បរទេស៖ បេឡារុស បានប្រាប់អង្គការសហប្រជាជាតិថា ខ្លួននឹងអនុញ្ញាតដោយគ្មានលក្ខខណ្ឌ ការដឹកជញ្ជូនគ្រាប់ធញ្ញជាតិពីអ៊ុយក្រែនឆ្លងកាត់ទឹកដីរបស់ខ្លួន សម្រាប់ការនាំចេញពីកំពង់ផែលីទុយអានី អ្នកនាំពាក្យអង្គការសហប្រជាជាតិបានបញ្ជាក់។
អ្នកនាំពាក្យអង្គការសហប្រជាជាតិ លោក Stephane Dujarric បានឲ្យដឹងថា អនុរដ្ឋមន្ត្រីក្រសួងការបរទេសបេឡារុស លោក Yury Ambrazevich បានជួបជាមួយអគ្គលេខាធិការអង្គការសហប្រជាជាតិ លោក Antonio Guterres នៅទីក្រុងញូវយ៉ក កាលពីថ្ងៃសុក្រ ដើម្បីប្រាប់គាត់ថា មិនមានលក្ខខណ្ឌជាមុនសម្រាប់ការផ្ទេរគ្រាប់ធញ្ញជាតិអ៊ុយក្រែននោះទេ។
លោក Dujarric បានឲ្យដឹងនៅក្នុងសេចក្តីថ្លែងការណ៍មួយបន្ទាប់ពីកិច្ចប្រជុំនោះ លោក Ambrazevich ក៏ “បានរំលឹកឡើងវិញនូវសំណើពីរដ្ឋាភិបាលរបស់គាត់ ដើម្បីអាចនាំចេញផលិតផលជីដោយខ្លួនឯង ដែលបច្ចុប្បន្នទទួលរងនូវទណ្ឌកម្ម” ។
បេឡារុស្ស ដែលជាអ្នកផលិតប៉ូតាស្យូមពិភពលោកដ៏ធំមួយ បានរងការវាយប្រហារដោយការដាក់ទណ្ឌកម្មយ៉ាងធ្ងន់ធ្ងររបស់សហភាពអឺរ៉ុបចាប់តាំងពីឆ្នាំ ២០២០ ដែលបានរំខានដល់ការនាំចេញជីរបស់ខ្លួនតាមរយៈកំពង់ផែសមុទ្របាល់ទិក ជាការឆ្លើយតបទៅនឹងអំពើហិង្សាដែលបង្កឡើងដោយអាជ្ញាធរទៅលើក្រុមអ្នកតវ៉ាដោយសន្តិវិធី បន្ទាប់ពីការបោះឆ្នោតដែលមានជម្លោះ។ នៅពេលនោះ ទីក្រុង Minsk បានទាមទារជំនួយពីរុស្សី ក្នុងការលុបបំបាត់រលកនៃការតវ៉ាគាំទ្រលទ្ធិប្រជាធិបតេយ្យ។
សម្ព័ន្ធមិត្តរបស់រុស្ស៊ី និងជាផ្នែកនៃមូលដ្ឋានសម្រាប់ការលុកលុយរបស់ទីក្រុងមូស្គូមកលើអ៊ុយក្រែន បេឡារុសបាននិឲ្យដឹងកាលពីខែមិថុនាថា ខ្លួននឹងអនុញ្ញាតឱ្យការដឹកជញ្ជូនគ្រាប់ធញ្ញជាតិរបស់អ៊ុយក្រែនឆ្លងកាត់ទៅកាន់កំពង់ផែសមុទ្របាល់ទិក ប្រសិនបើបេឡារុស្សត្រូវបានអនុញ្ញាតឱ្យដឹកជញ្ជូនទំនិញរបស់ខ្លួនពីកំពង់ផែទាំងនោះផងដែរ។
អ៊ុយក្រែនមិនយល់ស្របនឹងសំណើនេះទេ។
ចាប់តាំងពីការចាប់ផ្តើមនៃការលុកលុយរបស់រុស្ស៊ីមក បេឡារុស្សភាគច្រើននៅឆ្ងាយពីការចូលរួមដោយផ្ទាល់នៅក្នុងសង្គ្រាមនៅអ៊ុយក្រែន។ ទោះបីជាយ៉ាងណាក៏ដោយ កាលពីអតីតកាល ប្រធានាធិបតី Alexander Lukashenko បានបញ្ជាឱ្យកងទ័ពដាក់ពង្រាយជាមួយកងកម្លាំងរុស្ស៊ី នៅជិតព្រំដែនអ៊ុយក្រែន ដោយលើកឡើងពីការគំរាមកំហែងដល់បេឡារុស្សពីទីក្រុង Kyiv និងលោកខាងលិច។
ទីក្រុង Kyiv បានសម្តែងការភ័យខ្លាចថា បេឡារុស អាចឃុបឃិតជាមួយរុស្ស៊ី និងវាយប្រហារអ៊ុយក្រែន ពីព្រំដែនភាគខាងជើងរបស់ខ្លួន។
កាលពីខែកក្កដា អង្គការសហប្រជាជាតិ និងទួរគីបានចុះកិច្ចព្រមព្រៀងជាមួយរុស្ស៊ី និងអ៊ុយក្រែន ដើម្បីបន្តការដឹកជញ្ជូនគ្រាប់ធញ្ញជាតិនៅសមុទ្រខ្មៅរបស់អ៊ុយក្រែនឡើងវិញ ដែលជាប់គាំងចាប់តាំងពីការចាប់ផ្តើមនៃសង្រ្គាម នៅពេលដែលរុស្ស៊ីបានដាក់ការបិទផ្លូវនាវាចរនៃកំពង់ផែអ៊ុយក្រែន។
អង្គការសហប្រជាជាតិបានឲ្យដឹងថាសង្គ្រាមរបស់រុស្ស៊ីនៅអ៊ុយក្រែនបានធ្វើឱ្យវិបត្តិស្បៀងអាហារពិភពលោកកាន់តែអាក្រក់ទៅ ៗ ដោយបានរុញច្រានប្រជាជនប្រហែល ៤៧ លាននាក់ទៅជា “ភាពអត់ឃ្លានធ្ងន់ធ្ងរ” ។
