មួយរយៈពេលកន្លងមកនេះ មានជនខិលខូចបានធ្វើការលួងលោមបោកបញ្ឆោតដើម្បីលួចយកលេខកូដសម្ងាត់ ពីជនរងគ្រោះ តាមរយៈឱ្យជនរងគ្រោះធ្វើការថតស្រ្គីនទូរសព្ទ (Screenshot) ខណៈពេលដែលជនខិលខូចព្យាយាម ចូលទៅក្នុងគណនីរបស់ជនរងគ្រោះ ដែលពេលនោះលេខកូដសម្ងាត់ (OTP) វានឹងលោតលើស្រ្គីនទូរសព្ទ ស្របពេលដែលយើងធ្វើការថតស្រ្គីនទូរសព្ទ ហើយបាញ់ផ្ញើទៅជនខិលខូចដោយមិនដឹងខ្លួន។
បន្ទាប់មកពួកគេនឹងចូលទៅប្រើប្រាស់តេឡេក្រាមរបស់ជនរងគ្រោះ និងធ្វើការប្ដូរលេខទូរសព្ទដើម្បីកាន់កាប់តេឡេក្រាមនោះទាំងស្រុងតែម្តង។
ក្រោយពីបានកាន់កាប់តេឡេក្រាមរបស់យើងហើយ ជនអនាមិកបានចូលពិនិត្យមើលរាល់សារទំនាក់ទំនងរបស់យើងទាំងអស់ និងរកមើលសារណាដែលសំខាន់ពាក់ព័ន្ធនឹងការទូទាត់លុយកាក់ជាដើម ក៏បន្លំជាជនរងគ្រោះឆាតទៅមិត្តភក្តិ សាច់ញាតិរបស់ជនរងគ្រោះដើម្បីធ្វើការផ្ទេរប្រាក់ឱ្យខ្លួន។
បើនិយាយពីរឿង Hack Telegram តាមពិតទៅវាមិនមែនដូចគ្នាទៅនឹងពាក្យហៅថា Hack តាមបច្ចេកវិទ្យានោះទេ។ ករណីនេះគឺដោយសារជនដែលបានលួចយកគណនីគេនោះ មិនបានប្រើបច្ចេកវិទ្យាទំនើបណាមួយដើម្បីធ្វើការលួចយកតេឡេក្រាមរបស់យើងមកកាន់កាប់នោះទេ។
ចំពោះករណីបែបនេះវាមិនមែនជារឿងថ្មីនោះទេ ប៉ុន្តែវាជាលើកដំបូងសម្រាប់កម្មវិធិតេឡេក្រាម។ ហេតុដូច្នេះដើម្បីចៀសវាងក្នុងការជួបបញ្ហាបែបនេះ
សូមអ្នកប្រើប្រាស់អនុវត្តតាមវិធីសាស្រ្តដើម្បីទប់ស្កាត់ដូចខាងក្រោម៖
ទី១-ប្រសិនអ្នកគិតថាវាជាការងារសំខាន់ អ្នកគួរតែជ្រើសរើសយក Telegram Premium ដែលអ្នកត្រូវទូទាត់ប្រាក់សម្រាប់ប្រើប្រាស់ និងមានការទទួលស្គាល់ និងបញ្ជាក់ពីក្រុមហ៊ុនផ្ទាល់តែម្តង។
ទី២-អ្នកគួរប្រើ Two steps verification ដោយបង្កើតលេខសម្ងាត់ផ្ទាល់ខ្លួន បន្ថែមពីលើលេខកូដសម្ងាត់(OTP) ដែលផ្ដល់ឱ្យពីខាងក្រុមហ៊ុន។
ទី៣-សូមពិនិត្យឱ្យបានច្បាស់ នៅពេលដែលអ្នកមិនស្គាល់ ឬមិត្តភក្តិសាច់ញាតិ ឆាតទំនាក់ទំនងមកពាក់ព័ន្ធនឹងការផ្ទេរប្រាក់ ឬសួរនាំព័ត៌មានផ្ទាល់ខ្លួន។
លោកអ្នកគួរតែទាក់ទងគ្នាតាមទូរសព្ទផ្ទាល់ដើម្បីបញ្ជាក់អត្តសញ្ញាណ ព្រោះអ្នកមិនដឹងថាមិត្តភក្កិសាច់ញាតិយើងណាខ្លះត្រូវបានគេលួចគណនីតេឡេក្រាមទៅប្រើនោះទេ៕
