លោក Elon Musk បង្ហើបពីគម្រោងដ៏គួរឱ្យភ្ញាក់ផ្អើលមួយ ដោយគ្រោងបង្កើតបណ្តាញមជ្ឈមណ្ឌលទិន្នន័យសិប្បនិម្មិត (AI Data Centers) នៅលើគន្លងអវកាស
បរទេស៖ ស្ថាបនិកក្រុមហ៊ុន SpaceX លោក Elon Musk បានបង្ហើបពីទស្សនទានដ៏គួរឱ្យភ្ញាក់ផ្អើលមួយ ដោយគ្រោងបង្កើតបណ្តាញមជ្ឈមណ្ឌលទិន្នន័យសិប្បនិម្មិត (AI Data Centers) នៅលើគន្លងអវកាស តាមរយៈការបង្ហោះផ្កាយរណបបំពាក់ឈីប AI រហូតដល់ទៅ ១លាន ដើម្បីដោះស្រាយវិបត្តិថាមពល និងការប្រើប្រាស់ដីនៅលើភពផែនដី។
តាមការលើកឡើង គម្រោងនេះនឹងប្រើប្រាស់ផ្កាយរណប Starlink ជំនាន់ទី៣ (Starlink V3) ដែលបំពាក់ដោយប្រព័ន្ធឡាស៊ែរល្បឿនលឿនសម្រាប់ភ្ជាប់ទិន្នន័យរវាងផ្កាយរណបនិងផ្កាយរណប។ ទោះជាយ៉ាងណាក៏ដោយ គំនិតនេះកំពុងរងការជជែកដេញដោលយ៉ាងក្តៅគគុកពីសំណាក់អ្នកជំនាញបច្ចេកវិទ្យា និងអ្នកវិទ្យាសាស្ត្រអវកាសជុំវិញពិភពលោក។
អ្នកជំនាញបានចង្អុលបង្ហាញថា គម្រោងនេះត្រូវប្រឈមមុខនឹងរបាំងរូបវិទ្យាធំៗចំនួនពីរ គឺទី១ ប្រព័ន្ធបញ្ចុះកម្តៅ៖ ម៉ាស៊ីន Server របស់ AI បញ្ចេញកម្តៅខ្លាំងបំផុត ខណៈលំហអាកាសជាសុញ្ញាកាស ដែលគ្មានខ្យល់ ឬទឹកសម្រាប់ជួយនាំកម្តៅចេញ ធ្វើឱ្យផ្កាយរណបងាយនឹងរលាយគ្រឿងបង្គុំខាងក្នុង។ ទី២គឺ វិបត្តិសម្រាមអវកាស៖ ការបង្ហោះវត្ថុរហូតដល់ ១លានទៅក្នុងគន្លងផែនដី អាចបង្កជាគ្រោះថ្នាក់ដ៏ធំធេងដល់ប្រព័ន្ធការពារសុវត្ថិភាពអវកាសទាំងមូល។
ទោះបីជាវានៅតែជាគំនិតបែបវិទ្យាសាស្ត្រប្រឌិត នៅឡើយ ហើយមិនទាន់មានក្រុមហ៊ុនណាមួយបង្កើតមជ្ឈមណ្ឌលទិន្នន័យលើអវកាសបានជោគជ័យក៏ដោយ ប៉ុន្តែការផ្លាស់ប្តូរយុទ្ធសាស្ត្ររបស់ SpaceX អាចនឹងបើកទំព័រថ្មីមួយសម្រាប់ការប្រកួតប្រជែងបច្ចេកវិទ្យាក្នុងទសវត្សរ៍ខាងមុខ៕
