ចិនប្រកាសអាសន្ន ខណៈព្យុះទីហ្វុង Mulan ជិតមកដល់

ប៉េកាំង៖ ប្រទេសចិននៅថ្ងៃពុធនេះ បានចេញការប្រកាសអាសន្នពណ៌លឿង ខណៈដែលព្យុះទីហ្វុង Mulan ដែលជាព្យុះទីហ្វុងទី៧ ប្រចាំឆ្នាំ ត្រូវបានគេរំពឹងថានឹងបោកបក់មកលើតំបន់ឆ្នេរនៃខេត្ត Hainan និង Guangdong ក្នុងពេលថ្ងៃ។

មជ្ឈមណ្ឌលឧតុនិយមជាតិបានប្រកាសអោយដឹងថា នៅម៉ោង ៥ ព្រឹកថ្ងៃពុធ ភ្នែករបស់ Mulan ត្រូវបាន គេសង្កេតឃើញនៅលើសមុទ្រចម្ងាយប្រហែល២២០ គីឡូម៉ែត្រភាគអាគ្នេយ៍នៃទីក្រុង Zhanjiang ក្នុងខេត្ត Guangdong ដែលមានខ្យល់បក់រហូតដល់២៣ ម៉ែត្រក្នុងមួយវិនាទី។

មជ្ឈមណ្ឌលព្យាករណ៍ថា Mulan នឹងផ្លាស់ទីទៅភាគពាយព្យក្នុងល្បឿនរហូតដល់ ២៥ គីឡូម៉ែត្រ ក្នុងមួយម៉ោង ដោយនាំមកនូវខ្យល់បក់ខ្លាំង និងភ្លៀងធ្លាក់ខ្លាំងទៅកាន់ខេត្ត Guangdong, Guangxi និង Hainan។

មជ្ឈមណ្ឌលបានស្នើឱ្យកប៉ាល់ និងទូកគួរជ្រកនៅតាមកំពង់ផែ ទន្ទឹមនឹងនោះ ក៏ណែនាំដល់តំបន់ ពាក់ព័ន្ធត្រូវចាត់វិធានការទប់ស្កាត់ទឹកជំនន់ដ៏ខ្លាំង និងគ្រោះមហន្តរាយភូមិសាស្ត្រ។

ប្រទេសចិនមានប្រព័ន្ធព្រមានអាកាសធាតុដែលមានកូដពណ៌ចំនួនបួនសម្រាប់ព្យុះទីហ្វុងដែលមានពណ៌ក្រហមតំណាងឱ្យកម្រិតធ្ងន់ធ្ងរបំផុត បន្ទាប់មកគឺពណ៌ទឹកក្រូច លឿង និងខៀវ។