អគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ រៀបចំពិធីឆ្លងរបាយការណ៍ និងបិទការងារសវនកម្មផ្ទៃក្នុង នៅរដ្ឋបាលខេត្តស្វាយរៀង

ភ្នំពេញ៖ អគ្គនាយកដ្ឋានសវនកម្មផ្ទៃក្នុង នៅព្រឹកថ្ងៃសុក្រ ទី១៦ ខែធ្នូ ឆ្នាំ២០២២ រៀបចំពិធីឆ្លងរបាយការណ៍ និងបិទការងារសវនកម្មផ្ទៃក្នុង នៅរដ្ឋបាលខេត្តស្វាយរៀង សម្រាប់ការិយបរិច្ឆេទ២០២១ និងបណ្តាឆ្នាំពាក់ព័ន្ធ ក្រោមអធិបតីភាព ឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ដោយមានការអញ្ជើញចូលរួមពីឯកឧត្តម អភិបាលរងខេត្តតំណាងឯកឧត្តម អភិបាលខេត្ត អគ្គនាយករង និងមន្រ្តីពាក់ព័ន្ធជាច្រើនរូបទៀត។

ឯកឧត្តម ឧត្តមសេនីយ៍ឯក អគ្គនាយក នៃអគ្គនាយកដ្ឋានសវនកម្មផ្ទៃក្នុង បានមានមតិស្វាគមន៍យ៉ាងជ្រាលជ្រៅបំផុតជូនចំពោះគណៈអធិបតី និងអង្គពិធីទាំងមូល ដែលបានចូលរួមក្នុងពិធីប្រជុំឆ្លងរបាយការណ៍ និងបិទការងារសវនកម្មផ្ទៃក្នុង នៅរដ្ឋបាលខេត្តស្វាយរៀង សម្រាប់ការិយបរិច្ឆេទ២០២១ និងបណ្តាឆ្នាំពាក់ព័ន្ធ ស្របតាមផែនការសកម្មភាពប្រចាំឆ្នាំរបស់អគ្គនាយកដ្ឋានសវនកម្មផ្ទៃក្នុង។

ឯកឧត្តម ឧត្តមសេនីយ៍ឯក អគ្គនាយក ក៏បានថ្លែងអំណរអរគុណដល់ ឯកឧត្តមអភិបាលខេត្តស្វាយរៀង អភិបាលរងខេត្ត នាយករដ្ឋបាល ប្រធានការិយាល័យ អស់លោក លោកស្រី និងមន្រ្តីពាក់ព័ន្ធទាំងអស់ រួមទាំងគណៈប្រតិភូសវនកម្មផ្ទៃក្នុង ដែលធ្វើឱ្យដំណើរការការងារសវនកម្ម ដោយបានលទ្ធផលឆ្លង និងបិទការងារសវនកម្ម ប្រកបដោយភាពទទួលខុសត្រូវខ្ពស់ និងមានការឯកភាពទទួលយកនូវលទ្ធផលទាំងនេះដើម្បីបន្តចូលរួមចំណែកធ្វើការកែលម្អនាឆ្នាំបន្ទាប់នាពេលខាងមុខទៀត។

បន្ថែមលើសពីនេះទៀត ឯកឧត្តមបានបន្តថាចាប់តាំងពីដើមឆ្នាំ២០២០ រហូតមកដល់បច្ចុប្បន្ននេះ នៅលើពិភពលោក រួមទាំងប្រទេសកម្ពុជាផងដែរ បានកំពុងជួបបញ្ហានូវការរីករាលដាលនៃជម្ងឺកូវីដ១៩ ដែលមានផលប៉ះពាល់យ៉ាងខ្លាំងដល់សង្គម សេដ្ឋកិច្ចកម្ពុជាផងដែរ។

