សម្តេចតេជោ ហ៊ុន សែន ហាមបក្សនយោបាយ កុំឲ្យយករឿងដោះស្រាយបញ្ហាលំនៅឋាន តំបន់រមណីយដ្ឋានអង្គរ ធ្វើជាអាវុធវាយប្រហារបក្សប្រជាជន
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានហាមបក្សនយោបាយនានា កុំឲ្យយករឿងដោះស្រាយបញ្ហា លំនៅឋានក្នុងតំបន់រមណីយដ្ឋានអង្គរ ធ្វើជាអាវុធវាយប្រហារបក្សប្រជាជនកម្ពុជា ។
ក្នុងឱកាសអញ្ជើញជួបសំណេះសំណាលជាមួយប្រជាពលរដ្ឋ ដែលបានស្ម័គ្រចិត្តរើលំនៅឋាន និងសំណង់ផ្សេងៗ ចេញពីតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា នាថ្ងៃទី១៣ កញ្ញា សម្ដេចតេជោ ហ៊ុន សែន បានស្នើដល់បក្សនយោបាយកុំប្រើរឿងដោះស្រាយបញ្ហានៅតំបន់រមណីយដ្ឋានអង្គរ ដើម្បីកេងចំណេញផ្នែកនយោបាយ ព្រោះជាតម្រូវការរបស់ជាតិ។ សម្តេចថា ការចាត់ចែងរបស់សម្តេចនាពេលនេះ គឺជាការដោះស្រាយបញ្ហារបស់ជាតិ មិនមែនដើម្បីនយោបាយនោះឡើយ។
សម្តេចតេជោ ហ៊ុន សែន គូសបញ្ជាក់ថា ទោះសម្តេចលាឈប់ពីនាយករដ្ឋមន្ត្រី តែសម្តេចនៅតែជាប្រធានបក្ស ហើយអាចពិនិត្យសកម្មភាពការងាររបស់នាយករដ្ឋមន្ត្រី។
សម្តេចតេជោបន្ថែមថា ចំណុចខ្លាំងមួយរបស់សម្តេច ក្នុងចំណោមចំណុចខ្លាំងៗនោះ គឺការវាយតម្លៃមិនត្រូវពីការដឹកនាំ និងរបៀបរបបការងាររបស់សម្តេច ៕
