ភ្នំពេញ៖ ឯកឧត្តម តូច ចាន់នី អគ្គនាយកសេវាសង្គមកិច្ច និងជាអ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទាបានឱ្យដឹងថា កម្ពុជាបានទទួលរៀបចំសន្និសីទជនមានពិការភាពអាស៊ីប៉ាស៊ីហ្វិកលើកទី៥ បន្ទាប់ពីប្រទេសម៉ុងហ្គោលីមានរយៈពេលបីថ្ងៃចាប់ពីថ្ងៃទី១៥ដល់ថ្ងៃទី១៧ ខែ មីនានៅឆ្នាំ២០២៣ខាងមុននេះ ។
ថ្លែងក្នុងសន្និសីទសារព័ត៌មានស្ដីពី សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងសង្គមកិច្ច អតីតយុទ្ធជន និងយុវនីតិសម្បទានាថ្ងៃទី១៨ ខែសីហា ឆ្នាំ ២០២៣ ឯកឧត្តម តូច ចាន់នី បានមានប្រសាសន៍ថា ក្នុងកិច្ចប្រជុំនេះនឹងពិភាក្សាទៅ លើការផ្លាស់ប្តូរបទពិសោធន៍គ្នាទៅវិញទៅមកស្តីពីជនពិការនិងរកយន្តការដោះ ស្រាយជនពិការឱ្យទទួលបានអត្ថប្រយោជន៍និងសិទ្ធិស្មើ ភាពគ្មានការរើសអើង។
ឯកឧត្តមបន្តថា តាមការរំពឹងទុក កិច្ចប្រជុំនេះ នឹងប្រទេសក្នុងតំបន់អាស៊ីប៉ាស៊ី ហ្វិក ចូលរួមប្រហែលជាង ៤០ប្រទេស ដែលមានមន្រ្តីមកពីរដ្ឋាភិបាល និងអង្គការសង្គមស៊ីវិលពាក់ព័ន្ធនឹង វិស័យពិការភាពចូលរួម ដើម្បីស្វែងរកដំណោះស្រាយ យន្តការ កិច្ចអន្តរាគមន៍នានាដែលជួយលើកកម្ពស់ វិស័យពិការភាព។
ឯកឧត្តមបញ្ជាក់យ៉ាងដូច្នេះថា «យើងកំពុងស្ថិតក្នុងដំណើរការរៀបចំប្រទេសនីមួយៗជួបប្រជុំគ្នារៀបចំកម្មវិធី ជារួមទីមួយប្រទេសនិងប្រទេសបានផ្លាស់ប្តូរបទពិសោធគ្នា ថាតើជនពិការប្រទេសណាល្អប្រសើរណាមិនល្អប្រសើរការប្តូរបទពិសោធគ្នាដកស្រង់បទពិសោធហើយនឹងផ្តល់អនុសាសន៍គួរធ្វើយ៉ាងម៉េចប្រទេសអ្នកឯងធ្វើយ៉ាងម៉េចប្រទេសខ្ញុំធ្វើយ៉ាងម៉េចហើយយើងមានសេចក្ដីថ្លែងការណ៍រួមមួយចុងក្រោយថាតើជនពិការតាមបណ្ដាប្រទេសដែលជាសមាជិកទាំងអស់ហ្នឹងគួរតែត្រូវបានទទួលនិងការដោះស្រាយបន្ត ដើម្បីលើកកម្ពស់ឧត្តមប្រយោជន៍របស់ជនពិការ»។
ឯកឧត្តមបានបន្ថែមទៀតថា រាជរដ្ឋាភិបាលកម្ពុជាបានបន្តយកចិត្តទុកដាក់ខ្ពស់ទៅដល់ជនមានពិការភាព ទាំងអស់ឱ្យមានសិទ្ធិពេញលេញនៅ ក្នុងសង្គម ដោយពង្រឹងកិច្ចគាំពារសង្គមដែលលើកស្ទួយស្ថានភាពសង្គម សេដ្ឋកិច្ច ក្នុងគោលបំណង ពង្រឹងនូវបណ្តាញសុវត្ថិភាពសង្គម និងកិច្ចគាំពារសង្គមលើកកម្ពស់គុណភាព ប្រសិទ្ធភាព និងសមធម៌៕ប្រភពៈ ក្រសួងព័ត៌មាន
