ឯកឧត្តមវេជ្ជបណ្ឌិត សុះ មុះសិន អញ្ជើញជួបសំណេះសំណាល និងផ្តល់ប្រាក់ឧបត្ថម្ភ ជូនកុមារកំព្រាចិញ្ចឹមតាមមូលដ្ឋានចំនួន ១២៦នាក់ មកពី១៣ រាជធានី ខេត្ត

ភ្នំពេញ៖ ឯកឧត្តមវេជ្ជបណ្ឌិត សុះ មុះសិន តំណាងរាស្ត្រមណ្ឌលខេត្តកណ្ដាល និងជាសមាជិកគណៈកម្មការទី៨ នៃរដ្ឋសភា នាថ្ងៃទី៩ ខែកញ្ញា ឆ្នាំ២០២២ បានអញ្ជើញជាអធិបតីក្នុងពិធីជួបសំណេះសំណាល និងផ្ដល់ប្រាក់ឧបត្ថម្ភជូនប្អូនៗកុមារកំព្រា ចិញ្ចឹមតាមផ្ទះក្នុងឆមាសទី២ លើកទី៣១ ឆ្នាំ២០២២ សរុបចំនួន ១២៦នាក់ ដែលត្រូវបានជ្រើសរើសពី ១៣ រាជធានី ខេត្ត ដោយក្នុងម្នាក់ៗទទួលបានថវិកាចំនួន ២៨អឺរ៉ូ សរុបជាទឹកប្រាក់ចំនួន ២៣១,៩២៤.០០ អឺរ៉ូ ស្មើនិងថវិកា ២៥៨,៩២៨.០០ ដុល្លារ សហរដ្ឋអាមេរិក បានប្រារព្ធធ្វើឡើងនៅក្នុងបរិវេណមជ្ឈមណ្ឌលផ្ទះអេមីរ៉ាតសំរាប់ក្មេងកំព្រា ស្ថិតក្នុងភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។

ពិធីនេះមានការអញ្ជើញចូលរួមពី ឯកឧត្តមរដ្ឋលេខាធិការ និង ឯកឧត្តម លោកជំទាវ ជាអនុរដ្ឋលេខាធិការ អស់លោក លោកស្រី ព្រមទាំងលោកអភិបាលរងខណ្ឌច្បារអំពៅ តំណាងលោកអភិបាល នៃគណៈអភិបាលខណ្ឌច្បារអំពៅ លោកស្រីសមាជិកាក្រុមប្រឹក្សាខណ្ឌច្បារអំពៅ អាជ្ញាធរមូលដ្ឋាន និងក្រុមការងារ ស.ន.ម.ក រាជធានីភ្នំពេញ។

ឯកឧត្តមវេជ្ជបណ្ឌិត សុះ មុះសិន បានមានប្រសាសន៍ថា គោលបំណងនៃការចិញ្ជឹមក្មេងកំព្រាតាមមូលដ្ឋាន គឺដើម្បីជួយសម្រាលបន្ទុករបស់អាណាព្យាបាលលើការផ្គត់ផ្គង់ជីវភាពចិញ្ចឹមបីបាច់ថែរក្សា ថែទាំសុខភាព និងពិសេសផ្ដល់លទ្ធភាពឲ្យក្មេងៗបានទទួលការអប់រំដូចក្មេងទូទៅដែរ និងចូលរួមចំណែកជាមួយរាជរដ្ឋាភិបាលក្នុងការគាំពារវិស័យ សង្គមកិច្ច ការបណ្តុះបណ្តាលកុមារ ពិសេសកាត់បន្ថយភាពក្រីក្រជូនប្រជាពលរដ្ឋ ៕