អភិបាលខេត្តឧត្តរមានជ័យ នាំយកអំណោយមនុស្សធម៌របស់កាកបាទក្រហមកម្ពុជា ចែកជូនបងប្អូនប្រជាពលរដ្ឋជាគ្រួសារកងទ័ពជួរមុខចំនួន២៥០គ្រួសារ នៅតំបន់ប្រតិបត្តិការសឹករងឧត្ដរមានជ័យ

ឧត្ដរមានជ័យ៖ នៅថ្ងៃទី១៩ ខែមិថុនា ឆ្នាំ២០២៦ ឯកឧត្ដម មាន ចាន់យ៉ាដា អភិបាលខេត្តឧត្តរមានជ័យ និងជាប្រធានគណៈកម្មការសាខាកាកបាទក្រហមកម្ពុជាខេត្ត បានដឹកនាំក្រុមការងារ ចុះសំណេះសំណាល សួរសុខទុក្ខ និងនាំអំណោយមនុស្សធម៌របស់កាកបាទក្រហមកម្ពុជា ចែកជូនបងប្អូនប្រជាពលរដ្ឋជាគ្រួសារកងទ័ពជួរមុខចំនួន២៥០គ្រួសារ នៅតំបន់ប្រតិបត្តិការសឹករងឧត្ដរមានជ័យ។

ឯកឧត្ដម មាន ចាន់យ៉ាដា ក៏បានបានពាំនាំនូវប្រសាសន៍ផ្ដាំផ្ញើសួរសុខទុក្ខ ប្រកបដោយមនោសញ្ចេតនាជ្រាលជ្រៅ និងក្តីនឹករលឹកបំផុតពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះបងប្អូនប្រជាពលរដ្ឋជាគ្រួសារវីរកងទ័ពទាំងអស់ ដែលកំពុងមានវត្តមាននៅទីនេះ។

ឯកឧត្ដម បានបញ្ជាក់ថា «អំណោយដែលនាំមកចែកជូនគ្រួសារកងទ័ពនៅថ្ងៃនេះ គឺពិតជាមានសារៈសំខាន់ខ្លាំងណាស់ ព្រោះវាបានស្តែងឱ្យឃើញពីការយកចិត្តទុកដាក់ខ្ពស់របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលសម្តេចតែងតែគិតគូរជានិច្ចអំពីសុខទុក្ខ និងការលើកកម្ពស់ជីវភាពរស់នៅរបស់ប្រជាពលរដ្ឋគ្រប់រូប ដោយមិនទុកឲ្យបងប្អូនប្រជាពលរដ្ឋណាម្នាក់នៅឯកោ ឬរងគ្រោះដោយមិនបានដឹងឮនោះឡើយ»។

ឯកឧត្តម ប្រធានគណៈកម្មការសាខាខេត្ត ក៏បានសម្តែងនូវការកោតសរសើរ និងដឹងគុណយ៉ាងជ្រាលជ្រៅចំពោះយោធិនទាំងអស់ ដែលបានលះបង់កម្លាំងកាយ កម្លាំងចិត្ត និងក្រុមគ្រួសារ ដើម្បីឈរជើងការពារបូរណភាពទឹកដីជូនជាតិមាតុភូមិ ឱ្យទទួលបានសុខសន្តិភាព និងស្ថេរភាពដូចសព្វថ្ងៃ។

សូមបញ្ជាក់ថា អំណោយដែលនាំមកចែកជូនដល់គ្រួសារវីរកងទ័ពនាពេលនេះ ក្នុងមួយគ្រួសារៗទទួលបាន អង្ករ២០គ.ក, មី០១កេស, ទឹកស៊ីអុីវ ០១យួរ, ទឹកសុទ្ធ១កេស, ទឹកក្រូចវី-កូឡា១កេស, ត្រីខ១២កំប៉ុង៕