ជាមួយគ្នានេះដែរ ក្រោមការដឹកនាំដ៏ខ្ពង់ខ្ពស់ និងប្រកបដោយគតិបណ្ឌិតឈ្លាសវៃបំផុតរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានដឹកនាំប្រយុទ្ធប្រឆាំង បង្ការទប់ស្កាត់ជម្ងឺកូវីដ១៩ ដែលបានធ្វើឱ្យប្រទេសកម្ពុជា ជាប្រទេសដែលអាចគ្រប់គ្រងជម្ងឺកូវីដ១៩ បានយ៉ាងល្អទូទាំងប្រទេស។ ដោយមានការចង្អុលបង្ហាញពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ ចេញលិខិតបង្គាប់ការ នឹងបានប្រគល់ភារកិច្ចជូនអគ្គនាយកដ្ឋានសវនកម្មផ្ទៃក្នុង ចុះធ្វើសវនកម្មដោយផ្តោតលើការត្រួតពិនិត្យមន្រ្តីរាជការ ត្រួតពិនិត្យហិរញ្ញវត្ថុ និងត្រួតពិនិត្យទ្រព្យសម្បត្តិរដ្ឋ ព្រមទាំងអភិវឌ្ឍសមត្ថភាពអង្គភាព ទាំងថ្នាក់ជាតិ និងថ្នាក់ក្រោមជាតិ ដែលស្ថិតក្រោមដែនសមត្ថកិច្ចក្រសួងមហាផ្ទៃ។

ឯកឧត្តមក៏បានផ្តល់អនុសាសន៍ ណែនាំដល់មន្រ្តីរដ្ឋបាលខេត្ត ក៏ដូចជាមេឃុំ ចៅសង្កាត់លើការកែទម្រង់ ការចំណាយថវិកា ឱ្យបានត្រឹមត្រូវ ដោយផ្អែកលើកំណែទម្រង់ស៊ីជម្រៅទៅលើហិរញ្ញវត្ថុសាធារណៈ ប្រកបដោយប្រសិទ្ធភាព តម្លាភាព និងគណនេយ្យភាព ។

ឯកឧត្តមក៏បានពាំនាំអនុសាសន៍ផ្តាំផ្ញើសួរសុខទុក្ខរបស់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដល់រដ្ឋបាលខេត្តស្វាយរៀង ដែលបានខិតខំបំពេញតួនាទីភារកិច្ច ជូនប្រជាពលរដ្ឋអស់ពីកម្លាំងកាយចិត្ត និងមានស្មារតីទទួលខុសត្រូវខ្ពស់។

ឯកឧត្តម ឧត្តមសេនីយ៍ឯក អគ្គនាយក ក៏បានមានប្រសាសន៍ណែនាំដល់ថ្នាក់ដឹកនាំ ជំរុញឱ្យមានការលើកទឹកចិត្ត ក៏ដូចជាប័ណ្ណសរសើរ តម្លើងឋានន្តរស័ក្កិជូនមន្រ្តីដែលមានស្នាដៃល្អ និងស្របតាមអតីតភាពមន្រ្តីរាជការ ជាពិសេសមានការដឹកនាំចង្អុលបង្ហាញពីប្រមុខរាជរដ្ឋាភិបាល ពីសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។

ឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មបានថ្លែងអំណរអរគុណយ៉ាងជ្រាលជ្រៅដល់លោកអភិបាលរងខេត្តស្វាយរៀង ដែលបានរៀបចំសម្របសម្រួលក្នុងកិច្ចប្រជុំឆ្លងរបាយការណ៍និងបិទសវនកម្មផ្ទៃក្នុង នៅរដ្ឋបាលខេត្តស្វាយរៀង សម្រាប់ការិយបរិច្ឆេទ២០២១ និងបណ្តាឆ្នាំពាក់ព័ន្ធ នាវេលានេះប្រកបដោយសេចក្តីសោមនស្សរីករាយស្និទស្នាល ប្រព្រឹត្តទៅដោយភាពរលូន និងប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងសូមប្រកាសបិទកិច្ចសវនកម្មផ្ទៃក្នុង ចាប់ពីពេលនេះតទៅ៕