ចិនថាកិច្ចប្រឹងប្រែងពង្រឹងវិស័យយោធារបស់ខ្លួន គឺផ្តល់អត្ថប្រយោជន៍ ចំពោះសន្តិភាពពិភពលោក

ប៉េកាំង៖ បើតាមការចេញផ្សាយដោយ ទីភ្នាក់ងារព័ត៌មាន AFP កាលពីថ្ងៃចន្ទ ទី១៥ ខែមិថុនា ឆ្នាំ២០២៦ ចិនបាននិយាយថា កិច្ចប្រឹងប្រែងពង្រឹងវិស័យយោធារបស់ខ្លួន គឺផ្តល់អត្ថប្រយោជន៍ ចំពោះសន្តិភាពពិភពលោក ដោយថ្កោលទោសរបាយការណ៍របស់ស្ថាប័នស្រាវជ្រាវមួយនៅឯប្រទេសអូស្រ្តាលី ដែលបានព្រមានការកើនឡើង នៃការគំរាមកំហែងរបស់ចិន។

វិទ្យាស្ថាន Lowy ដែលមានមូលដ្ឋាននៅអូស្រ្តាលី កាលពីថ្ងៃអាទិត្យចុងសប្តាហ៍កន្លងទៅនេះ បានចេញរបាយការណ៍មួយអះអាងថា ចិនមាន សមត្ថភាពវាយប្រហារមីស៉ីលដោយផ្ទាល់ ទៅលើប្រទេសអូស្រ្តាលី ហើយការគំរាមកំហែងនេះកំពុងតែកើនឡើង ខណៈទីក្រុងប៉េកាំងបាននិងកំពុងបង្កើនចំនួន អាវុធចម្ងាយឆ្ងាយ និងមានល្បឿនលឿនជាងសំឡេង ហើយសាងសង់កោះសិប្បនិម្មិតនៅសមុទ្រចិនខាងត្បូង។

ឆ្លើយតបរបាយការណ៍ខាងលើ ចិនបានចេញមុខថ្កោលទោសថា វាជាការវិនិច្ឆយខុសយ៉ាងធ្ងន់ ហើយបានអះអាងថា ប្រទេសចិនប្តេជ្ញាចំពោះ គន្លងផ្លូវនៃការអភិវឌ្ឍដោយសន្តិភាព។

អ្នកនាំពាក្យក្រសួងការបរទេសចិន លោក Lin Jian បានលើកឡើងថា ភាពរីកចម្រើននៃកម្លាំងយោធា របស់ចិន គឺតំណាងឱ្យកំណើននៃកម្លាំងដើម្បីសន្តិភាពពិភពលោក។

លោក Lin បានគូសបញ្ជាក់ថា «ការអភិវឌ្ឍកម្លាំងយោធារបស់ប្រទេសចិន គឺក្នុងបំណងដើម្បីរក្សាការពារអធិបតេយ្យ សន្តិសុខ និងផលប្រយោជន៍អភិវឌ្ឍន៍របស់ជាតិខ្លួន ហើយមិនមានគោលដៅសំដៅរកប្រទេសទី៣ណាមួយនោះទេ»។

ទន្ទឹមគ្នាដែរ អ្នកនាំពាក្យចិន បានទទូចឱ្យស្ថាប័នពាក់ព័ន្ធទាំងឡាយ ឈប់ខំប្រឹងបំប៉ោងអ្វីដែលត្រូវបានហៅថា «ការគំរាមកំហែងរបស់ចិន» តទៅទៀត ហើយមើលមកការអភិវឌ្ឍ របស់ប្រទេសចិន ដោយឈរលើជំហរមួយដែលសត្យានុម័ត យុត្តិធម៌ និងសមហេតុផល៕