស់សហរដ្ឋអាមេរិកនោះទេ ប៉ុន្តែនឹងដើរតួជាកាតាលីករសម្រាប់ដាក់អឺរ៉ុបទាំងមូលចូលទៅក្នុងភាពច្របូកច្របល់គ្មានទីបញ្ចប់។
វ៉ារ្យ៉ង់ជាច្រើននៃ ATACMS អាចផ្ទុកគ្រាប់បែកចង្កោម។ ប្រព័ន្ធនេះផ្តល់នូវសមត្ថភាពក្នុងការចូលរួមទាំងចំណុច និងតំបន់គោលដៅតម្លៃខ្ពស់ជាមួយនឹងការបាញ់យ៉ាងជាក់លាក់រហូតដល់ ៣០០ គីឡូម៉ែត្រ។
កាលពីថ្ងៃទី១៣ ខែតុលា សេតវិមានបានចោទប្រកាន់ក្រុងព្យុងយ៉ាងថាបានផ្តល់ឱ្យរុស្ស៊ីនូវការដឹកជញ្ជូនសព្វាវុធនាពេលថ្មីៗនេះ ដោយបានហៅវាថាជាការអភិវឌ្ឍន៍ដ៏លំបាក និងបង្កើនការព្រួយបារម្ភអំពីទំនាក់ទំនងយោធាដែលពង្រីករវាងប្រទេសទាំងពីរ។
ប្រភព៖ Reuters
ប្រែសម្រួលដោយ៖ ឡាយ លីហួ
